ވެރި ރަށް މާލެއިން މުދާ ބަރުކޮށްގެން ގދ. ތިނަދޫއަށް ދަތުރު ކުރި ބޯޓެއް ވ. އަތޮޅު ކަނޑަށް މިއަދު އަޑިއަށް ގޮސްފި އެވެ.
އަޑިއަށް ދިޔައީ ތިނަދޫއަށް ނިސްބަތްވާ "ޖަޒީރާ" ބޯޓެވެ. އެ ބޯޓުގައި އެ ވަގުތު ތިބި ހަތް މީހުން ލޯންޗަކަށް ނަގައި ސަލާމަތްކޮށްފައިވާ ކަމަށް ފުލުހުން ބުނެ އެވެ.
"މި ބޯޓުން ދަތުރުކުރި އެންމެން ވަނީ ފުލުހުންގެ އެހީތެރިކަމާއެކު ވ. ފުލިދޫ އަށް ގެންގޮސްފަ. އެމީހުންގެ ތެރޭގައި ހިމެނެނީ ހަތަރު ބިދޭސީ ފިރިހެނުންނާއި ތިން ދިވެހި ފިރިހެނުން. މި އެންމެންގެ ހާލުވެސް ރަނގަޅު،" މީޑިއާތަކަށް ފޮނުވި މެސެޖެއްގައި ފުލުހުން ބުންޏެވެ.
ފުލުހުން ވަނީ ޖަޒީރާ ބޯޓު އަޑިއަށް ދިޔައީ ވ. ފެލިދޫ ހުޅަނގު ކަނޑަށް ކަމަށެވެ. އެ ބޯޓު ފުންކުރުމުގެ މަސައްކަތް ކުރަމުންދާ ކަމަށް ވެސް ފުލުހުން ބުންޏެވެ.
އޭގެ އިތުރުން، އެ ބޯޓުން އުފުލި ބައެއް ސާމާނާއި ބޯޓުގެ ބައެއް ތަކެތި އޮޔާދީ އެކަމަށް ސަމާލުކަން ދޭން މޯލްޑިވްސް ނެޝަނަލް ޑިފެންސް ފޯސް އިން ވަނީ އާންމުންނަށް އިލްތިމާސްކޮށްފަ އެވެ.
"މި ތަކެތި އޮޔާދާ ކަމަށް ލަފާކުރެވެނީ ވ. ފެލިދޫގެ ފަސް ނޯޓިކަލް މޭލު ބޭރުން އިރުމައްޗަށް،" އެމްއެންޑީއެފް އިން ބުނެފައިވެ އެވެ.
