މެޓަބޮލިކް ޑިސްފަންކްޝަން-އެސޯސިއޭޓެޑް ލިވާ ޑިޒީޒް (މާސްލްޑް) އަކީ ފުރަމޭގެ ތަފާތު ބަލިތައް ހިމެނޭ ކަމެއް ނަމަވެސް، މި ބަލީގެ އެންމެ ބޮޑު އެއް ސިފައަކީ ފުރަމޭގައި ސަރުބީ ޖެހުން ނުވަތަ ހެޕަޓިކް ސްޓީއަޓޯސިސް އެވެ.
މާސްލްޑް ބަލި ހުރިކަމަށް ނިންމުމަށްޓަކައި، ބަލިމީހާގެ ކިބައިގައި އާދަޔާ ހިލާފަށް ފަލަވުން ނުވަތަ ލޭގެ ޕްރެޝަރު މަތިވުން ފަދަ ކާޑިއޯމެޓަބޮލިކް ނުރައްކަލުގެ އެންމެ ކަމެއް ނަމަވެސް ހުންނަން ޖެހެ އެވެ.
މާސްލްޑް ބަލި ތަހައްމަލު ކުރަމުންދާ މީހުންނަށް ކެއުމާއި ދިރިއުޅުމުގެ އާދަތަކަށް ބަދަލު ގެނައުމަކީ އެހީތެރިވެދޭނެ ކަމެކެވެ. އަދި މި ބައްޔަށް އެންމެ ފައިދާހުރި ކާނާގެ ބާވަތްތަކަކީ ކޮބައިކަން ދެނެގަތުމަށް މާހިރުން ދަނީ ޝައުގުވެރިކަމާއެކު މަސައްކަތް ކުރަމުންނެވެ.
މިގޮތުން "ނިއުޓްރިއަންޓްސް" މަޖައްލާގައި ޝާއިއުކޮށްފައިވާ ދިރާސާއެއްގައި ވަނީ، މާސްލްޑް ބަލި ހުންނަ މީހުން ޓޮމާޓޯ ބޭނުންކުރުމުން ލިބޭ ފައިދާތައް ބަލާފަ އެވެ.
ދިރާސާވެރިންނަށް ފާހަގަވި ގޮތުގައި، ކޮންމެ ދުވަހަކު ރޯ ޓޮމާޓޯ އާއި ޓޮމާޓޯ ސޯސް ބޭނުންކުރި މީހުންގެ ފުރަމޭގައި ޖަހާފައި ހުރި ސަރުބީ، އެ ތަކެތި ބޭނުން ނުކުރާ މީހުންނަށް ވުރެ މަދެވެ.
މި ދާއިރާއިން އަދި އިތުރު ގިނަ ދިރާސާތަކެއް ކުރަން ޖެހުނު ނަމަވެސް، މި ހޯދުންތަކުން ދައްކާ ގޮތުގައި މާސްލްޑް ބަލި ހުންނަ މީހުންގެ ކެއުމުގައި ޓޮމާޓޯ ގިނައިން ހިމެނުމަކީ އެމީހުންނަށް ފައިދާ ކުރާނެ ކަމެކެވެ.
މި ދިރާސާ ކުރި ފަރާތްތަކުން ބޭނުންވީ މެޑިޓެރޭނިއަން ކެއުންތަކުގައި އާންމުކޮށް ބޭނުންކުރާ ޓޮމާޓޯގެ ސަބަބުން، ފުރަމޭގައި ސަރުބީ ޖެހުމަށް ކުރާ އަސަރު ދެނެގަތުމަށެވެ.
ދިރާސާ ކުރި ފަރާތްތަކުން ބުނާ ގޮތުގައި، މި ހޯދުންތަކުން ދައްކަނީ ހަށިގަނޑުގެ ބަރުދަނަށާއި ބަނޑުގެ ސަރުބީއަށް ބޮޑު ބަދަލެއް ނައި ކަމުގައި ވިޔަސް، ޓޮމާޓޯ ބޭނުންކުރުމުން ފުރަމޭގައި ސަރުބީ ޖަމާވުން ކުޑަކޮށްދޭ ކަމެވެ.
މައުލޫމާތު: މެޑިކަލް ނިއުސް ޓުޑޭ
