ރޭގަނޑު ނިދި މަދުވުމަކީ ހަމައެކަނި ޖެހިގެން އަންނަ ދުވަހު މީހާގެ މޫޑު ގޯސްކޮށްލާ ކަމެއް ނޫނެވެ. ދިގު މުއްދަތަކަށް ނިދި މަދުވުމަކީ ހަކުރު ބަލިން ފެށިގެން ކަސްރަތު ކުރުމާ ހަމައަށް ހަށިގަނޑުގެ ހުރިހާ ނިޒާމަކަށް އޭގެ ނޭދެވޭ އަސަރު ފޯރާ ކަމެކެވެ. ދިރާސާތަކުން ދައްކާ ގޮތުގައި ގަވާއިދުން ފުރިހަމަ ނިދި ހޯދުމަކީ ދުޅަހެޔޮ ސިއްހަތަކަށް ކޮންމެހެން ބޭނުންތެރި ކަމެކެވެ.
1. ސިކުނޑީގެ ހިނގުން ރަނގަޅުވުން
ނިދި މަދުވުމުން ކަންކަމަށް ސަމާލުކަން ދިނުމަށާއި މައުލޫމާތު ހަނދާނުގައި ބެހެއްޓުމަށް އުނދަގޫވެއެވެ. އާ ކަންކަން ދަސްކުރުމާއި، ދަސްކުރާ މައުލޫމާތު ސިކުނޑީގައި ރައްކާކުރުމަށް ނިދި މުހިންމު ދައުރެއް އަދާކުރެއެވެ.
2. ނަފުސާނީ ދުޅަހެޔޮކަން
ނިދީގެ ތެރޭގައި ސިކުނޑިން އިންސާނާގެ އިހުސާސްތައް ތަރުތީބުކޮށްދެއެވެ. ނިދި މަދުވުމަކީ ނަފުސާނީ ބަލިތަކަށް މަގުފަހިވާ ކަމެކެވެ. ދިރާސާއަކުން ދައްކާގޮތުގައި ނިދިނައުމުގެ ބަލި ހުންނަ މީހުން ޑިޕްރެޝަނަށް ދިއުމުގެ ފުރުސަތު ފަސް ގުނަ އިތުރެވެ.
3. ހިތުގެ ސިއްހަތު
ނިދީގައި އޮންނަ ވަގުތު އިންސާނާގެ ލޭގެ ޕްރެޝަރު ދަށްވެ، ހިތާއި ލޭހިނގާ ނިޒާމަށް އަރާމުލިބެއެވެ. ނިދި މަދުވާނަމަ ލޭގެ ޕްރެޝަރު މަތިވެ، ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު ބޮޑުވެއެވެ.
4. ހަށިގަނޑުގެ ދިފާއީ ނިޒާމު ވަރުގަދަވުން
ގަވާއިދުން ނިދި ލިބުމަކީ ހަށިގަނޑުގެ ދިފާއީ ނިޒާމު ބަލިތަކާ ދެކޮޅަށް މަސައްކަތް ކުރުމަށް އެހީތެރިވެދޭ ކަމެކެވެ. ނިދި މަދުވާނަމަ ދިފާއީ ސެލްތަކުގެ ބާރު ދެރަވެ، އަވަސް އަވަހަށް ބަލިވުމަށް މަގުފަހިވެއެވެ.
5. ހަކުރުގެ މިންވަރު ކޮންޓްރޯލްކުރުން
ނިދީގެ ފުން މަރުހަލާގައި ލޭގައި ހުންނަ ގްލޫކޯޒްގެ މިންވަރު ދަށްވެއެވެ. މި މަރުހަލާއަށް ނުދެވޭނަމަ ހަށިގަނޑަށް ހަކުރު ކޮންޓްރޯލް ކުރަން އުނދަގޫވެ، ޓައިޕް-2 ހަކުރު ބަލި ޖެހުމުގެ ފުރުސަތު ބޮޑުވެއެވެ.
6. ބަރުދަން ކޮންޓްރޯލްކުރުން
ފުރިހަމަ ނިދި ލިބުމަކީ ކާހިތްވުން ކޮންޓްރޯލްކޮށްދޭ ހޯމޯންތައް ހަމަހަމަކޮށްދޭ ކަމެކެވެ. ނިދި މަދުވުމުން ސިއްހަތަށް ނުގުޅޭ ކާނާ ކެއުމަށް ބޭނުންވުމާއި، ހަރަކާތްތެރިވެ އުޅުމަށް ކަަންނެތްވުން މެދުވެރިވެއެވެ.
---
ކޮންމެ ކަމެއްގައިވެސް މެދުމިންވަރަކީ އެންމެ ރަނގަޅު ގޮތެވެ. އާންމުގޮތެއްގައި ކޮންމެ ރެޔަކު 7-8 ގަޑީއިރު ނިދުމަކީ ސިއްހީ ގޮތުން އެންމެ ފައިދާހުރި މިންވަރެވެ. 9 ގަޑިއިރަށްވުރެ ގިނައިން ނިދުމަކީވެސް ހިތުގެ ބަލިތަކަށް މަގުފަހިވެދާނެ ކަމެކެވެ.
