ނިއު ޔޯކް، ޔުނައިޓެޑް ސްޓޭޓްސް (އޮގަސްޓް 24) - މެކްސިކޯގައި 1986 ވަނަ އަހަރު ބޭއްވި ފީފާ ވޯލްޑް ކަޕްގެ ކުއާޓާ ފައިނަލުގައި އިންގްލެންޑް ކޮޅަށް އާޖެންޓީނާގެ ލެޖެންޑް، ޑިއޭގޯ މަރަޑޯނާ އަތުން ބޯޅަ ގޯލަށް ވައްދާލައި ކާމިޔާބުކުރި ގޯލު ޖެހި ބޯޅަ 3.3 މިލިއަން ޑޮލަަރަށް ނީލަމުގައި ވިއްކާލައިފި އެވެ.
އެ މެޗުގެ ރެފްރީ އަކަށް ހުރި ޓިއުނީޝިއާގެ ބިން ނާސިރު، އޭރިއާގެ ކުޑަތަންކޮޅެއް ބޭރުގައި ހުރިއިރު، އޭނާ އަށް މަރަޑޯނާ އަތުގައި ޖެހިފައި އިނގިރޭސި ކީޕަރު ޕީޓަ ޝިލްޓަން ކައިރިން ގޯލަށް ބޯޅަ ވަން މަންޒަރު ނުފެނެ އެވެ. އެހެންވެ، ބިން ނާސިރު ނިންމީ އެއީ ގޯލެއް ކަމަށެވެ.
"ހޭންޑް އޮފް ގޯޑް" ގެ ނަމުން މަޝްހޫރުކޮށްފައިވާ އެ ގޯލުގެ ވާހަަކަ ގިނަ އަހަރުތަކެއް ވަންދެން ދެކެވެމުން އަންނައިރު، އެ ގޯލު ޖެހި ބޯޅަ މެޗަށް ފަހު ލިބުނީ ބިން ނާސިރު އަށެވެ. މެޗަށް ފަހު، އެ ބޯޅަ ހިފައިގެން ބިން ނާސިރު ގާތަށް އައީ ވެސް މަރަޑޯނާ އެވެ. ބިން ނާސިރު ވަނީ، 36 އަހަރު ވަންދެން އޭނާ އަތުގައި އެ ބޯޅަ ބާއްވައިފަ އެވެ.
އެކަމަކު، އޭނާގެ މާލީ ހާލަތު ހުރި ގޮތުންނާއި ތަފާތު އެކި އަމިއްލަ ސަބަބުތަކާ ހުރެ، ބިން ނާސިރު ވަނީ، 2022 ވަނަ އަހަރު ނީލަމެއްގައި އެ ބޯޅަ ވިއްކާލައިފަ އެވެ. އެ ބޯޅަ ވިއްކާލެވުނު އަގަކީ، 2.4 މިލިއަން ޑޮލަރަށެވެ. މިއީ، މިހާތަނަށް ފުޓްބޯޅައިގެ ބޯޅައެއް ވިކުނު އެންމެ އަގުބޮޑު ނީލަމެވެ.
އެ ބޯޅަ އަލުން ނީލަމަށް ނެރުމަށް ފަހު، މިދިޔަ ހޮނިހިރު ދުވަހު، ހެރިޓޭޖް އޯކްޝަންގައި، އެ ބޯޅަ ވިއްކާލީ 3.3 މިލިއަން ޑޮލަރަށެވެ. އެ ބޯޅަ ވިއްކާލެވޭނެ ކަމަށް ނީލަމުގައި އެސްޓިމޭޓްކޮށްފައިވާ އަގަކީ، 10 މިލިއަން ޑޮލަރެެވެ.
އިންގްލެންޑާ ދެކޮޅަށް ކުޅުނު މެޗުގައި މަރަޑޯނާ ބޭނުންކުރި ޖޯޒީ ވެސް ވަނީ މީގެ ކުރިން ނީލަމުގައި ވިއްކާލައިފަ އެވެ. އެ މެޗަށް ފަހު، މަރަޑޯނާގެ ޖޯޒީ ލިބުނީ، އިންގްލެންޑްގެ ކުރީގެ މިޑްފީލްޑަރު، ސްޓީވް ހޮޖް އަށެވެ. އޭނާ ވަނީ، 2020 ވަނަ އަހަރު މަރަޑޯނާ މަރުވުމާ އެކު، އެ ޖޯޒީ އެއްވެސް އަގެއްގައި ނުވިއްކާނެ ކަމަށް އިއުލާނުކޮށްފަ އެވެ. އެހެން ނަމަވެސް، ތަކުރާރުކޮށް އެކި ފަރާތްތަކުން އޭނާ އަށް ޕްރޮޕޯސަލްތައް ލިބެން ފެށުމާ ގުޅިގެން، 2022 ވަނަ އަހަރު އޭނާ ވަނީ، 8 މިލިއަން ޑޮލަރަށް އެ ޖޯޒީ ވިއްކާލައިފަ އެވެ.
