ރާއްޖޭގެ ގައުމީ ކްރިކެޓް ޓީމުގެ ކޯޗަކަށް އަފްގާނިސްތާންގެ ތަޖުރިބާކާރެއް ކަމަށްވާ އަސަދުﷲ ހާން (އަސަދު) ހަމަޖައްސަން، ކްރިކެޓް ބޯޑް އޮފް މޯލްޑިވްސް (ސީބީއެމް) އިން ނިންމީ މައިގަނޑު ގިނަ ޓާގެޓްތަކަކާ އެކުގަ އެވެ.
އިންޓަނޭޝަނަލް ކްރިކެޓް ކައުންސިލް (އައިސީސީ)ގެ ލެވަލް ތިނެއް ހާސިލްކޮށްފައިވާ އަސަދު ވަނީ މީގެ ކުރިން އަފްގާނިސްތާން ގައުމީ ޓީމަށް ކުޅެފަ އެވެ. އެއީ، 2003 އިން 2012 ވަނަ އަހަރާ ހަމަށެވެ. އޭގެ ފަހުން، ކޯޗިން އަށް ނިކުމެ، އަސަދު ވަނީ އަފްގާނިސްތާންގެ 19 އަހަރުން ދަށުގެ ޓީމުގެ ކޯޗަކަށް 2009 އިން 2012 ވަނަ އަހަރާ ހަމައަށް މަސައްކަތްކޮށްފަ އެވެ. އޭގެ ފަހުން، އަފްގާނިސްތާންގެ ސީނިއާ ކްރިކެޓް ޓީމުގެ އެސިސްޓަންޓް ކޯޗަކަށް މަސައްކަތްކުރިއިރު، ޕާފޯމަންސް އެނަލިސްޓެއްގެ ޒިންމާ ވެސް އަދާކުރަމުންދިޔައީ، 2014 އިން 2018 އާ ހަމައަށެވެ. އައިސީސީގެ ލެވަލް 2 ކޯޗިން އެޑިއުކޭޓަރެއްގެ ފާސް ވެސް އޮތް އަސަދު ވަނީ 2009 އިން 2014 އަށް އަފްގާނިސްތާންގެ 16 އާއި 19 އަހަރުން ދަށުގެ ކްރިކެޓް ޓީމުގެ ހެޑް ކޯޗެއްގެ ގޮތުގައި އެކި ލެވަލްގައި މަސައްކަތްކޮށްފަ އެވެ.
ގައުމީ ކްރިކެޓް ޓީމުގެ ކޯޗަކަށް އަފްގާނިސްތާންގެ އަސަދުﷲ
ދިވެހިރާއްޖޭގެ ގައުމީ ކްރިކެޓް ޓީމުގެ ހެޑް ކޯޗަކަށް، އަފްގާނިސްތާންގެ ތަޖުރިބާކާރު ކޯޗު އަސަދުﷲ ހާން (އަސަދު) ހަމަޖައްސައިފި. އޭނާއަކީ އަފްގާނިސްތާނާއި ގަތަރުގެ ގައުމީ ޓީމުތަކުގެ އިތުރުން ކެނަޑާގެ ޓީމަށްވެސް އިރުޝާދުދީ، ކްރިކެޓްގެ އިދާރީ ދާއިރާގައި ގިނަ މަސައްކަތްތަކެއް ކޮށްފައިވާ ފަރާތެއް.
ކުޅުމުގެ ކެރިއަރެއް ބިނާކުރުމުގެ އިތުރުން، އަސަދު އަންނަނީ، ކްރިކެޓްގައި ކުޅުންތެރިންނާއި ކޯޗުން އަދި ޓެކްނިކަލް އޮފިޝަލުން ޑިވެލޮޕްކުރުމުގައި މުހިންމު މަސައްކަތްތަކެއް ކުރަމުންނެވެ. އެކަމުގައި، އޭނާ އަށް ގިނަ ގައުމުތަކަކުން ތަޖުރިބާ ވެސް ލިބިފައިވެ އެވެ.
"އަދަދު ސްޕޯޓްސް" އަށް ކްރިކެޓް ބޯޑްގެ ރައީސް، މުހައްމަދު ފައިސަލް ވިދާޅުވީ، އެންމެ ބޮޑު ޓާގެޓެއްގެ ގޮތުގައި މަސައްކަތްކުރާނެ އެއް ކަމަކީ، ކޯޗު އަސަދުގެ އެހީތެރިކަމާ އެކު، މިހާރު އޮތް 19 އަހަރުން ދަށުގެ ގައުމީ ޓީމާ އެލީޓް ކުޅުންތެރިން، 2030 އާއި އޭގެ ފަހަށް ވަރުގަދަ ޓީމެއްގެ ގޮތުގައި ތައްޔާރު ކުރުން ކަމަށެވެ.
"ގައުމީ ކޯޗު (އަސަދު) ވާނީ މި ޓީމު ބިނާކުރުމުގައި އޮވައޯލް ޓްރެއިނިން އާއި ޑިވެލޮޕްމަންޓްގެ އެންމެ އިސް ފަރާތަށް،" ފައިސަލް ވިދާޅުވި އެވެ.
އައިސީސީގެ ހައި ޕާފޯމަންސް ޕްރޮގްރާމްގައި 2014، 2105 އަދި 2016 ވަނަ އަހަރު ބައިވެރިވެ، ކްރިކެޓްގެ އެޑްމިނިސްޓްރޭޓިވް ކަންކަމުގައި. ވެސް އިސް މަސައްކަތްތަކެއްކޮށްފައިވާ އަސަދު ވަނީ އަފްގާނިސްތާންގެ ކްރިކެޓް ބޯޑްގައި ޗީފް އޮޕަރޭޓިން އޮފިސަރު (ސީއީއޯ)ގެ ޒިންމާ އަދާކޮށް މަސައްކަތްތަކެއް ކޮށްފަ އެވެ. ކެނަޑާ ކްރިކެޓް ޓީމުގެ ހައި ޕާފޯމަންސް ޑިރެކްޓަރުގެ ޒިންމާއާ އެކު، ހެޑް ކޯޗަކަށް ވެސް 2019 އާއި 2020 ވަނަ އަހަރު ހުރި އަސަދު 2021 ވަނަ އަހަރު މަސައްކަތްކުރީ އަފްގާނިސްތާން ކްރިކެޓް ބޯޑުގެ ޑިރެކްޓަރާއި ޗީފް ސެލެކްޓަރުގެ މަގާމުގަ އެވެ. އޭގެ ފަހުން، 2021 އިން 2023 އަށް ގަަތަރު ކްރިކެޓް ޓީމުގެ ހެޑް ކޯޗަކަށް ހުރި އަސަދު އެންމެ ފަހުން، މަސައްކަތްކުރީ، ކްރިކެޓް ފެޑެރޭޝަން އޮފް އުޒްބެކިސްތާންގެ ޑިރެކްޓަރަކަށެވެ.
ފައިސަލް ވިދާޅުވީ، ކޯޗު އަސަދުގެ ބެލުމުގެ ދަށުން ރާއްޖޭގެ ކްރިކެޓް ޓީމު ކުރިއަށްދާނެ ފިލޯސަފީއެއް ބައްޓަންކުރުމުގެ އިތުރުން، ހައި ޕާފޯމަންސް ޓީމެއްގެ ގޮތުގައި ކުރިއަށް ދިއުމުގެ ސަގާފަތެއް އަށަގެންނެވުމަކީ ވެސް ޕްލޭނުގެ ބައެއް ކަމަށެވެ.
މި ކަންކަން ހާސިލްކުރުމަށްޓަކައި، ސީބީއެމް އިން ވަަނީ ޕްލޭންތަކެއް ވެސް ހަދައިފަ އެެވެ.
އޭގެ ތެރޭގައި ހިމެނޭ އެއް ކަމަކީ، ފުވައްމުލަކާއި ކުނަހަންދޫ ފަދަ ކްރިކެޓްގެ އެކި ހަރަކާތްތައް ހިންގަމުން އަންނަ ރީޖަންތަކުގައި މަސައްކަތްކުރާ ސްޓާފުންނާއި ކޯޗުންނާ އެކު، ގައުމީ ކޯޗު އަސަދު އަށް މަސައްކަތްކުރެވޭނެ ގޮތްތަކެއް އެކުލަވާލައި، ގައުމީ ޓީމަށް ހުނަރުވެރި ކުޅުންތެރިން އިތުރު ކުރުމެވެ. އޭގެ އިތުރުން، ރާއްޖޭގެ ކްރިކެޓް ކޯޗުންނަށް ބޭނުންވާނެ ޕްރެކްޓިކަލް ކޯޗިން ސަޕޯޓާއި އެޑިއުކޭޝަން ފޯރުކޮށްދިނުމާއި ކޯޗިން ކޯސްތައް ހިންގުމާއި ގަވާއިދުން މި ކަންކަމާ ގުޅޭ ޕާފޯމަންސް ރިޕޯޓް ކްރިކެޓް ބޯޑަށް ހުށަހެޅުން ހިމެނެ އެވެ.
އިންޑިވިޖުއަލް ކުޅުންތެރިންނާއި ގައުމީ ޓީމުގެ ކުޅުންތެރިން އަދި އެލީޓް ކުޅުންތެރިންނާ ގުޅޭ ކަންކަން ގަވާއިދުން ރިޕޯޓް ކުރުމާއި ގައުމީ ސިލެކްޝަން ކޮމިޓީ އަށް ކުޅުންތެރިން ހޮވުމުގެ ކަންކަންކުރުމުގައި އެކި ގޮތްގޮތުން ސަޕޯޓް ދިނުން ވެސް ކޯޗު އަސަދުގެ ޒިންމާތަކުގެ ތެރޭގައި ހިމެނެ އެވެ. ގައުމީ ޓީމުތައް، 16 އަހަރުން ދަށް، 19 އަހަރުން ދަށް އަދި ސީނިއާ އަންހެން އަދި ފިރިހެން ޓީމު ހޮވުމުގައި، ކޯޗު އަސަދުގެ ލަފާ ވަރަށް ބޮޑަށް ހޯދާނެ އެވެ.
ރާއްޖޭގެ ކްރިކެޓް ޓީމުގެ ކޯޗަކަށް އެންމެ ފަހުން، ބިދޭސީ ކޯޗަކަށް މަސައްކަތްކުރީ، ސްރީލަންކާގެ ޕަސިންދު ލިޔަނާރަޗީ އެވެ. އޭނާ މީގެ ދޮޅު އަހަރު ކުރިން އެ މަގާމުން ވަކިވީ ކޮންޓްރެކްޓް ހަމަވުމުންނެވެ.
