އޭޝިއަން ކްރިކެޓް ކައުންސިލްގެ އެސޯސިއޭޓް ޑިރެކްޓަރަކަށް ރާއްޖޭގެ ކްރިކެޓް ރައީސް ފައިސަލް

އޭޝިއަން ކްރިކެޓް ކައުންސިލް (އޭސީސީ)ގެ އެސޯސިއޭޓް ޑިރެކްޓަރުގެ މަގާމަށް އިތުރު ދައުރަކަށް ކްރިކެޓް ބޯޑް އޮފް މޯޯލްޑިވްސް (ސީބީއެމް)ގެ ރައީސް، މުހައްމަދު ފައިސަލް އިންތިހާބުވެއްޖެ އެވެ. 

މި މަގާމަށް އެންމެ ފުރަތަމަ 2022 ވަނަ އަހަރު އިންތިހާބުވި ފައިސަލް އިތުރު ދައުރެއް ކާމިޔާބުކުރެއްވީ، ދާދި ފަހުން ތައިލެންޑްގެ ވެރިރަށް ބެންކޮކްގައި ކުރިއަށްދިޔަ އޭޝިއަން ކްރިކެޓް ކައުންސިލްގެ އެނުއަލް ޖެނެރަލް މީޓިން (އޭޖީއެމް)ގަ އެވެ. އިތުރު ދައުރެއް ކާމިޔާބުކުރެއްވި ފައިސަލް އަށް އަނެއްކާ ވެސް ހަތަރު އަހަރު އެ މަގާމުގައި އޭޝިއާގެ ކްރިކެޓަށް ހިދުމަތް ކުރުމުގެ ފުރުސަތު ލިބިގެންދިޔައީ އެވެ. 

ކްރިކެޓް ބޯޑް އޮފް މޯލްޑިވްސް (ސީބީއެމް) އިން ބުނީ، މި މަގާމުގައި އިތުރު ދައުރެއް ފައިސަލް ލިބުމުގެ ފަހަތުގައި އޮތީ އޭޝިއާ ސަރަހައްދުގެ ކްރިކެޓްގެ ޑިވެލޮޕްމަންޓަށް ޓަކައި އޭނާ ކޮށްފައިވާ މަސައްކަަތް ކަމަށެވެ. 

ފައިސަލް އަންނަނީ، އިންޓަނޭޝަނަލް ކްރިކެޓް ކައުންސިލް (އައިސީސީ)ގެ މުހިންމު މަގާމެއް ވެސް ފުރުއްވަމުންނެވެ. އޭޝިއާ ސަރަހައްދުގެ ނޮން-އެލިޖިބަލް ގައުމުުތައް ތަމްސީލްކުރާނެ ފަރާތަކަށް ފައިސަލް އިންތިހާބުވެ، މިހާރު އެ މަގާމުގައި ފުރުއްްވަމުން އަންނަނީ ތިން ވަނަ ދައުރެވެ. 

ފައިސަލް، އެންމެ ފުރަތަމަ 2020 ވަނަ އަހަރުގެ ސެޕްޓެމްބަރު މަހު، ކްރިކެޓް ބޯޑުގެ ރައީސްކަމަށް އިންތިހާބުވީ ގިނިކަންޏާ ވާދަކުރައްވަ އެވެ. އެކަމަކު، މީގެ ދެ އަހަރު ކުރިން، ކްރިކެޓް ބޯޑުގެ އިންތިހާބުގައި ފައިސަލް، އިތުރު ދައުރެއް ކާމިޔާބު ކުރެއްވީ، ކްރިކެޓްގެ އިސް ހިދުމަތްތެރިއެއް ކަމަށްވާ ފަރުހަތު ޖަލީލްއާ ވާދަކުރައްވައިގެންނެވެ. އެ ގޮތުން، އިންތިހާބުގައި 17 ފަރާތަކުން ވޯޓު ލާފައިވެ އެވެ. އެއީ، 16 ކްލަބެއްގެ އިތުރުން، ސްކޫލް ތަމްސީލްކުރާ ފަރާތެއްގެ ގޮތުގައި، ދަރުމަވަންތަ ސްކޫލް އެވެ. އެ ގޮތުން، ފައިސަލް އަށް ވަނީ 10 ވޯޓު ލިބިފަ އެވެ. އަދި ފަރުހަތަށް ލިބިފައިވަނީ، ހަތް ވޯޓެވެ.

ކުރިން ކްރިކެޓާއި ވޮލީބޯޅަ ވެސް ކުޅުއްވި، ފައިސަލް، ކްރިކެޓް ބޯޑުގެ ޖެނެރަލް ސެކްރެޓަރީގެ މަގާމު ވެސް ފުރުއްވި އެވެ. އެ ގޮތުން، ކްރިކެޓް ބޯޑުގެ ޖެނެރަލް ސެކްރެޓަރީކަން 2011 ވަނަ އަހަރު ކުރެއްވި ފައިސަލް ނައިބް ރައީސަކަށް ހުންނެވީ 2012 އިން 2016 އަށެވެ. ފޮރިން މިނިސްޓްރީގައި އިސް މަގާމުތަކުގެ ޒިންމާ އަދާ ކުރައްވަމުން ވެސް ރާއްޖެ އަށް ކުޅިވަރުގެ ކަންކަމުގައި ފުރުސަތު ހޯދައިދޭން، ފައިސަލް ވަނީ މަސައްކަތް ކުރައްވައިފަ އެވެ.