ރަބަތު، މޮރޮކޯ (މާޗް 6) - އެފްރިކާގެ އަންހެން ފުޓްބޯޅަ މުބާރާތް، ވިމެންްސް އެފްރިކަން ކަޕް އޮފް ނޭޝަންސް (ވެފްކޮން)ގެ މި އަހަރު ބާއްވަން އޮތް މުބާރާތް ފަހު ވަގުތު ފަސް ކުރަން، އެފްރިކާގެ މައި ފުޓްބޯޅަ ޖަމިއްޔާ، ކޮންފެޑަރޭޝަން އޮފް އެފްރިކަން ފުޓްބޯލް (ކާފް) އިން ނިންމައިފި އެވެ.
މި މަހުގެ 17 އިން އަންނަ މަހުގެ ތިން ވަނަ ދުވަހުގެ ނިޔަލަށް މޮރޮކޯގައި ކުރިއަށްގެންދަން ނިންމާފައި އޮތް ވެފްކޮން ފަށަން 12 ދުވަހަށް ވެފައިވަނިކޮށް، މުބާރާތް ފަސްކުރަން ނިންމީ ވަރަށް ގިނަ ގޮތްގޮތުން ވިސްނާފައި ކަމަށް ކާފް އިން ވަނީ ބުނެފަ އެވެ.
މި ފަހަރުގެ ވެފްކޮން އަކީ އަންނަ އަހަރު ބްރެޒިލްގައި ބާއްވާ ފީފާ ވިމެންސް ވޯލްޑް ކަޕްގެ ކޮލިފައިންއާ އެއްކޮށް ކުރިއަށްދާ މުބާރާތެކެެވެ. މުބާރާތް ފަސްކުރަން ކާފް އިން ނިންމީ މުބާރާތް ބާއްވާ ހޯސްޓް މޮރޮކޯގައި ހުރި ކަންބޮޑުވާން ޖެހޭ ކަންތައްތަކެއްގެ ސަބަބުންނެވެ.
އެ ގޮތުން، ދާދި ފަހުން، މޮރޮކޯގައި ހޯސްޓްކުރި އެފްރިކަން ކަޕްގެ ފައިނަލުގައި މޮރޮކޯ އާއި ސެނެގާލް ކުޅުނު މެޗުގައި ހިނގައިދިޔަ ކަންތައްތަކަށް ފަހު، މޮރޮކޯގައި މުބާރާތް ހޯސްޓްކުރުމާ މެދު ކާފް އިން ވަނީ ގިނަ ކަންތައްތަކަކަށް ސަމާލުކަން ދޭން ނިންމައިފަ އެވެ.
ކާފް އިން މިހާރު ނިންމާފައި އޮތީ ޖުލައި 25 އިން އޮގަސްޓް 16 އަށް ވެފްކޮން ކުޅޭ ގޮތަށެވެ. އެ މުއްދަތުގައި މުބާރާތް ބާއްވާއިރު، މުބާރާތް ބާއްވާ ގައުމު ބަދަލުކުރާނެތޯ އުފެދިފައިވާ ސުވާލަށް ކާފް އިން ސީދާ ޖަވާބެއް ނުދެ އެވެ.
