މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) ގެ މެންބަރުންގެ ހެލްތު އިންޝުއަރެންސަށް 367،277ރ. ގެ ޕެކޭޖެއް އެލައިޑް އިންޝުއަރެންސް އިން ނަގައިފި އެވެ.
އަދަދު އަށް އެނގިފައިވާ ގޮތުގައި ހަތް މެންބަރުންގެ މައްޗަށް އެކުލެވޭ ކޮންޓްރޯލް ކޮމިޝަންގެ މެންބަރުންނަށް އެލައިޑް އިންޝުއަރެންސް އިން ހެލްތު އިންޝުއަރެންސް ޕެކޭޖެއް ނެގީ މިދިޔަ ޖުލައި މަހު އެވެ. އެއީ ދައުލަތުން ހަރަދުކުރާ ގޮތަށް ކޮންމެ މެންބަރަކަށް އަހަރަކު 52،468ރ. ގެ މަގުން ނަގާފައިވާ ޕެކޭޖެކެވެ.
އެ ހެލްތު އިންޝުއަރެންސް ޕެކޭޖްގެ ދަށުން ކޮމިޝަނުގެ މެންބަރުންނަށް ރާއްޖެއާއި ރާއްޖެއިން ބޭރުގެ ޕްރައިވެޓް ހޮސްޕިޓަލުތަކުން ޑޮކްޓަރަށް ދެއްކުމުގައި ގިނަ ލުއިތަކެއް ލިބިގެންދާނެ އެވެ.
ކޮންޓްރޯލް ކޮމިޝަނުގެ މެންބަރުންގެ ހެލްތު އިންޝުއަރެންސަށް ދައުލަތުން ބޮޑު ހޭދައެއް ކުރަން ޖެހޭތީ އެކަމާ ގުޅިގެން އާންމުންގެ ފާޑުކިޔުން ވަނީ އަމާޒުވެފަ އެވެ. އެއީ އެ މެންބަރުންނަށް އާސަންދައިގެ އިތުރުން އިތުރު އިންޝުއަރެންސް ލިބޭތީ އެވެ.
ކޮންޓްރޯލް ކޮމިޝަނުގައި ހިމެނެނީ ރައީސް މުހައްމަދު ފަރުޝަތު، ނައިބުރައީސް ޒައްމަތު އަހްމަދު ވަހީދު، މެންބަރު ސިމާހާ ނަސީމް، މެންބަރު އަބްދުލް އަޒީޒް އިބްރާހިމް، މެންބަރު ހުސައިން ސަގީފް، މެންބަރު އާމިނަތު ސަރާހަތު އިއްޒަތު އަދި މެންބަރު ސަފާ ޝަފީގް އެވެ.
މި އަހަރަށް ލަފާކުރާ ބެޖެޓުގައި ކޮންޓްރޯލް ކޮމިޝަނަށް ކަނޑައަޅެޅީ 16.32 މިލިއަން ރުފިޔާ އެވެ. އެމްއެމްސީ އާއި ބްރޮޑްކޮމްއަށް މިދިޔަ އަހަރު ކަނޑައެޅި ބަޖެޓު އެއްކޮށްލުމުން ލިބެނީ 16.08 މިލިއަން ރުފިޔާ ކަމަށްވާއިރު، ކޮންޓްރޯލް ކޮމިޝަން އުފެއްދުމުން ހަރަދު ބޮޑުވި އެވެ.
މިދިޔަ އަހަރުގެ ބަޖެޓުގައި އެމްއެމްސީއަށް 4.9 މިލިއަން ރުފިޔާ ކަނޑައަޅާފައިވާއިރު، ބްރޮޑްކޮމްއަށް ކަނޑައަޅާފައި އޮތީ 11.54 މިލިއަން ރުފިޔާ އެވެ.
ކޮންޓްރޯލް ކޮމިޝަން ވުޖޫދުކުރީ ބްރޯޑްކޮމް އާއި މީޑިއާ ކައުންސިލަށް ދައުލަތުން ކުރަންޖެހޭ ހަރަދު ބޮޑުވުން ކަމަށް މީޑިއާތައް ކޮންޓްރޯލްކުރާ ބިލު ހުށަހެޅުއްވި ތުޅާދޫ ދާއިރާގެ މެންބަރު، އަބްދުލް ހަންނާން އަބޫބަކުރު ކުރިން ވިދާޅުވި އެވެ. އޭރު އެކަމަށް ތާއީދުކޮށް ސަރުކާރު ހިންގާ ޕީއެންސީގެ މެންބަރުންވެސް ވަކާލާތު ކުރެއްވި އެވެ.
