އީރާނާ ދެކޮޅަށް ފެށި ހަނގުރާމަ ނިމުމަކަށް ގެނައުމަށް ސޮއިކޮށްފައިވާ ފަހުމުނާމާ (އެމްއޯޔޫ) މިހާރު "އުވާލެވިފައިވާ" ކަމަށާއި، އެ ގައުމާއެކު އިތުރު މަޝްވަރާތަކެއް ކުރިއަށް ގެންދިއުމުގެ އެއްވެސް ޝައުގުވެރިކަމެއް ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޕާކިސްތާނުން މެދުވެރިއެއްގެ ދައުރު އަދާކޮށްގެން އެކުލަވާލި ހަނގުރާމަ ހުއްޓާލުމުގެ ވަގުތީ އެއްބަސްވުމުގެ މަގުސަދަކީ، ދާއިމީ ހައްލަކަށް ވާސިލްވުމަށްޓަކައި 60 ދުވަހުގެ މުއްދަތަކަށް މަޝްވަރާތައް ކުރިއަށް ގެންދިއުމެވެ. ނަމަވެސް ގަތަރުގައި ކުރިއަށްދިޔަ ނުސީދާ ވާހަކަތައް އެއްވެސް ނަތީޖާއެއް ނުނިކުމެ ނިމުމަކަށް އައިސްފައިވާއިރު، އަންގާރަ ދުވަހު އެމެރިކާއިން ވަނީ އަލުން އީރާނަށް ހަމަލާތައް ދޭން ފަށާފަ އެވެ.
ތުރުކީގެ އަންކާރާގައި ނޭޓޯ ސަމިޓުގެ ކުރިން ވާހަކަދައްކަވަމުން ޓްރަމްޕް ވިދާޅުވީ، އޭނާއަށް ގަބޫލުކުރެވޭ ގޮތުގައި އެ އެއްބަސްވުން މިހާރު ނިމިއްޖެ ކަމަށެވެ. އަދި އީރާނުގެ ލީޑަޝިޕަށް ފާޑުވިދާޅުވަމުން ޓްރަމްޕް ވިދާޅުވީ އެ ގައުމާއެކު އެއްވެސް މުއާމަލާތެއް ކުރަން ބޭނުން ނުވާ ކަމަށެވެ.
ހޮރްމޫޒް ކަނޑުއޮޅިން ދަތުރުކުރި ތިން ތެޔޮ ޓޭންކަރަކަށް ހަމަލާދިނުމާ ގުޅިގެން، އީރާނުން ސާފުނުކުރާ ތެލާއި ޕެޓްރޯކެމިކަލް އަދި ޕެޓްރޯލިއަމްގެ އުފެއްދުންތައް ވިއްކުމަށް އެމެރިކާއިން ދޫކޮށްފައިވާ ހުއްދަވެސް މިހާރު ވަނީ ބާތިލްކޮށްފަ އެވެ.
