އޭއެފްސީ 20 އަހަރުން ދަށުގެ މުބާރާތުގެ ކޮލިފައިން ޑިވެލޮޕްމަންޓް ފޭސްގައި މި ފަހަރު ވާދަކުރާ ރާއްޖޭން ކޯޗަކަށް ކުރިން ވެސް އެ މަގާމުގައި ގިނަ މުބާރާތްތަކެއްގައި މަސައްކަތްކުރި، އަހުމަދު ޝާކިރު (ޝާކިއްޓެ) ހަމަޖައްސައި، މުބާރާތަށް ރާއްޖޭގެ ސްކޮޑު ފައިނަލްކޮށްފި އެވެ.
ރާއްޖޭގައި މިދިޔަ މާޗް މަހު ބޭއްވި ސާފް 20 އަހަރުން ދަށުގެ ގައުމީ ޓީމުގެ ކޯޗަކަށް މަސައްކަތްކުރީ ސީނިއާ ޓީމުގެ ކޯޗު އިސްތަވާން އުރްބާނީ އެވެ. އޭނާއާ އެކު ކޯޗިން ޓީމުގައި ޝާކިއްޓެ ވެސް މަސައްކަތްކުރި އެވެ. އެކަމަކު، ކުރިއަށް އޮތް އޭއެފްސީ ކޮލިފައިން ބުރުގައި ރާއްޖޭން ނުކުންނާނީ ޝާކިއްޓެގެ ބެލުމުގެ ދަށުންނެވެ.
އޭއެފްސީ ކޮލިފައިންގެ އޮނިގަނޑަށް މި ފަހަރު ވަނީ ބަދަލު ގެނެސްފަ އެވެ. އެ ގޮތުން، ކޮލިފައިން ކުރިއަށްދާނީ ކޮލިފިކޭޝަން ފޭސް އާއި ޑިވެލޮޕްމަންޓް ފޭސް އެއް ގޮތަށެވެ. ކޮލިފިކޭޝަން ފޭސްގައި މަތީ ރޭންކުގެ ގައުމުތަކުން ކުޅޭއިރު، ޑިވެލޮޕްމަންޓް ފޭސްގައި ކުޅޭނީ ދަށް ރޭންކުގެ ގައުމުތަކެވެ.
އެ ގޮތުން، ކޮލިފިކޭޝަން ފޭސްގައި ހިމެނެނީ، ގްރޫޕެއްގައި ހަތަރު ޓީމު ހިމެނޭ ގޮތަށް އަށް ގްރޫޕެވެ. އޭގެ ތެރެއިން، ކޮންމެ ގްރޫޕެއްގެ އެއް ވަނަ އާއި އެންމެ ރަނގަޅު ނަތީޖާ ނެރޭ ދެ ވަނަ ޓީމުތަކުގެ ތެރެއިން ހަތް ޓީމަކަށް އަންނަ އަަހަރު އޭޕްރީލް މަހު ޗައިނާގައި ކުޅޭ 20 އަހަރުން ދަށުގެ އޭޝިއަން ކަޕުން ޖާގަ ލިބޭނެ އެވެ.
ކޮލިފިކޭޝަން ފޭސްގެ ކޮންމެ ގްރޫޕެއްގެ އެންމެ ފުލަށް ދާ ޓީމެއް، ޑިވެލޮޕްމަންޓް ފޭސް އަށް ރެލިގޭޓްވާނެ އެވެ. ރާއްޖެ ހިމެނެނީ ޑިވެލޮޕްމަންޓް ފޭސްގަ އެވެ. ޑިވެލޮޕްމަންޓް ފޭސްގައި ތިން ގްރޫޕެއް އޮތްއިރު، ރާއްޖޭގެ ގްރޫޕްގެ މެޗުތައް ކުޅޭނީ މިޔަންމާގަ އެވެ. އެ ގްރޫޕްގައި މިޔަންމާ އާއި ރާއްޖެ އަދި ސްރީ ލަންކާ އާއި ދާރުއްސަލާމް ހިމެނޭއިރު، މީގެއިން އެންމެ ރަނގަޅު ނަތީޖާ ނެރޭ ދެ ޓީމަކަށް ދެން އޮތް އޭޝިއަން ކަޕް ކޮލިފައިންގެ ކޮލިފިކޭޝަން ފޭސް އިން ޖާގަ ލިބޭނެ އެވެ.
ރާއްޖެ އާއި ސްރީ ލަންކާ އިން ވަނީ މިދިޔަ މާޗް މަހު މާލޭގައި ކުރިއަށްދިޔަ ސާފް 20 އަހަރުން ދަށުގެ މުބާރާތުގެ ގްރޫޕް ސްޓޭޖުގައި ވާދަކޮށްފަ އެވެ. އެ މެޗުން ރާއްޖެ 2-0 އިން ކުރީގައި އޮއްވައި، ސްރީ ލަންކާ އިން ވަނީ ދެ ވަނަ ހާފުގައި ނަތީޖާ އަނބުރާލައި، 3-2 އިން މޮޅުވެފަ އެވެ. ރާއްޖޭން އެ މުބާރާތުގައި ކުޅުނީ ސީނިއާ ގައުމީ ޓީމުގެ ކޯޗު، ހަންގޭރީގެ އިސްތަވާން އުރްބާނީގެ އިރުޝާދުގެ ދަށުންނެވެ. މީގެ ކުރިން، 2022 ވަނަ އަހަރު އޭއެފްސީ ކޮލިފައިންގައި ރާއްޖެ އާއި މިޔަންމާ ވަނީ އެއް ގްރޫޕެއްގައި ވާދަކޮށްފަ އެވެ. އެ ގޮތުން، ސައުދީ އަރަބިއްޔާގެ ދަންމާމުގައި ކުޅުނު ކޮލިފައިން ބުރުގައި، މިޔަންމާ އަތުން ރާއްޖެ ބަލިވީ 3-0 އިންނެވެ.
ކޮލިފައިންގައި މި މަހު 31 ވަނަ ދުވަހު ރާއްޖޭން ކުޅޭނީ ބްރުނާއީއާ އެވެ. ދެ ވަނަ މެޗުގައި އަންނަ މަހު ތިން ވަނަ ދުވަހު ސްރީ ލަންކާއާ ކުޅުމަށް ފަހު، ކޮލިފައިން ފަހު މެޗުގައި އަންނަ މަހު ހަ ވަނަ ދުވަހު، މިޔަންމާއާ ބައްދަލުކުރާނެ އެވެ.
އޭޝިއަން ކަޕް ކޮލިފައިންގައި ކުޅޭ 20 އަހަރުން ދަށުގެ ގައުމީ ސްކޮޑު:
މުހައްމަދު އަބާން ބިން އަބްދުﷲ ޒުބައިރު، ހަސަން ހައިޝަމް ހާމިދު، މުހައްމަދު ޖޫދު އިސްމާއިލް، އަލްހާން ފައިސަލް އަމީން، މުހައްމަދު ނައިސަމް ނަދީމް، މުހައްމަދު ޒީކް އަހުމަދު، އަރުހަމް އަމްޖަދު، އަހްޒަމް ރަޝީދު (އަހު)، މުހައްމަދު އިލާން އިމްރާން، އީތަން އިބްރާހިމް ޒަކީ، ނައްސާހު އިބްރާހިމް ނާސިރު، އަނޫފް އަބްދުﷲ، އަހުމަދު މިކްޔަލް މުއީން (މިކީ)، އައިދަން އަހުމަދު މޫސާ، އަލީ ހައިޒޫމް ހަސަން، އަހުމަދު އަފްނާން އަލީ، މުހައްމަދު ޝަމްހާން، ޝައިމަން ރަޝާދު، އައިދު މުހައްމަދު ޖަވީޒު، ހަސަން ގައިސް މުހައްމަދު، އަހުމަދު ހަމީސް އަރީފް، ޒަހުރާން ހަސަން ޒިޔާދު (ޒަހު)، ނާޝިއު އަހުމަދު ޝިހާމް
ޓީމުގެ ކޯޗިން ސްޓާފުން
އަހުމަދު ޝާކިރު (ޝާކިއްޓެ)، އިބްރާހިމް ސައީދު (ކަކާ)، އިސްމާއިލް އާސިފް (އާސިއްޕެ)، އިމްރާން މުހައްމަދު، ހިޝާމް އަލީ ޒަކީ، އަބްދުލް ހަކީމް މޫސާ، އިސްމާއިލް ނަސީރު، މުހައްމަދު އަބީރު
