އުތުރު ކޮރެއާގެ ލީޑަރު ކިމް ޖޮން އުންއާ އެކު އޮތް "ވަރަށް ގާތް ގުޅުމަށް" ރިއާޔަތްކުރައްވައި، ދެކުނު ކޮރެއާއާ އެކު އެމެރިކާއިން ބާއްވާ އަސްކަރީ ތަމްރީނުތައް "ވަރަށް ބޮޑަށް މަދުކުރާނެ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
މީގެ އިތުރުން، އީރާނުގެ ނިއުކްލިއާ ހަތިޔާރު ނައްތާލުމަށް ނުވަތަ "ޑިނިއުކްލިއަރައިޒޭޝަން" މަސައްކަތުގައި އެމެރިކާއާ ބައިވެރިވުމަށް ދެކުނު ކޮރެއާއިން ދެކޮޅު ހަދާފައިވާ ކަމަށް ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރޫތް ސޯޝަލް" ގައި އޭނާ ފާހަގަކުރެއްވި އެވެ.
ޓްރަމްޕް ކުރެއްވި ޕޯސްޓެއްގައި ވިދާޅުވީ، އާންމު އުސޫލުން ތަމްރީންގެ ހަރަދުތަކުގެ ބޮޑު ބައެއް ދައްކަނީ އެމެރިކާއިން ކަމަށެވެ. އަދި މިއީ ވަރަށް އެކަށީގެންނުވާ އަދި ދޭދޭ ގައުމުތަކުގެ މެދުގައި ދެކޮޅުވެރިކަން އުފެދޭ ފަދަ ކަމެއްގެ ގޮތުގައި އޭނާ ސިފަކުރެއްވި އެވެ.
ދެކުނު ކޮރެއާއިން ބުނެފައިވަނީ އެމެރިކާއާ އެކު ބާއްވާ އަސްކަރީ ތަމްރީނުތައް "ތާވަލާ އެއްގޮތަށް" ކުރިއަށްދާނެ ކަމަށެވެ. މިކަމާ ގުޅޭ ގޮތުން އުތުރު ކޮރެއާއިން އަދި އެއްޗެއް ބުނެފައެއް ނުވެ އެވެ.
އާދީއްތަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ހޯމަ ދުވަހު އެމެރިކާ އާއި ދެކުނު ކޮރެއާގެ އަހަރީ އަސްކަރީ ތަމްރީނުތައް ފަށަން ހަމަޖެހިފައިވާތީ، އެ ތަމްރީނުތައް ކެންސަލް ކުރުމަށް މިހާރު "މާ ލަސްވެފައިވާ" ކަމަށެވެ.
އޭނާ އިތުރަށް ވިދާޅުވީ، "މިއީ މާ ބޮޑު ގުޅުމެއް ނެތް ކަމަކަށް ވިޔަސް، އީރާނުގެ ނިއުކްލިއާ ހަތިޔާރު ނައްތާލުމުގެ މަސައްކަތުގައި އެމެރިކާއާ ބައިވެރިވާން ބޭނުންތޯ ދާދި ފަހުން ދެކުނު ކޮރެއާގެ ރައީސްގެ އަރިހުން އެހުމުން، އެކަމަށް އޭނާ އިންކާރު ކުރެއްވި" ކަމަށެވެ.
ޓްރަމްޕް މިކަން އިއުލާން ކުރައްވާފައިވަނީ، 2019 ވަނަ އަހަރު އޭނާ އާއި ކިމް ޖޮން އުން އެކުގައި ނަގާފައިވާ ފޮޓޯއެއް ސޯޝަލް މީޑިއާގައި ހިއްސާކުރެއްވިތާ 24 ގަޑިއިރު ވެސް ނުވަނީހެވެ. އެ ފޮޓޯއާ އެކު ޓްރަމްޕް ލިޔުއްވާފައިވަނީ، އެ ފޮޓޯއިން ފެންނަ ފެނުމަށް ދެ ބޭފުޅުންގެ މޫނުމަތިން ނުތަނަވަސްކަން ފެނުނު ނަމަވެސް، އެއީ ވަރަށް ގާތް ދެ އެކުވެރިން ކަމަށެވެ.
