ދިވެހި ރެޑް ކްރެސެންޓު (އެމްއާރުސީ) ގެ ހަރަކާތްތަކަށް ފަންޑުކުރަން ބޭނުންވާ ފައިސާ ހޯދުމުގެ މަގުސަދުގައި، ހުޅުމާލޭގައި ހުންނަ އެ ޖަމިއްޔާގެ ބިމުގައި "ދަ ކްރެސެންޓް ޓަވާ" ގެ ނަމުގައި އިމާރާތެއް ތަރައްގީކުރަން އިއުލާންކޮށް، އެ ޕްރޮޖެކްޓަށް އިންވެސްޓުކުރަން ހުޅުވާލައިފި އެވެ.
އެމްއާރުސީއާށް 17 އަހަރު ފުރުނު ދުވަހާ ދިމާކޮށް އިއުލާންކުރި މި ޕްރޮޖެކްޓަކީ، ހުޅުމާލޭގައި އެ ޖަމިއްޔާއިން ގަނެފައިވާ 5000 އަކަފޫޓުގެ ބިމުގައި ތަރައްގީކުރާ 14 ފަންގިފިލާގެ އިމާރާތެކެވެ.
މި ޕްރޮޖެކްޓު އިއުލާންކުރައްވަމުން އެމްއާރުސީގެ ރައީސް އަލީ ނާޝިދު ވިދާޅުވީ މިއީ ކުރިއަށް އޮތް ޖީލަށް އެމްއާރުސީގެ ހިދުމަތްތައް ފޯރުކޮށްދޭން އެހީތެރިވެދޭނެ ދެމެހެއްޓެނިވި ވަސީލަތެއް އުފެއްދުމަށް ކުރެވޭ މަސައްކަތެއް ކަމަށެވެ. އަދި، މުޅި ޕްރޮޖެކްޓު ފަރުމާކޮށްފައި ވަނީ އެ މަގުސަދު ހާސިލުކުރެވޭނެ ގޮތަށް ކަމަށް އޭނާ ވިދާޅުވި އެވެ.
"މި އިންވެސްޓު ކުރެވެނީ މޯލްޑިވްސް ރެޑް ކްރެސެންޓުގެ ދިގުމުއްދަތުގެ ދެމެހެއްޓެނިވިކަން ކަށަވަރު ކުރުމަށް. މިއީ އަޅުގަނޑުމެންގެ އަތުގައި މިހާރު އޮތް އެސެޓެއް ޒިންމާދާރުކަމާއެކު ބޭނުންކުރުން،" ނާޝިދު ވިދާޅުވި އެވެ.
އެމްއާރުސީގެ ކްރެސެންޓު ޓަވަރު ޕްރޮޖެކްޓަށް ޑޮނޭޝަންގެ ގޮތުގައި އާއި ފައިނޭންސިންގެ ގޮތުގައި އަދި ސްޕޮންސަރެއްގެ ގޮތުގައި އިމާރާތް ތަރައްގީކުރަން ބޭނުންވާ ސާމާނާއި ތަކެތި ފޯރުކޮށްދީގެން ވެސް އެހީތެރިކަން ފޯރުކޮށްދެވެ އެވެ. އޭގެ އިތުރުން، އިމާރާތުގެ ވިޔަފާރި ޖާގަތަކާއި އޮފީސް ޖާގަތައް ދިގު މުއްދަތަށް ކުއްޔަށް ނަގައިގެން ވެސް ފައިސާ ފޯރުކޮށްދެވެ އެވެ.
ޑޮނޭޝަންގެ ގޮތުގައި ފޯރުކޮށްދެވޭ އެންމެ މަދު އަދަދަކީ 1000ރ. އެވެ. އަދި، މޭޖާ ޑޯނާ ނުވަތަ ބޮޑެތި ކޮންޓްރިބިއުޝަންގެ ގޮތުގައި ބަލައިގަންނަނީ ފަސް ލައްކަ ރުފިޔާއަށް ވުރެ މަތީގެ އަދަދުތަކެވެ. މި ޕްރޮޖެކްޓަށް ފައިސާ އާއި އެހީތެރިކަން ފޯރުކޮށްދިން އެންމެންގެ އެހީތެރިކަން ފާހަގަކުރުމުގެ ގޮތުން އިމާރާތުގެ ތެރޭގައި "ރެކޮގްނިޝަން ވޯލް" އެއް ބަހައްޓާނެެ އެވެ.
ފައިނޭންސިން ފޯރުކޯށްދޭން ބޭނުންވާ މީހުންނާއި ވިޔަފާރިތަކަށް ހުޅުވާލާފައި ވަނީ އެ ބަޔަކު ފައިސާ ދޭން ބޭނުންވާ އަދަދާއި، އިންޓްރެސްޓު ރޭޓާއި، ފައިސާގެ ބާވަތާއި ފައިނޭންސިންގެ މުއްދަތު ހުށަހަޅަން ހުޅުވާލާފަ އެވެ. އަދި، ސްޕޮންސަރުންގެ ގޮތުގައި ތަކެތި ފޯރުކޮށްދޭން ބޭނުންވާ މީހުންނަށް އިމާރާތުގެ ބޭނުން ތަނެއް ހިޔާރުކޮށްގެން، އެ ތަނަކަށް ބޭނުންވާ ސާމާނު ފޯރުކޮށްދެވެ އެވެ.
ކްރެސެންޓު ޓަވަރުގެ ވިޔަފާރި ޖާގަތަކާއި އޮފީސް ޖާގަތަައް، ޓެރަސް ފަންގިފިލާ ހިމެނޭހެން 10 ފަންގިފިލާގައި ހުރެ އެވެ. މި ޖާގަތައް ހުންނަނީ ސެންޓްރަލް ޕާކު ފެންނަ "ސެންޓްރަލް ޕާކު ވިއު" އަދި އެތެރެ ފަޅިއަށް ވާގޮތަށް އޮންނަ ""ސިޓީ ވިއު" ޖާގަތައް ހިމެނެ އެވެ. ކުލި މުއްދަތު އުޅެނީ 20 އަހަރާއި 30 އަހަރާއި 50 އަހަރަށެވެ. އަގުތައް އުޅެނީ 4.7 މިލިއަން ރުފިޔާއިން ފެށިގެން ގޮސް 24 މިލިއަން ރުފިޔާ ހަމައަށެވެ.
މި ޕްރޮޖެކްޓުގެ ފައިނޭންޝަލް އެޑްވައިޒަރު އަދި ޕްރޮޖެކްޓު މެނޭޖަރަކީ ފަސްޓް ނޭޝަނަލް ފައިނޭންސް ކޯޕަރޭޝަން އެވެ. މި ޕްރޮޖެކްޓުގައި ބައިވެރިވާން ޝައުގުވެރިކަން ހުރި އެންމެނަށް ފަސޭހަކޮށްދިނުމުގެ ގޮތުން ދަ ކްރެސެންޓު ޓަވަރު ނަމުގައި ވެބްސައިޓެއް ވަނީ ހަދާފަ އެވެ.
ފަސްޓް ނޭޝަނަލް ކޯޕަރޭޝަނުން މައުލޫމާތު ދޭ ގޮތުގައި މި ވެބްސައިޓުން މި ޕްރޮޖެކްޓުގައި ބައިވެރިވާން ބޭނުންވާ އެންމެން ބޭނުންވާ މައުލޫމާތު ފެންނަން ހުންނާނެ އެވެ. އޭގެ ތެރޭގައި ފައިނޭންސިން ކަލްކިއުލޭޓާ އާއި އިމާރާތުގެ ޖާގަތައް ބޭނުންކުރާ ތަފުސީލުތައް ފަދަ މައުލޫމާތުތައް ހިމެނެ އެވެ.
