ގެއްލިގެން ހޯދަމުންދިޔަ ބޯއިންގް މަރުކާގެ ކާގޯ ބޯޓުގެ ބައިތައް މިހާރު ފެނިފައިވާ ކަމަށް ޕާކިސްތާނުގެ އެއާޕޯޓްސް އޮތޯރިޓީން ބުނެފި އެވެ.
ނަމަވެސް އެ ބޯޓު ވެއްޓުނުއިރު އޭގައި ތިބި ފަސް ފަޅުވެރިން ހޯދުމުގެ މަސައްކަތް ރެސްކިއު ޓީމުތަކުން އަދިވެސް ކުރަމުންދާ ކަމަށް އެ އިދާރާއިން ބުންޏެވެ.
ޕާކިސްތާން އެއާޕޯޓްސް އޮތޯރިޓީ (ޕީއޭއޭ) އިން މައުލޫމާތު ދޭ ގޮތުގައި، ޔުނައިޓެޑް އެރަބް އެމިރޭޓްސްގެ ޝާރްޖާ އިން ފުރައިގެން ކަރާޗީއަށް ދަތުރުކުރި މި ބޯޓުގެ "ނެވިގޭޝަން ސިސްޓަމަށް މައްސަލައެއް ދިމާވެފައިވާ" ކަމަށް ރިޕޯޓުކުރުމަށް ފަހު، އަންގާރަ ދުވަހުގެ އިރުއޮއްސުނު ވަގުތު ބޯޓު ވަރަށް ބާރަށް ތިރިއަށް ފައިބަމުންދާކަން ރޭޑާރުން ވަނީ ދައްކާފަ އެވެ.
ބޯޓު ހޯދުމަށް 12 ގަޑިއިރު ވަންދެން ކުރި މަސައްކަތަށް ފަހު، ރޭގެ ވަގުތެއްގައި ގެއްލުނު ކޭ2 އެއާވޭސްގެ ބީ737 މަރުކާގެ ކާގޯ ބޯޓުގެ ބައިތައް ޕާކިސްތާނުގެ ނޭވީ އާއި މެރިޓައިމް ރެސްކިއު އެޖެންސީން ހޯދާފައިވާ ކަމަށް ޕީއޭއޭ އިން އެކްސްގައި އާންމުކުރި ބަޔާނެއްގައި ބުނެފައިވެ އެވެ.
މި ބޯޓުގެ ބައިތައް ފެނިފައިވަނީ ޕާކިސްތާނުގެ ދެކުނު އައްސޭރިފަށުގެ ރަށެއް ކަމަށްވާ އޮރްމާރާ ކައިރިން އަރަބި ކަނޑުގެ ތެރެއިން ކަމަށް އެ އިދާރާއިން ބުނެ އެވެ.
ކޭ2 އެއާވޭސް އަކީ ޕާކިސްތާނުގެ އެތެރޭގެ އުދުހުންތަކާއި ބައިނަލްއަގުވާމީ ދަތުރުތައް ކުރާ އަމިއްލަ ކާގޯ އެއާލައިނެކެވެ. އެއާފްލީޓްސް ޑޮޓް ނެޓްގެ ރެކޯޑްތަކުން ދައްކާ ގޮތުގައި، 1999 ވަނަ އަހަރު އުފެއްދި މި ބޯޓަކީ ކުރިން އެއިރޯފްލޮޓް އަދި ގަރޫޑާ އިންޑޮނީޝިއާގައި ފަސިންޖަރުން އުފުލުމަށް ބޭނުންކުރި ބޯޓެކެވެ. މި ބޯޓު ކާގޯ ބޯޓަކަށް ބަދަލުކުރީ 2012 ވަނަ އަހަރުގަ އެވެ.
ޕާކިސްތާނުގެ އޭވިއޭޝަން ދާއިރާއަކީ ފާއިތުވި ދިހަވަރަކަށް އަހަރު ތެރޭގައި ނުރައްކާތެރި އެތައް ހާދިސާތަކެއް ހިނގާފައިވާ ދާއިރާއެކެވެ. މީގެ ތެރޭގައި ކަރާޗީއަށް ވެއްޓުނު ބޯޓުތައް ވެސް ހިމެނެ އެވެ. ސަލާމަތީ ކަންކަމާއި ޕައިލެޓުންގެ ލައިސަންސްގެ މައްސަލަތަކާ ގުޅިގެން ޔޫރަޕިއަން ޔޫނިއަން (އީޔޫ) އިން ޕާކިސްތާނުގެ ގައުމީ އެއާލައިން އެ ސަރަހައްދުގައި އުދުހުން ހަތަރު އަހަރަށް މަނާކުރި ނަމަވެސް، 2024 ވަނަ އަހަރު އެ މަނާކުރުން ވަނީ އުވާލާފަ އެވެ.
