މިނިވަން މީޑިއާ ނެތިކޮށްލުމަށް ރައީސް މުހައްމަދު މުއިއްޒުގެ ސަރުކާރުން ވުޖޫދު ކުރި މީޑިއާ ކޮންޓްރޯލް ގާނޫނު އުވާލުމަށް ރައްޔިތުންގެ މަޖިލީހަށް ހުށަހަޅާފައިވާ ޕެޓިޝަނަށް ސޮއި ހަމަކުރަން ފަށައިފި އެވެ.
އެ ޕެޓިޝަން މަޖިލީހުގެ ތަޅުމާ ހަމައަށް ގެންދެވޭނީ 2100 ސޮއި ހަމަވުމުންނެވެ. ނޫސްވެރިންގެ ޖަމިއްޔާއިން މިހާރު ވަނީ އެ ސޮއި ހަމަކުރުމުގެ މަސައްކަތް ފަށާފަ އެވެ.
“ގައުމީ ސަލާމަތް އާންމު އިޖުތިމާއީ މިންގަނޑު ހަގީގަތް އޮޅޭ ގޮތަށް ދޮގަކަށް ވެދާނެ ހަބަރުތައް މިފަދަ ފުޅާ ދާއިރާއެއްގައި މާނަކުރެވޭ އެތައް ލަފުޒުތަކާއެކު މި ގާނޫނުގެ ދަށުން އުފަން ކޮށްފައިވާ ކޮމިޝަނަށް މީޑިއާތަކާ ދެކޮޅަށް ބޭނުންކުރެވިދާނެ މުތުލަގު ބާރުތަކެއް ދީފައިވެ“ ޕެޓިޝަނުގައި ބުނެފައިވެ އެވެ.
މިދިޔަ އަހަރުގެ ސެޕްޓެމްބަރު މަހުގެ ތެރޭގައި މަޖިލީހުން މި ބިލު ފާސްކުރީ ވެރިކަންކުރާ ޕީއެންސީއަށް ނިސްބަތްވާ 60 މެންބަރުންގެ ވޯޓުންނެވެ. ބިލާއި ދެކޮޅަށް ވޯޓު ދެއްވީ ވެލިދޫ ދާއިރާގެ މެންބަރު މުހައްމަދު އައްބާސް އެކަންޏެވެ. ވޯޓަށް އެހީ އިދިކޮޅު އެމްޑީޕީގެ ބައެއް މެންބަރުންގެ ނަން އިއްވުމުން އެ ޕާޓީގެ ޕީޖީ ގްރޫޕް މަޖިލީސް ދޫކޮށް ނުކުތް ފަހުންނެވެ.
އެ ބިލު ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވީ ސަރުކާރުގެ ފަރާތުންނެވެ. ބިލު ހުށަހެޅިއިރު ސަރުކާރުން ބުނަމުންދިޔައީ އެ ބިލަކީ ސަރުކާރުގެ އެއްވެސް ދައުރެއް އޮތް ބިލެއް ނޫން ކަމަށެވެ.
އެ ބިލު ތަސްދީގު ކުރުމާއެކު މީޑިއާ ރެގިއުލޭޓް ކުރަމުން އަންނަނީ މުއިއްޒުގެ ފުރިހަމަ ކޮންޓްރޯލް އޮތް މަޖިލީހުން ތިން މެންބަރުން އައްޔަން ކުރާ، ހަތް މެންބަރުންގެ މައްޗަށް އެކުލެވޭ ކޮމިޝަނަކުންނެވެ.
އެ ގާނޫނުގެ ދަށުން އުފައްދާ ކޮމިޝަނަށް ސޯޝަލް މީޑިއާ ރެގިއުލޭޓު ކުރުމުގެ ބާރު އޮތީ ލިބޭ ގޮތަށެވެ. އަދި މީޑިއާތައް ޖޫރިމަނާ ކުރެވޭ މާއްދާ ވެސް އަދިވެސް އެބަ އޮތެވެ. އުނި ކުރީ ވަކި ވަކި ނޫސްވެރިން ޖޫރިމަނާ ކުރެވޭ ގޮތަށް އޮތް މާއްދާ އެވެ. އަދި ކޮމިޝަނުން ބޭނުންވާ މީޑިއާއެއްގެ ރަޖިސްޓްރީ ބާތިލު ކުރެވޭނެ ގޮތަށް އޮތް މާއްދާތައް ވެސް އެބަހުއްޓެވެ.
ތެދު ހަބަރަކީ ކޮބައިކަން ކަނޑައެޅުމުގެ ބާރު ވެސް ލިބެނީ އުފައްދި ކޮމިޝަނަށެވެ. އަދި މީޑިއާ އެތިކްސް ހެދުމުގައި ކަނޑައަޅަންޖެހޭ އުސޫލުތައް ވެސް ބަޔާންކޮށްފައި ހުރީ އެ ބިލުގަ އެވެ.
ކޮންޓްރޯލް ކޮމިޝަނުން މަސައްކަތް ކުރަނީ ނޫސްވެރިންގެ ހިމާޔަތަށް ވުރެ ބޮޑަށް ސަރުކާރުގެ ހިމާޔަތުގަ އެވެ. ސަރުކާރާ ތަފާތު ހިޔާލުތައް ގެެނެސްދޭ ނޫސްތަކާއި ޗެނަލްތަކާ ދެކޮޅަށް އިންޒާރު ދިނުމާއި ފިޔަވަޅު އެޅުމަށް އެ ކޮމިޝަނުން ގެންދަނީ މަސައްކަތް ކުރަމުންނެެވެ.
އެގޮތުން، އަދަދު ނޫހުގެ އެތައް މައްސަލައެއް ބަލަމުން އަންނައިރު ޗެނަލް 13 ގެ މައްސަލަތައް ބަލައި ބައެއް އެންގުންތައް ވަނީ އަންގާފަ އެވެ. އޭގެ ތެރޭގައި ކޮންޓެންޓު ނެގުމާއި ލައިވް ކުރުން ހުއްޓާލުން އެންގުން ހިމެނެ އެވެ.
