ގދ. ތިނަދޫގައި ދެވަނަ ފަހަރަށް މީހުން އާބާދުވިތާ 60 އަހަރުފުރުން ފާހަގަކުރުމަށް ކުރިއަށް ގެންދާ ހަރަކާތްތަކުގައި ބައިވެރިވުމަށް ކުރީގެ ދެ ރައީސުން ކަމުގައިވާ، މުހައްމަދު ނަޝީދު އާއި އަބްދުﷲ ޔާމީން އަބްދުލްގައްޔޫމް އެ ސިޓީއަށް ވަޑައިގަންނަވަން ނިންމަވައިފި އެވެ.
ތިނަދޫ ސިޓީގެ މޭޔަރު، ސައުދު އަލީ އަދަދު ނޫހަށް ވިދާޅުވީ އެ ސިޓީގައި ކުރިއަށް ގެންދަން ނިންމާފައިވާ ހަރަކާތްތަކުގައި ބައިވެރިވުމުގެ ދައުވަތު ހުރިހާ ރައީސުންނަށް ވެސް ކައުންސިލުން އެރުވި ކަމަށެވެ.
"ހުރިހާ ރައީސުންނަށް ވެސް ދައުވަތު އެރުވިން، ދެން ދައުވަތު ގަބޫލުކުރައްވާފައި ވަނީ އެ ދެ ބޭފުޅުން، އެހެންވީމާ އެ ދެ ބޭފުޅުންނަށް މަރުހަބާ ދެންނެވުމަށް ތައްޔާރީތައް ވަމުން މިދަނީ،" ސައުދު ވިދާޅުވި އެވެ.
ތިނަދޫގައި ދެވަނަ ފަހަރަށް މީހުން އާބާދުވިތާ 60 އަހަރުފުރުން ފާހަގަކުރުމަށް އެ ސިޓީގައި ގިނަ ހަރަކާތްތަކެއް ކުރިއަށް ގެންދިޔުމަށް ހަމަޖެހިފައިވާ ކަމަށް އޭނާ ވިދާޅުވި އެވެ. އެގޮތުން، ފުޅަނދު ބުރަކާއި، ކުޅިވަރު ހަރަކާތްތަކާއި ތިނަދޫއަށް އެކި ގޮތްގޮތުން ހިދުމަތް ކޮށްދީ ހިދުމަތް ކުރަމުން ގެންދާ މީހުންނަށް ޝަރަފުގެ އިނާމާއި ހިތްވަރުދިނުމުގެ އިނާމު ދިނުމަށް ނިންމާފައިވާ ކަމަށް ވެސް އޭނާ ވިދާޅުވި އެވެ. އޭގެ އިތުރުން، އެކަމުގެ މުނާސަބާގައި ހާއްސަ ޖަލްސާއެއް ބޭއްވުމަށް ވެސް ތައްޔާރުވަމުންދާ ކަމަށް ސައުދު ވިދާޅުވި އެވެ.
ތިނަދުއިން މީހުން ބޭލި ހާދިސާއަކީ 1962 ވަނަ އަހަރު ހިނގައިދިޔަ ސުވަދީބް ބަގާވާތާއި ގުޅިފައިވާ ހާދިސާއެކެވެ. އެ ބަގާވާތުގެ ތެރެއިން، ރާއްޖޭގެ ދައުލަތުން ވަކިވެގަތުމަށް މަސައްކަތްކުރި ކަމަށް ބުނާ ދެކުނުގެ ތިން އަތޮޅުގެ މައި ރަށްކަމުގައިވާ ތިނަދޫ އަށް އޭރުގެ ބޮޑު ވަޒީރު އިބްރާހިމް ނާސިރު ސިފައިންނާއެކު ވަޑައިގެންނެވިކަމަށް ތާރީހީ ލިޔުންތަކުގައިވެ އެވެ.
އޭގެ ފަހުން އެ ރަށުގައި ހަމަނުޖެހުންތަކެއް ހިނގައި ނާސިރު ވަނީ ތިނަދޫ އިން މީހުން ބާލުވާފަ އެވެ. އެ މައްސަލައިގައި ތިނަދޫގެ އާންމުންގެ ތެރެއިން ބައެއް މީހުން މަރުވެ، ލާއިންސާނީ އަމަލުތަކެއް ހިންގާފައިވާ ކަމަށް ބައެއް ފަރާތްތަކުން ބުނެ އެވެ.
ތިނަދޫގައި ދެވަނަ ފަހަރަށް މީހުން އާބާދުވީ އޭގެ ހަތަރު އަހަރުފަހުން 1966 ގަ އެވެ.
