މިއަދު ބާއްވާނެ ކަމަށް ބުނި ރައްޔިތުންގެ މަޖިލީހުގެ ޖަލްސާ ނުބާއްވަން ނިންމައި އެކަން މެންބަރުންނަށް އަންގައިފި އެވެ.
ރައްޔިތުންގެ މަޖިލީހުގެ މެންބަރުންނަށް ރޭ ދަންވަރު 1:30 ގައި މަޖިލީހުގެ އިދާރާއިން ފޮނުވި މެސެޖެއްގައި ބުނީ މިއަދުގެ ވަގުތެއްގައި މަޖިލީހުގެ ޖަލްސާއެއް ބާއްވަން ނިންމާފައިވާ ކަމަށެވެ. ޖަލްސާ ބާއްވާނެ ވަގުތީައި އެޖެންޑާ ފަހުން ހިއްސާކުރާނެ ކަމަށް އެ މެސެޖުގައި ބުންޏެވެ.
ނަމަވެސް، ދާދި ދެންމެއަކު މަޖިލިސް މެންބަރުންނަށް މަޖިލީހުގެ އިދާރާއިން ފޮނުވި މެސެޖެއްގައި ވަނީ މިއަދު ބާއްވާނެކަމަށް ބުނި ޖަލްސާ ނުބާއްވަން ނިންމާފައިވާ ކަމަށެވެ.
"ރައްޔިތުންގެ މަޖިލީހުގެ ޖަލްސާ މިއަދު ނޯންނާނެ ވާހަކަ ދަންނަވަން، އަދި ދެން މަޖިލީހުގެ ޖަލްސާއެއް އޮންނާނެ ތާރީހެއް މެންބަރުންނަށް ފަހުން އަންގާނެ ވާހަކަ ދަންނަވަން،" މަޖިލީހުގެ އިދާރާއިން މެންބަރުންނަށް ފޮނުވި މެސެޖުގައި ބުންޏެވެ.
މަޖިލީހުގެ ޖަލްސާއެއް މިއަދު ބާއްވަން ނިންމާފައިވާކަން މެންބަރުންނަށް އަންގާފައިވާއިރު، ކައުންސިލްތަކުން ބަލަހައްޓާ ބިންތައް ރަށްރަށުގެ އިހުތިސާސުން ވަކިކޮށް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހު ފާސްކުރުމަށްޓަކައި ރައްޔިތުންގެ މަޖިލީހުގެ ދެވަނަ ދައުރު އޮގަސްޓު 20، ގެ ނިޔަލަށް ދަންމާލަން އިއްޔެ ވަނީ މަޖިލީހުން ފާސްކޮށްފަ އެވެ.
މަޖިލީހުގެ ގަވާއިދުގައި ބުނާ ގޮތުން މަސައްކަތްތައް ބެހިފައިވަނީ ތިން ދައުރަކަށެވެ. ފުރަތަމަ ދައުރު ހިނގަނީ ފެބްރުއަރީ އެކަކުން ފެށިގެނެ މެއި 15، އަށެވެ. ދެވަނަ ދައުރު ޖޫން މަހުގެ ފުރަތަމަ ދުވަހުން ފެށިގެން އޮގަސްޓު 15، އަށް ނިމޭއިރު ތިންވަނަ ދައުރު ފަށަނީ އޮކްޓޯބަރު މަހުގެ ފުރަތަމަ ދުވަހު އެވެ. އަދި އެ ދައުރު ނިމޭނީ ނޮވެމްބަރު މަހުގެ ފަހު ދުވަހު އެވެ.
މަޖިލީހުގެ ދައުރު ދަންމާލަން ނިންމީ މަޖިލީހުގައި ހުރި މުހިންމު މަސައްކަތްތަކެއް ނިންމަން ކަމަށް މަޖިލީހުގެ ރައީސް އަބްދުއްރަހީމް އަބްދުﷲ އިއްޔެ ވިދާޅުވި އެވެ.
މަޖިލީހުގައި މިވަގުތު ހުރި މަސައްކަތްތަކަށް ބަލާއިރު، އެންމެ ގިނަ ބައެއްގެ ސަމާލުކަން ހުއްޓިފައިވާ މަސައްކަތަކީ ކައުންސިލްތަކުން ބަލަހައްޓާ ބިންތައް ސަރުކާރަށް ނެގޭގޮތަށް ލާމަރުކަޒީ ނިޒާމަށް ހުށަހަޅާފައިވާ އިސްލާހެވެ.
ލާމަރުކަޒީ ގާނޫނުގެ ދަށުން ކައުންސިލްތަކަށް ލިބޭ އިހުސާސީ ބާރުވެރިކަން އެއްކޮށް ނިގުޅައިގަނެވޭ ގޮތަށް ހުށަހަޅާފައިވާ އެ އިސްލާހުގެ މަސައްކަތް ނިންމަން ކޮމިޓީން ކަނޑައަޅާފައިވަނީ އަންނަ އާދިއްތަ ދުވަހުގެ ނިޔަލަށެވެ. އެ އިސްލާހަށް ޝަކުވާ ހުށަހެޅުމުގެ ސުންގަޑިއަކަށް އެ ކޮމިޓީން ފާސްކުރީ މިއަދުގެ 2:00 އެވެ.
އެ ބިލު ދިރާސާ ކުރުމުގެ މަސައްކަތް މަޖިލީހުން ކުރަމުންދާއިރު، އެ ބިލާ ދެކޮޅަށް އާންމުންގެ ތެރެއިން ބަޔަކު ވަނީ ޕެޓިޝަނެއްގައި ސޮއިކުރަން ފަށައިފަ އެވެ. މިހާރު ބަދަލުތަކާ ދެކޮޅަށް ސޮއިކުރަމުން އަންނަ ޕެޓިޝަނުގައި ވަނީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދަން ގޮވާލާފަ އެވެ.
