ލޭހިނގާ ނިޒާމުގެ ދުޅަހެޔޮކަން ދަމަހައްޓާ މީހުންނަށް، ޑިމެންޝިއާ ފަދަ ސިކުނޑީގެ ބަލިތަކުގެ ނުރައްކާ ކުޑަ ކަމަށް އާ ދިރާސާއަކުން ދައްކައިފި އެވެ.
އާ ދިރާސާއަކުން ދައްކާ ގޮތުގައި، އުމުރުން 48 އަހަރާއި 68 އަހަރާ ދެމެދުގެ މީހުންގެ ތެރޭގައި، ލޭގެ ޕްރެޝަރު އެއްވަރެއްގައި ހިފެހެއްޓުމާއި، ހަކުރު ބަލި ނެތުމާއި އަދި ދުންފަތުގެ އިސްތިއުމާލު ނުކުރުމަކީ، ޑިމެންޝިއާގެ މައްސަލަ ދުރުކޮށްދޭ ކަމެކެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހާމަކުރާ ގޮތުގައި ޑިމެންޝިއާއަކީ މުޅި ދުނިޔޭގައި ވެސް އެންމެ ހަލުވިކަމާއެކު އިތުރުވަމުންދާ ސިއްހީ އެއް މައްސަލަ އެވެ.
ކޮންމެ އަހަރަކު މުޅި ދުނިޔެއިން 10 މިލިއަން މީހުންނަށް އަލަށް މިކަން ކުރިމަތިވާ އިރު، 2050 ވަނަ އަހަރު އަންނަންވާއިރަށް މި ބަލި ޖެހިފައިވާ މީހުންގެ އަދަދު 150 މިލިއަނަށް ވުރެ މައްޗަށް އަރާނެ ކަމަށް ލަފާކުރެވެ އެވެ.
މި ބަލި ޖެހޭ މީހުންގެ އަދަދު އިތުރުވަމުންދާތީ، އުމުރުގެ މެދުތެރޭގައި ދިރިއުޅުމުގެ އާދަކާދަތަކަށް ބަދަލު ގެނެސްގެން ބަލިން ރައްކާތެރިވެ، ދުޅަހެޔޮކަމާއެކު މުސްކުޅިވުމަށް ކުރެވިދާނެ ކަންކަމަށް ދިރާސާކުރާ ފަރާތްތަކުން މިހާރު ވަނީ ސަމާލުކަން އިތުރުކޮށްފަ އެވެ.
