އެމެރިކާގެ ބާރުގެ ދަށުގައި އޮންނަ ޕުއެޓޯ ރީކޯއަށް ކުރިމަތިވެފައިވާ ހަނަފަސްކަމާ ގުޅިގެން އެ ގައުމުގެ ކަމާބެހޭ ފަރާތްތަކުން އަޅަމުންދާ ހަރުކަށި ފިޔަވަޅުތަކާއެކު، އެތައް ލައްކަ ބަޔަކު ފެނަށް ޖެހި، ދެ ދުވަސް ވަންދެން ފެނުގެ ހިދުމަތް މެދުކެނޑެމުން އެބަދެ އެވެ.
ކެރީބިއަން ކަނޑުގައި އޮންނަ މި ޖަޒީރާ ގައުމުގެ ގިނަ ގޭބިސީތައް މިހާރު ވަނީ ދެ ބަޔަކަށް ބަހާލާފަ އެވެ. އަދި ކޮންމެ ބަޔަކަށް ވެސް ފެން ދޫކުރާނީ ބަހާލައިގެން، ވަކި ތަރުތީބަކުން 48 ގަޑިއިރަށް ފެނުގެ ހިދުމަތް މެދުކަނޑާލާ ގޮތަށެވެ.
ޕުއެޓޯ ރީކޯގެ ވެރިރަށް ސެން ހުއާންގައި މިދިޔަ ހުކުރު ދުވަހު ފެން ކަނޑާލުމާ ގުޅިގެން، އެ ސިޓީގެ ރައްޔިތުން ދަނީ ފެން ކޮންޓްރޯލް ކުރަން ނިންމި ނިންމުމަށް ފާޑުކިޔަމުންނެވެ. ނަމަވެސް، މި ފިޔަވަޅުތައް ނިމުމަކަށް އަންނާނެ ތާރީހެއް ސަރުކާރުގެ އިދާރާތަކުން އަދި ހާމައެއް ނުކުރެ އެވެ.
އެމެރިކާގެ "ޑްރޯޓް މޮނީޓާ" އިން ހާމަކޮށްފައިވާ ގޮތުގައި، ޕުއެޓޯ ރީކޯގެ ބޮޑު ބަޔަކަށް ވަނީ މެދު މިންވަރަކަށް އަދި ބައެއް ސަރަހައްދުތަކަށް ވަރަށް ބޮޑަށް ހަނަފަސްކަން ކުރިމަތިވެފަ އެވެ. މީގެ އިތުރުން، އެ ގައުމުގެ ފެނުގެ ނިޒާމަށް ދިމާވެފައިވާ ދިގު މުއްދަތުގެ މައްސަލަތަކުގެ ސަބަބުން މި ހާލަތު ވަނީ އިތުރަށް ގޯސްވެފަ އެވެ.
ސީބީއެސް އިން ރިޕޯޓްކޮށްފައިވާ ގޮތުގައި، ޕުއެޓޯ ރީކޯގެ ވޯޓާ އޮތޯރިޓީން އުފައްދާ ފެނުގެ ގާތްގަނޑަކަށް 65 އިންސައްތަ ފެން ބޭކާރުވެގެންދަނީ، ހަލާކުވެފައިވާ ހޮޅިތަކުން ފެން ލީކުވުމާއި ދުވަސްވީ އިންފްރާސްޓްރަކްޗާގެ ސަބަބުންނެވެ.
އެ ގައުމުގެ ގަވަރުނަރު ޖެނިފާ ގޮންޒާލޭޒް ވަނީ މި މައްސަލަތައް ހުރިކަމަށް އެއްބަސްވެވަޑައިގެންފަ އެވެ. ނަމަވެސް، ފެން ކޮންޓްރޯލް ކުރަން ޖެހުނީ މޫސުމީ ބަދަލުތަކުގެ ސަބަބުން، ގައުމަށް އެންމެ މުހިންމު ކަރައިޒޯ ރިޒަވޯއާ ނުވަތަ ފެން ރައްކާކުރާ ފެންގަނޑު ހިކުމާ ގުޅިގެން ކަމަށް އޭނާ ވިދާޅުވި އެވެ.
ޕުއެޓޯ ރީކޯގެ ތާރީހުގައި ވެސް އެންމެ ހަނަފަސް ޖުލައި މަސް ތަޖުރިބާކޮށްފައިވަނީ މި އަހަރު ކަމަށްވާއިރު، މިހާރު ވެސް އެ ގައުމުގެ 68 އިންސައްތަ ސަރަހައްދަށް ވަނީ ހަނަފަސްކަން ކުރިމަތިވެފަ އެވެ.
ސަރުކާރުން ހާމަކޮށްފައިވާ ގޮތުގައި، ކަރައިޒޯ ރިޒަވޯއާއިން ފެން ފޯރުކޮށްދޭ ހަތް ސަރަހައްދަކަށް މިކަމުގެ އަސަރު ވަނީ ކޮށްފަ އެވެ. އަދި 180,000 އަށްވުރެ ގިނަ ގޭބިސީއާއި އިމާރާތްތަކުން ފެން ބޭނުންކުރާ މިންވަރު ކޮންޓްރޯލް ކުރަން ވަނީ މަޖުބޫރުވެފަ އެވެ.
ގަވަރުނަރު ގޮންޒާލޭޒް ވިދާޅުވީ، ފެން ކޮންޓްރޯލް ކުރަން ނިންމީ ކަރައިޒޯ ރިޒަވޯއާގެ ހާލަތާއި ކުރިއަށް އޮތް ދުވަސްތަކުގެ މޫސުން ލަފާކުރާ ގޮތަށް ވަރަށް ބޮޑަށް ބެލުމަށްފަހު ކަމަށެވެ.
ފެނުގެ ހިދުމަތް މެދުކެނޑެން ފެށުމާއެކު، ގިނަ ބަޔަކު ދަނީ ސަރުކާރުން ފޮނުވާ ފެން ބޯޓުތަކާއި ޓޭންކަރުތަކުން ބޮޑެތި ފުޅިތަކަށް ފެން އެޅުމަށް ކިއޫ ހަދަމުންނެވެ.
މީގެ ކުރިން 2015 އަދި 2020 ވަނަ އަހަރު ވެސް ޕުއެޓޯ ރީކޯގައި ފެން ކޮންޓްރޯލް ކޮށްފައިވެ އެވެ. އެ ފަހަރުތަކުގައި 400,000 ގޭބިސީއަށް ފެން ލިބެނީ ކޮންމެ ތިން ދުވަހަކުން އެއް ދުވަހު އެވެ.
