އިންޑޮނޭޝިއާގައި 250 މީހުންނާއެކު ދަތުރުކުރި ފެރީއެއްގައި އަލިފާން ރޯވުމުގެ ސަބަބުން ފަސް މީހަކު މަރުވެ، 41 މީހަކު ގެއްލިފައިވާ ކަމަށް އެ ގައުމުގެ އޮފިޝަލުން ބުނެފި އެވެ.
އިންޑޮނޭޝިއާގެ ނޭޝަނަލް ސާޗް އެންޑް ރެސްކިއު އެޖެންސީ (ބަސަރްނާސް) އިން މައުލޫމާތު ދޭ ގޮތުގައި، މަދޫރާ އައިލެންޑް ކައިރިން މި ހާދިސާ ހިނގާފައިވަނީ އެ ގައުމުގެ ދެވަނައަށް އެންމެ ބޮޑު ސިޓީ ކަމަށްވާ އީސްޓް ޖާވާގެ ސުރަބާޔާ އިން ސައުތު ސުލަވެސީގެ މަކަސާރަށް އެ ފެރީ ދަތުރުކުރަނިކޮށެވެ. މި ހާދިސާގެ ރިޕޯޓް އެންމެ ފުރަތަމަ ކޮށްފައިވަނީ އެ އުޅަނދުގެ ކެޕްޓަނެވެ.
އިންޑޮނޭޝިއާގެ "އައިނިއުސް" އިން އާންމުކޮށްފައިވާ ވީޑިއޯތަކުން ފެންނަ ގޮތުގައި، ގިނަ އަދަދެއްގެ ބަޔަކު ލައިފް ޖެކެޓް އަޅައިގެން ކުޑަ ސަލާމަތީ ބޯޓެއްގައި ތިއްބެވެ.
އެހެން ބައެއް ވީޑިއޯ ކްލިޕްތަކުން ފެންނަ ގޮތުގައި، ފެރީގެ މަތީބައިން ބޮޑެތި އަލިފާންގަނޑުތަކާއި ދުންތައް އަރަމުންދާއިރު، މީހުންތައް ފެރީން ތިރިއަށް ފައިބަމުންދެ އެވެ.
ބަސަރްނާސްގެ ޓިކްޓޮކް އެކައުންޓުގައި އާންމުކޮށްފައިވާ ވީޑިއޯއަކާއެކު ނެރުނު ބަޔާނެއްގައި ބުނެފައިވަނީ، "ކޭއެމްޕީ މުތިއާރާ ސެންޓޯސާ 2" ނަމަކަށް ކިޔާ މި ފެރީގައި އަލިފާން ރޯވިކަމުގެ މައުލޫމާތު ސުރަބާޔާގެ ސާޗް އެންޑް ރެސްކިއު އޮފީހަށް ލިބިފައިވަނީ އެ ގައުމުގެ ގަޑިން ހެނދުނު 08:24 ގަ އެވެ.
އެ ބަޔާނުގައި އިތުރަށް ބުނެފައިވަނީ، ފެރީ އޮޕަރޭޓްކުރާ ކުންފުނިން ލިބުނު މައުލޫމާތަށް ބަލާއިރު، އަލިފާނުގެ ހާދިސާ ހިނގާފައިވަނީ ހެނދުނު 06:00 އާއި 07:00 އާ ދެމެދުގެ ވަގުތެއްގަ އެވެ.
ފަހުން ބަސަރްނާސް އިން ކަށަވަރުކޮށްދިން ގޮތުގައި، މުޅި ފެރީގައި ހެން ވަނީ އަލިފާން ހިފާފަ އެވެ. އަދި ސަލާމަތްކުރާނެ ފަރާތްތަކެއް އަންނަންދެން ފަސިންޖަރުން ތިބީ ފެރީގެ ބްރިޖާއި އުޅަނދުގެ ކުރީކޮޅުގައި އެލިގެންނެވެ.
މި ފެރީގައި އަލިފާން ރޯވާން މެދުވެރިވި ސަބަބެއް އަދި ސާފުނުވާ ކަމަށް އެ އިދާރާގެ ބަޔާނުގައިވެ އެވެ.
