ކުޅުދުއްފުށި ސިޓީގައި މިދިޔަ ސަރުކާރުން އަޅަން ފެށި 400 ހައުސިން ޔުނިޓު ހިމެނޭހެން، މަސައްކަތް ހަވާލުކޮށް ސޮއިކޮށްފައި ހުރި 5800 ހައުސިން ޔުނިޓުގެ މަސައްކަތް ކުރިއަށް ނުދާތީ އެ ސިޓީގެ މޭޔަރު، މުހައްމަދު އާތިފް ކަންބޮޑުވުން ފާޅުކުރައްވައިފި އެވެ.
ސޯޝަލްމީޑިއާގައި އާތިފް ކުރެއްވި ޕޯސްޓެއްގައި ވިދާޅުވީ ކުޅުދުއްފުށި ޒުވާނުންނަށް ދިމާވެފައިވާ އެންމެ ބޮޑު މައްސަލައަކީ ގެދޮރުވެރިކަން ނެތުން ކަމަށެވެ.
"ނިމިދިޔަ ސަރުކާރުން އިމާރާތްކުރަން ފެށި 400 ހައުސިން ޔުނިޓުގެ މަސައްކަތް އޮތީ ސަރުކާރު ބަދަލުވުމާއެކު ހުއްޓާލާފައި، ސެޕްޓެމްބަރު 1، 2023 ގައި ކޮންޓްރެކްޓާ ފައިނޭންސިން ކުޅުދުއްފުށީގައި އެޅުމަށް ސޮއިކުރި 1000 ހައުސިން ޔުނިޓުގެ މަސައްކަތް ވީ ހިސާބެއް ވެސް ނޭނގޭ،" އާތިފްގެ ޕޯސްޓުގައި ލިޔުއްވާފައިވެ އެވެ.
ވެރިކަން ބަދަލުވުމަށްފަހު، ރައީސުލްޖުމްހޫރިއްޔާ މުހައްމަދު މުއިއްޒު ރިޔާސީ އިންތިހާބުގައި ވެވަޑައިގެންނެވި ވައުދުގެ ދަށުން އެ ސިޓީގައި އެޅުމަށް ކަނޑައެޅި 1000 ހައުސިން ޔުނިޓުގެ ބިންގާ އެޅުމަށްފަހު، އެއްވެސް މަސައްކަތެއް ކުރިއަށް ނުދާ ކަމަށް އާތިފް ވިދާޅުވި އެވެ.
އޭގެ އިތުރުން، އެ ސިޓީގައި އިމާރާތްކުރުމަށް އެޗްޑީސީއާ ހަވާލުކުރި 2400 ހައުސިން ޔުނިޓުގެ މަސައްކަތް ވެސް ކުރިއަށް ނުދާކަން އޭނާގެ ޕޯސްޓުގައި ފާހަގަކުރައްވާފައިވެ އެވެ.
"ކުޅުދުއްފުށްޓަށް ވަމުންދާ އިހުމާލު ހުއްޓާލައި މި މަޝްރޫއުތައް އަވަސްކޮށްދެއްވުމަށް ސަރުކާރަށް ގޮވާލަން،" އާތިފްގެ ޕޯސްޓުގައި ލިޔުއްވާފައިވެ އެވެ.
ކުޅުދުއްފުށީގައި އަޅާ ހައުސިން ޔުނިޓުތަކުގެ މަސައްކަތް ކުރިއަށް ނުދާކަމަށް އެ ސިޓީގެ މޭޔަރު ވިދާޅުވިއިރު، ސަރުކާރުގެ ތަރައްގީގެ މަޝްރޫއުތަކަށް ކައުންސިލްތަކުން އެއްބާރުލުން ނުދޭކަމަށް ބުނެ ރައްޔިތުންގެ މަޖިލީހުން މިއަދު ވަނީ ރަށްރަށުގެ ބިންތައް ސަރުކާރަށް ނެގޭ ގޮތަށް ލާމަރުކަޒީ ގާނޫނު ބަދަލުކުރަން ފާސްކޮށްފަ އެވެ.
ވެރިކަންކުރާ ޕީއެންސީގެ ސުޕަ މެޖޯރިޓީ އޮތް މަޖިލީހުން މިއަދު ފާސްކުރި ބިލުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
ލާމަރުކަޒީ ގާނޫނަށް ދެން ގެންނަ ބަދަލުތައް ހުށަހަޅާފައި ވަނީ ކައުންސިލު މެންބަރުންގެ ސުލޫކީ މިންގަނޑަށެވެ. މި މިންގަނޑަށް އިތުރުކުރާ ކަންކަމުގައި ވަނީ، ސަރުކާރަށް ފުރިހަމައަށް އެއްބާރުލުން ދޭން ކައުންސިލަރުންނަށް މަޖުބޫރުކުރާ ގޮތަށެވެ.
އޭގެ އިތުރުން، މަގުބޫލު ސަބަބެއް ނެތި ސަރުކާރުގެ މަޝްރޫއުތަކަށް ހުރަސްއެޅޭ ގޮތަށް އަމަލުކޮށްގެން ނުވާނެ ކަމަށް ހިމަނަން ވެސް ވަނީ ހުށަހަޅާފަ އެވެ. އަދި، އެފަދަ މަޝްރޫއުތައް ހުއްޓުވުމަށް ނިންމުންތައް ނިންމައިގެން ނުވާނެ ކަމަށް ވެސް ބަދަލުތަކުގައި ވެ އެވެ.
