އޯގަސްޓު 5، ވަނަ ދުވަހުގެ ރޭ ކަނޑުމައްޗަށް ތިން މީހަކު ގެއްލި ހިނގި ހިތާމަވެރި ހާދިސާގައި މުދާ އުފުލާ ބޯޓު "ފްރެންޑު-4" ބަންޑުން ޖަހާލައި އަޑިއަށް ދިޔައީ ހުވަދޫ ކަނޑުގެ އެންމެ ފުން ސަރަހައްދަށް ކަމަށާއި ގެއްލުނު މީހުން ހޯދަން ހުވަދޫ ކަނޑު އެއްކޮށް ބަލައިފި މޯލްޑިވްސް ނެޝަނަލް ޑިފެންސް ފޯސް އިން ބުނެފި އެވެ.
އެމްއެންޑީއެފް އިން ނެރުނު ބަޔާނެއްގައި ބުނީ ދޯނި "ވަރަށް ކުއްލިގޮތެއްގައި ބަންޑުންޖަހާލައި އަޑިޔަށް ގޮސްފައިވަނީ ހުވަދޫ ފުން ކަނޑުގެ ތެރެއަށް" ކަމަށެވެ.
"ގެއްލުނު ތިން މީހުން ހޯދުމުގެ މަސައްކަތުގައި ކަނޑުމަގުންނާއި އަދި ވައިގެމަގުން ހުވަދޫ ކަނޑުގެ ސަރަހައްދު އެއްކޮށް ވަނީ ބެލިފަ. އަދި އޮޔާހިނގާދާނެ ކަމަށް ބަލައި، ވަޔާއި ކަނޑުގެ އޮއިވަރަށް ބަލައިގެން އެ މިސްރާބުން ވެސް ވަނީ ހުވަދޫ ކަނޑާއި، ހައްދުންމަތި އަތޮޅުގެ އެ ބިތުގެ ފަރުތަކާއި، ހުވަދުއަތޮޅު އުތުރުބުރީގެ އެ ބިތުގެ ފަރުތައް ވެސް ބަލާފަ،" ސިފައިން ނެރުނު ބަޔާނެއްގައި ބުންޏެވެ.
އެ ހާދިސާގައި ގެއްލުނީ އެވަގުތު ދޯނީގައި ތިބި ފުލުހަކާއި ސިފައިންގެ މީހެއްގެ އިތުރުން އެ ދޯނީގެ ކައްޕި އެވެ. އެއީ ދޯނީގެ ކެޕްޓަން ތ. މަޑިފުށި، ދޮންވެލި، މުހައްމަދު ހަމްދޫން، 35، އާއި ދޯނި ސަލާމަތްކުރުމުގެ މަސައްކަތްކުރަން ދިޔަ ފުލުހުންގެ ސާޖަންޓް އަލީ ނާފިއު، 35، އަދި އެމްއެންޑީއެފްގެ ސްޓާފް ސާޖަންޓް އިބްރާހިމް އަހްމަދު 39، އެވެ.
ދޯނިން ދަތުރު ކުރި ހަތް މީހަކު ވަނީ ދޯނި އަޑިއަށްދިޔަ ވަގުތު ސަލާމަތްކޮށްފަ އެވެ.
"ދޯނި އަޑިޔަށްދިޔަ ވަގުތު ލޭންޑިން ކްރާފްޓަކާއި ޕޮލިސް ލޯންޗަކާއި އެމްއެންޑީއެފް ލޯންޗެއް، ދޯންޏާ ވަރަށް ކައިރީގައި އޮތުމާ އެކު ދޯނިން ފުންމާލި މީހުންނާއި ދޯނި ބަންޑުންޖަހާލި ވަގުތު ދޯނިން ނިކުމެވުނު މީހުން ވަނީ އެ ވަގުތު ސަލާމަތްކުރެވިފަ،" އެމްއެންޑީއެފްގެ ބަޔާނުގައި ބުނެފައިވެ އެވެ.
ސިފައިން ބުނީ، ދޯނިން ގެއްލުނު މީހުން ކަނޑުމަތިން ފެނުމުގެ ފުރުސަތު ކުޑަ ކަމަށެވެ. ދޯނި އަޑިއަށް ދިޔަ ސަރަހައްދުގެ ފުން މިނުގައި 1600 މީޓަރު ހުންނާނެ ކަމަށާއި އެއީ ނިއުކްލިއާ ސަބްމެރީނަކަށް ވެސް ދަތުރު ކުރެވޭ ފުން މިނެއް ނޫން ކަން ސިފައިން ފާހަގަ ކުރި އެވެ.
"މިހާތަނަށް ކުރެވުނު މަސައްކަތްތަކާއި އަދި ދޯނިން ސަލާމަތްވި މީހުންގެ ފަރާތުން ލިބިފައިވާ މައުލޫމާތަށް ބަލާއިރު މި ދޯނިން ގެއްލިފައިވާ މީހުން ކަނޑުމަތިން ފެނުމުގެ ފުރުސަތު ކުޑަ. ހުވަދޫ ކަނޑަށް މި ދޯނި ފެތިފައިވާ ސަރަހައްދު 1600 މީޓަރަށް ވުރެ ފުންވާނެ ކަމަށް ބެލެވޭ. މިއީ އިންސާނުންނަށް ޑައިވިން ކޮށްގެންދެވޭ ފުންމިނެއް ނޫން. އަދި މިއީ ބޭރު ގައުމުތަކުގެ ކަނޑުގެ އަސްކަރިއްޔާގައި ބޭނުންކުރާ ހަނގުރާމައިގެ ކޮންވެންޝަނަލް އަދި ނިޔުކްލިޔާ ސަބްމެރިން ވެސް އޮޕަރޭޓްކުރާ ފުންމިނެއް ނޫން،" ސިފައިން ބުންޏެވެ.
ގެއްލުނު މީހުން ހޯދަން މިފަހުން އޮސްޓްރޭލިޔާއިން ދިން ހައި-ޓެކްނޮލޮޖީ މަނަވަރާއި ތުރުކީއިން ގަތް ޑްރޯންތަކާއި އެމެރިކާއިން ފޮނުވި ސާޗް އެންޑް ރެސްކިއު މަތިންދާބޯޓުތަކެއް ބޭނުން ކުރި އެވެ.
"މި ހާދިސާ ހިނގިތާ 11 ދުވަސް ފާއިތުވެގޮސްފައި ވާއިރު، ހާދިސާގައި ނުފެނިފައިވާ ތިން މީހުން ހޯދުމަށް ޓަކައި 16 އޮގަސްޓް 2026 ވަނަ ދުވަހުގެ 18:00 ގެ ނިޔަލަށް ވައިގެ މަގުން 17,220 އަކަ ނޯޓިކަލް މޭލުގެ ސަރަހައްދެއް ބަލާފައި ވާއިރު ކަނޑުމަގުން 2790.10 އަކަ ނޯޓިކަލް މޭލުގެ ސަރަހައްދެއް ވަނީ ބަލާފަ. އަދި އެ ސަރަހައްދުގެ ގޮނޑުދޮށްތަކާއި ފަރުތައް ހިމެނޭހެން 288 އަކަ ނޯޓިކަލް މޭލުގެ ސަރަހައްދެއް ވަނީ ބަލާފަ،" އެމްއެންޑީއެފް އިން ބުންޏެވެ.
