ފާއިތުވި އަހަރަކީ ރާއްޖޭގެ ކްރިކެޓްގެ ހަރަކާތްތެރި އަހަރެއް ކަމަށާއި މައިގަނޑު ސަބަބަކީ ކްރިކެޓް ބޯޑް އޮފް މޯލްޑިވްސް (ސީބީއެމް) އިން އެކި ގޮތްގޮތުން ކޮށްފައިވާ މަސައްކަތްތައް ކަމަށް ރާއްޖޭގެ ކްރިކެޓް އެސޯސިއޭޝަނުގެ ރައީސް މުހައްމަދު ފައިސަލް ވިދާޅުވެއްޖެ އެވެ.
ފައިސަލް މިހެން ވިދާޅުވީ، ސީބީއެމްގެ އަށް ފުލް މެމްބަރު ކްލަބާއި އެސޯސިއޭޓް ރެޕްރެޒެންޓޭޓިވްއާ އެކު، ދާދި ފަހުން ކުރިއަށްދިޔަ އަހަރީ އާންމު ޖަލްސާގަ އެވެ.
ފައިސަލް ވިދާޅުވީ، މިދިޔަ އަހަރު ރާއްޖޭގައި ކްރިކެޓް ކުޅޭ ތިން ސަރަހައްދުގައި 40 މުބާރާތައްވުރެ ގިނައިން ބޭއްވިފައިވާ ކަމަށެވެ.
ކްރިކެޓް ބޯޑުގެ މައިގަނޑު މަސައްކަތަކީ ޖޫނިއާ ޔޫތު ޑިވެލޮޕްމަންޓް ޕްރޮގްރާމް (ވައިޑީޕީ) ކަމަށާއި، ކްރިކެޓް ކުޅޭ އާ ކުޅުންތެރިން އުފެއްދުން ކަމަށްވާއިރު، ފާއިތުވި އަހަރުތަކުގައި ކުރެވުނު މަސައްކަތުން 16 އަހަރާއި، 19 އަހަރުން ދަށުގެ އުމުރުފުރާ ޓީމުތައް އެކުލަވާލެވުނުކަަމަށެވެ.
މިދިޔަ އަހަރު 16 އަހަރާއި 19 އަހަރުން ދަށުގެ ގައުމީ ކްރިކެޓް ޓީމު ވެސް ރާއްޖޭންބޭރުގައި ބޭއްވުނު މުބާރާތްތަކުގައި ބައިވެރިކޮށް ތަޖުރިބާ ލިބި މުސްތަގުބަލަށް މުހިންމު މަސައްކަތްތަކެއް ކުރެވުނު ކަމަށް ފައިސަލް ވިދާޅުވި އެވެ. އަދި، މިހާރު ހިނގަމުންދާ އަހަރު ވެސް އެ މަސައްކަތް މެދުކެނޑުމެއްނެތި ކުރިއަށްގެންދިއުމަކީ ސީބީއެމްގެ އަމާޒެވެ.
އަންނަ އަހަރު ބާއްވާ ކްރިކެޓްގެ ގައުމީ އަންހެން ޗެމްޕިއަންޝިޕަށް ކުޅުންތެރިން ތައްޔާރުކުރުމާއ، ގައުމީ ޓީމުގެ ކުޅުންތެރިންގެ ފެންވަރު މަތި ކުރުމަށް ހާއްސަ މަސައްކަތްތަކެއް ކުރުމަށް ހަމަޖެހިފައިވާކަމަށް ވެސް ފައިސަލް ވަނީ ވިދާޅުވެފަ އެވެ.
ދާދިފަހުން ގައުމީ ކްރިކެޓް ޓީމަށް ގެނައި އަފްގާނިސްތާންގެ ތަޖްރިބާ ކާރު ކޯޗު، އަސަދުﷲ ހާން (އަސަދު) ގެނެސް ދުރުރާސްތާ ވިސްނުމުގައި ވެސް މަސައްކަތްތަކެއް ވަނީ ފަށައިފަ އެވެ.
މީގެ އިތުރުން، ކްރިކެޓް ވަސީލަތްތައް ތަރައްގީކުރުމަށް ރޭވިފައިވާ ކަންކަމަށް ބަލާއިރު، ޕެވިލިއަންގައި ޤާއިމުކުރަމުންދާ ރިކަވަރީ ރޫމަކީ މުހިންމު ކަމެއްގެ ގޮތުގައި ސީބީއެމް އިން ފާހަގަކޮށްފައިވެ އެވެ.
ފައިސަލް ވިދާޅުވީ، ކްލަބްތައް އިތުރަށް ހަރަކާތްތެރިވުމަށާއި، ބޯޑުގެ ޖަލްސާތަކުގައި ކްލަބްތަކުން ބައިވެރިވުމުގެ މުޙިންމު ކަމަށެވެ އަދި، ކްރިކެޓް ކުރިއެރުވުމަށާއި ކުޅުންތެރިން އުފައްދައި ކުޅުންތެރިންގެ ހުނަރު އިތުރުކުރުމުގައި ކްލަބްތަކުގެ ރޯލު މިހާރަށް ވުރެން ފުޅާކުރުމަށް އިލްތިމާސްކޮށް މިކަމުގައި ކްރިކެޓް ބޯޑުން ދެވެން އޮތް އެހީތެރިކަން އަބަދުވެސް ދޭނެ ކަމުގެ ޔަގީންކަން ފައިސަލް ވަނީ ދެއްވައިފަ އެވެ.
މި ޖަލްސާގައި ވަނީ ކްރިކެޓް ބޯޑުގެ ހިންގާ ޤަވާއިދުގެ 16 ވަނަ މާއްދާގައިވާ ގޮތުގެ މަތިން އަނަކީ ސްޕޯޓްސް ކްލަބަށް ސީ.ބީ.އެމް ގެ އެސޯސިއޭޓް މެންބަރުކަން ދިނުމަށް ފާސްކޮށްފަ އެވެ. އަނަކީ ވަނީ ދާދި ފަހުން ބޭއްވި ޓީ20 ޗެމްޕިއަންޝިޕްގެ ތަށި ހޯދައިފަ އެވެ.
