އޭއެފްސީ 20 އަހަރުން ދަށުގެ މުބާރާތުގެ ކޮލިފައިން ޑިވެލޮޕްމަންޓް ފޭސްގައި މި ފަހަރު ވާދަކުރާ ރާއްޖޭން، މިޔަންމާ އާއި ސްރީ ލަންކާ އަދި ބްރުނާއީ ދާރުއްސަލާމާ އެއް ގްރޫޕެއްގައި ވަނީ ހިމެނިފައި.
އޭއެފްސީ ކޮލިފައިންގެ އޮނިގަނޑަށް މި ފަހަރު ވަނީ ބަދަލު ގެނެސްފަ އެވެ. އެ ގޮތުން، ކޮލިފައިން ކުރިއަށްދާނީ ކޮލިފިކޭޝަން ފޭސް އާއި ޑިވެލޮޕްމަންޓް ފޭސް އެއް ގޮތަށެވެ. ކޮލިފިކޭޝަން ފޭސްގައި މަތީ ރޭންކުގެ ގައުމުތަކުން ކުޅޭއިރު، ޑިވެލޮޕްމަންޓް ފޭސްގައި ކުޅޭނީ ދަށް ރޭންކުގެ ގައުމުތަކެވެ.
އެ ގޮތުން، ކޮލިފިކޭޝަން ފޭސްގައި ހިމެނެނީ، ގްރޫޕެއްގައި ހަތަރު ޓީމު ހިމެނޭ ގޮތަށް އަށް ގްރޫޕެވެ. އޭގެ ތެރެއިން، ކޮންމެ ގްރޫޕެއްގެ އެއް ވަނަ އާއި އެންމެ ރަނގަޅު ނަތީޖާ ނެރޭ ދެ ވަނަ ޓީމުތަކުގެ ތެރެއިން ހަތް ޓީމަކަށް އަންނަ އަަހަރު އޭޕްރީލް މަހު ޗައިނާގައި ކުޅޭ 20 އަހަރުން ދަށުގެ އޭޝިއަން ކަޕުން ޖާގަ ލިބޭނެ އެވެ.
ކޮލިފިކޭޝަން ފޭސްގެ ކޮންމެ ގްރޫޕެއްގެ އެންމެ ފުލަށް ދާ ޓީމެއް، ޑިވެލޮޕްމަންޓް ފޭސް އަށް ރެލިގޭޓްވާނެ އެވެ.
ރާއްޖެ ހިމެނެނީ ޑިވެލޮޕްމަންޓް ފޭސްގަ އެވެ. ޑިވެލޮޕްމަންޓް ފޭސްގައި ތިން ގްރޫޕެއް އޮތްއިރު، ރާއްޖޭގެ ގްރޫޕްގެ މެޗުތައް ކުޅޭނީ މިޔަންމާގަ އެވެ.
އެ ގްރޫޕްގައި މިޔަންމާ އާއި ރާއްޖެ އަދި ސްރީ ލަންކާ އާއި ދާރުއްސަލާމް ހިމެނޭއިރު، މީގެއިން އެންމެ ރަނގަޅު ނަތީޖާ ނެރޭ ދެ ޓީމަކަށް ދެން އޮތް އޭޝިއަން ކަޕް ކޮލިފައިންގެ ކޮލިފިކޭޝަން ފޭސް އިން ޖާގަ ލިބޭނެ އެވެ.
ދެކުނު އޭޝިއާގެ ގައުމުތަކަށް ބަލާއިރު، ބަންގްލަދޭޝް އާއި އިންޑިއާ ފިޔަވައި، ދެން އޮތް ގައުމުތައް ހިމެނެނީ ޑިވެލޮޕްމަންޓް ފޭސްގަ އެވެ. ޕާކިސްތާން މި ފަހަރު ކޮލިފައިންގައި ނުކުޅެ އެވެ.
ރާއްޖެ އާއި ސްރީ ލަންކާ އިން ވަނީ މިދިޔަ މާޗް މަހު މާލޭގައި ކުރިއަށްދިޔަ ސާފް 20 އަހަރުން ދަށުގެ މުބާރާތުގެ ގްރޫޕް ސްޓޭޖުގައި ވާދަކޮށްފަ އެވެ. އެ މެޗުން ރާއްޖެ 2-0 އިން ކުރީގައި އޮއްވައި، ސްރީ ލަންކާ އިން ވަނީ ދެ ވަނަ ހާފުގައި ނަތީޖާ އަނބުރާލައި، 3-2 އިން މޮޅުވެފަ އެވެ. ރާއްޖޭން އެ މުބާރާތުގައި ކުޅުނީ ސީނިއާ ގައުމީ ޓީމުގެ ކޯޗު، ހަންގޭރީގެ އިސްތަވާން އުރްބާނީގެ އިރުޝާދުގެ ދަށުންނެވެ.
މީގެ ކުރިން، 2022 ވަނަ އަހަރު އޭއެފްސީ ކޮލިފައިންގައި ރާއްޖެ އާއި މިޔަންމާ ވަނީ އެއް ގްރޫޕެއްގައި ވާދަކޮށްފަ އެވެ. އެ ގޮތުން، ސައުދީ އަރަބިއްޔާގެ ދަންމާމުގައި ކުޅުނު ކޮލިފައިން ބުރުގައި، މިޔަންމާ އަތުން ރާއްޖެ ބަލިވީ 3-0 އިންނެވެ.
މި ފަަހަރުގެ ކޮލިފައިން ކުޅެން ހަމަޖެހިފައިވަނީ، އޮގަސްޓް 25 އިން ސެޕްޓެމްބަރު 6 އާ ދެމެދުގަ އެވެ.
