ލަންޑަން (އޮގަސްޓް 13) - އިނގިރޭސި ތިން ވަނަ ޑިވިޝަނަށް ރެލިގޭޓްވެފައިވާ، ލެސްޓާ ސިޓީ 300 މިލިއަން ޑޮލަރަށް ވިއްކާލުމަށް އެ ކްލަބް ހިންގަމުން އަންނަ ތައިލެންޑްގެ، ސްރިވަދަނަޕްރަބާ އާއިލާ އިން ނިންމައިފި އެވެ.
މިދިޔަ ހަތަރު އަހަރު ތެރޭ، ތިން ފަހަރު އިނގިރޭސި އެކި ފުޓްބޯޅައިގެ ޑިވިޝަންތަކުން ރެލިގޭޓްވެފައިވާ ލެސްޓާ އިން ކުރިއަށް މިި އޮތް ސީޒަނުގައި ވާދަކުރާނީ އިނގިރޭސި ލީގު ވަން (ތިން ވަނަ ޑިވިޝަން) ގަ އެވެ. އެއާ އެކު، ލެސްޓާގެ މެޖޯރިޓީ ހިއްސާ އޮތް ތައިލެންޑްގެ، ސްރިވަދަނަޕްރަބަ އާއިލާ އިން ނިންމީ ލެސްޓާ ވިއްކާލުމަށެވެ.
އެ ގޮތުން، މި ވަގުުތު ލެސްޓާ ވިއްކާލަން ކިޔާ އަގު އުޅެނީ، 300 މިލިއަން ޑޮލަރުގަ އެވެ. އެކަމަކު، އިނގިރޭސި ބައެއް ނޫސްތަކުން ރިޕޯޓްކުރާގޮތުގައި، 200 މިލިއަން ޑޮލަރަށް ވުރެން ބޮޑު އަގަކާ އެކު، ލެސްޓާގެ ދަރަނިތައް ދައްކާނެ ގޮތުގެ ޕްލޭނެއް ހުށަހަޅާ ބަޔަކަށް ވެސް އެ ކްލަބް ވިއްކާލުމުގެ ފުރުސަތު ބޮޑެވެ.
މީގެ ފަސް އަހަރު ކުރިން، 2021 ވަނަ އަހަރުގެ ފަހުން، ލެސްޓާ އިން ކޮންމެ ސީޒަނަކަށް ފަހު، އެ ކްލަބްގެ މާލީ ތަފާސްހިސާބުތައް އާންމުކުރާއިރު، 80 މިލިއަން ޑޮލަރަށް ވުރެން ދަރަނި އިތުރެވެ. އެ ގޮތުން، އެންމެ ފަހުން އާންމުކުރި މާލީ ރިޕޯޓްގައިވާ ގޮތުން، ދަރަނި އުޅެނީ، 86 މިލިއަން ޑޮލަރުގަ އެވެ. މީގެ އެއް ސީޒަން ކުރިން، 100 މިލިއަން ޑޮލަރަށް ވުރެން މި ދަރަނި އިތުރެވެ.
އެންމެ ގިނަ ބަޔެއްގެ ލޮލުގައި ލެސްޓާ އަޅައިގަތީ، 2016 ވަނަ އަހަރު ކްލައުޑިއޯ ރަނިއޭރީގެ ކޯޗުކަމުގައި އިނގިރޭސި ޕްރިމިއާ ލީގުގެ ޗެމްޕިއަންކަން ހޯދުމުންނެވެ. އަދި، އޭގެ ފަސް އަހަރު ފަހުން، ބްރެންޑަން ރޮޖާސްގެ ކޯޗުކަމުގައި ލެސްޓާ އިން ވަނީ 2021 ވަނަ އަހަރުގެ އިނގިރޭސި އެފްއޭ ކަޕްގެ ޗެމްޕިއަންކަން ހޯދައިފަ އެވެ.
އިނގިރޭސި ފުޓްބޯޅައިގައި، 2000 ވަަނަ އަހަރުގެ ފަހުން، ލީގާއި އެފްއޭ ކަޕް އަދި ލީގު ކަޕް ހޯދި ފަސް ކްލަބްގެ ތެރޭގައި ލެސްޓާ ހިމެނެ އެވެ. ލެސްޓާ އިން ލީގު ކަޕް ހޯދީ 2000 ވަނަ އަހަރު އެވެ.
ތައިލެންޑުގެ ކިންގް ޕަވާ ކޮމްޕެނީގެ ވެރިޔާ ވިޗާއީ ސްރިވަދަނަޕްރަބާ، ލެސްޓާ ސިޓީ ބައްލަވައިގަތީ 2010 ވަނަ އަހަރު 50 މިލިއަން ޑޮލަރަށެވެ. އޭގެ އަށް އަހަރު ފަހުން، 2018 ވަނަ އަހަރު ހެލިކޮޕްޓަރެއް ވެއްޓި ވިޗާއީ ސްރިވަދަނަޕްރަބާ މަރުވީ އެވެ. އެ އަށް ފަހު، ވިޗާއިގެ ލެގަސީ ދަމަހައްޓައި، މަސައްކަތް ފުރިހަމަ ކުރުމަށްޓަކައި ކްލަބުގެ ޒިންމާތަކާ، އޭނާގެ ދޮށީ ދަރިފުޅު އައިޔާވަތު ސްރިވަދަނަޕްރަބާ ހަވާލުވި އެވެ.
މީގެ އަށް އަހަރު ކުރިން، 2018 ވަނަ އަހަރު ވެސްޓް ހޭމް ޔުނައިޓެޑާއި ލެސްޓާ ސިޓީ 1-1 އިން އެއްވަރުވި މެޗަށް ފަހު ލެސްޓާގެ ވެރިޔާ ވިޗާއީ ދަތުރުކުރި ހެލިކޮޕްޓަރު ސްޓޭޑިއަމް ކައިރިއަށް ވެއްޓުނު ހާދިސާގައި އޭނާ މަރުވިކަން އެ ކްލަބުން ހާމަކުރީ އެކަން ހިނގާދިޔަތާ އެތައް ގަޑިއިރެއްވީ ފަހުންނެވެ. ވިޗާއީގެ އިތުރުން އެ ހެލިކޮޕްޓަރުން ދަތުރުކުރި ހަތަރު މީހަކު ވެސް ވަނީ މަރުވެފަ އެވެ.
