އަޑިސް އަބާބާ، އިތިއޯޕިއާ (އޮގަސްޓް 26) - އެފްރިކާގެ ފުޓްބޯޅަ ޖަމިއްޔާ، ކޮންފެޑެރޭޝަން އޮފް އެފްރިކަން ފުޓްބޯލް (ކާފް) އިން ކަނޑައަޅާފައިވާ ޝަރުތުހަމަވާ އެންމެ ސްޓޭޑިއަމެއް އޮތް އިތިއޯޕިއާ އިން 2028 ވަނަ އަހަރުގެ އެފްރިކަން ކަޕް އޮފް ނޭޝަންސް (އެފްކޮން) ބާއްވަން ބިޑްކޮށްފި އެވެ.
އިތިއޯޕިއާ އިން ވަނީ 1962، 1968 އާއި 1976 ވަނަ އަހަރު އެފްރިކަން ކަޕް ހޯސްޓްކޮށްފަ އެވެ. އެކަަމަކު، އިތިއޯޕިއާ އަކީ އެފްރިކާގެ ކުޅިވަރު އިންފްރާސްޓްރަކްޗާ އަށް ބަލާއިރު، އެންމެ ފަހަތުގައި އޮތް އެއް ގައުމެވެ. މިދިޔަ ސީޒަނުގައި، ކާފް އިން އެފްރިކާގެ ގައުމުތަކުގެ ފުޓްބޯޅަ ސްޓޭޑިއަމްތަކުގެ ކަންކަން ދިރާސާކުރިއިރު، އިތިއޯޕިއާގައި ބައިނަލްއަގުވާމީ މިންގަނޑަށް ފެތޭ އޮތީ އެންމެ ސްޓޭޑިއަމެކެވެ.
އިތިއޯޕިއާ އިން އަންނަނީ، އިންޓަނޭޝަނަލް ފުޓްބޯޅަ ސްޓޭޑިއަމެއް ހިމެނޭ ސްޕޯޓްސް ކޮމްޕްލެކްސް އެއް އެޅުމުގެ މަސައްކަތް ކުރަމުންނެވެ. އެ ދަނޑަކީ، 2028 ވަނަ އަހަރުގެ އެފްރިކަން ކަޕް ބާއްވަން އިތިއޯޕިއާ އިން ކުރި ބިޑްގައި ހިމަނާފައިވާ ސްޓޭޑިއަމެކެވެ.
އެކަމަކު، ބޮޑު ސުވާލަކީ، 24 ގައުމުގެ މެދުގައި ކުރިއަށްދާ އެފްރިކަން ކަޕް ބޭއްވޭނެ ވަރަށް އިންފްރާސްޓްރަކްޗާ އިތިއޯޕިއާގައި ހުރިތޯ އެވެ. އެ ގޮތުން، އިތިއޯޕިއާގައި ހުރި ޓްރެއިނިން ފެސިލިޓީސްތަކަކީ ވެސް ކާފް އާއި ފީފާ އިން ބަލައިގަންނަ މިންގަނޑަށް ވުރެން ދަށް ފެންވަރެއްގައި ހުރި ތަންތަނެވެ.
އިތިއޯޕިއާ އިން މި އަހަރު އެމެރިކާ، މެކްސިކޯ އަދި ކެނަޑާގައި ކުރިއަށްދިޔަ ފީފާ ވޯލްޑް ކަޕަށް ކޮލިފައިންގައި، އިތިއޯޕިއާގެ ހޯމް މެޗުތައް ކުޅެފައިވަނީ، މޮރޮކޯ އާއި ރްވާންޑާ އަދި އިތިއޯޕިއާގެ ކޮމާޝަލް ސިޓީ، ޑައިރް ޑާވާގަ އެވެ. މި ވަގުތު އޮތްގޮތުން، އިތިއޯޕިއާ އަށް 2028 ގެ އެފްކޮން ބޭއްވުމުގެ ފުުރުސަތު ލިބުން އޮތީ ހަނިކޮށެެވެ.
ދެން އޮތް އެފްރިކަން ކަޕް އޮތީ އަންނަ އަހަރު ޖޫން އާއި ޖުލައި މަހު، ކެންޏާ، ޓަންޒާނިއާ އަދި ޔޫގާންޑާގަ އެވެ. މިއީ، 1976 ވަނަ އަަހަރު އިތިއޯޕިއާގައި އެފްރިކަން ކަޕް ބޭއްވި ފަހުން، އީސްޓް އެފްރިކާ އަށް މި މުބާރާތް އަންނަ ފުރަތަަމަ ފަހަރެވެ. އަންނަ އަހަރަށް ފަހު، 2028 އިން ފެށިގެން، އެފްކޮން ދެން އޮންނާނީ ކޮންމެ ހަތަރު އަހަރަކުން އެއް އަހަރު އެވެ.
ކާފްގެ ރައީސް، މައުރީސް މޮޓްސެޕޭ ދާދި ފަހުން ވިދާޅުވީ، 2028 އާއި 2032 އަދި 2036 އަށް އެފްކޮން ބާއްވަން ގިނަ ގައުމުތަކަކުން ޝައުގުވެރިކަން ފާޅުކޮށްފައިވާ ކަމަށެވެ. އެ ގޮތުން، 2028 ވަނަ އަހަރުގެ އެފްކޮން ބާއްވަން ބިޑްކުރަން ނިންމާފައިވާ އެއް ގައުމުތަކަކީ، ބޮޓްސްވާނާ، ނަމީބިއާ، ދެކުނު އެފްރިކާ އަދި ޒިމްބާބްވޭ އެކުވެގެންނެވެ.
