ޑިމޮކްރެޓިކް ރިޕަބްލިކް އޮފް ކޮންގޯގައި ނުރައްކާތެރި އެބޯލާ ވައިރަސް ފެތުރެމުންދާތީ، ޒެމްބިއާއިން ބަލި ދެނެގަތުމުގެ މަސައްކަތް ވަރުގަދަކޮށް، އެ ބަލި ޖެހިފައިވާ ކަމަށް ޝައްކުކުރެވުނު ދެ މީހަކު ތަހުލީލުތަކަށް ފަހު ނެގެޓިވް ކަމަށް ނިންމައިފި އެވެ.
ކޮންގޯގެ ކަމާބެހޭ ފަރާތްތަކުން ހުކުރު ދުވަހު ބުނި ގޮތުގައި، އާންމުކޮށް ނުފެންނަ އަދި ވެކްސިނެއް އުފެއްދިފައިނުވާ "ބުންޑިބުގްޔޯ" ނަމަކަށް ކިޔާ އެބޯލާ ވައިރަހުގެ ބާވަތް ޖެހިފައިވާ ކަމަށް ޝައްކުކުރެވޭ މީހުންގެ އަދަދު މިހާރު ވަނީ 1،028 އަށް އަރާފަ އެވެ.
މީގެ އިތުރުން ޔުގެންޑާއިން ވެސް މި ބަލީގެ ކޭސްތަކެއް ވަނީ ފެނިފަ އެވެ.
ޒެމްބިއާގެ ހެލްތު މިނިސްޓްރީން ހުކުރު ދުވަހުގެ ރޭ ބުނި ގޮތުގައި، ބޯޑަރު ހުރަސްކޮށް އެ ގައުމަށް އެބޯލާ ފެތުރުމުގެ ބިރު ބޮޑު ނަމަވެސް، ބަލި ޖެހިފައިވާ ކަމަށް ޝައްކު ކުރެވުނު ދެ މީހެއްގެ ލެބޯޓްރީ ޓެސްޓުތަކުގެ ނަތީޖާ ނެގެޓިވް އެވެ.
"ޒެމްބިއާއަށް އެތެރެވާ މީހުންނާއި، ގައުމުގެ ތެރޭގައި އުޅޭ މީހުންގެ ކިބައިން އެބޯލާގެ އަލާމާތްތައް ފެނޭތޯ ބެލުމަށްޓަކައި ސްކްރީން ކުރާނެ ވަސީލަތްތަކާއި އުސޫލުތައް މިހާރު ވަނީ އެކުލަވާލާފައި. އަދި ބޯޑަރުތަކުގައި މިހާރު ވެސް ދަނީ އެ އުސޫލުތަކަށް އަމަލުކުރަމުން،" ހެލްތު މިނިސްޓްރީގެ ބަޔާނުގައި އިތުރަށް ބުނެފައިވެ އެވެ.
މީގެ ގާތްގަނޑަކަށް 20 އަހަރު ކުރިން ޔުގެންޑާގެ ޕްރޮވިންސަކުން ފުރަތަމަ ފެނުނު "ބުންޑިބުގްޔޯ" ވައިރަހާ މެދު މާހިރުން ކަންބޮޑުވަނީ، މީހުން ގިނަ ސަރަހައްދެއްގައި ބަލި ފެތުރެމުން ދިޔައިރު ވެސް ގިނަ ދުވަސްތަކެއް ވަންދެން ބަލި ދެނެގަނެވިފައި ނުވުމުންނެވެ. މީގެ ސަބަބުން ބަލި ޖެހިފައިވާ މީހުންނާ ބައްދަލުވި މީހުން ދެނެގަނެ، އެމީހުން އެކަހެރިކުރުމަށް ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނާ ގޮތުގައި އެބޯލާ ވައިރަސް ޖެހުމުން ފުރަތަމަ ފެންނާނީ އާންމު ރޯގާގެ އަލާމާތްތަކެވެ. އޭގެ ތެރޭގައި ކުއްލިއަކަށް ހުން އައުމާއި، ވަރުބަލިވުމާއި، ގައިގައި ރިއްސުމާއި، ބޮލުގައި ރިއްސުމުގެ އިތުރުން ކަރުގައި ރިއްސުން ހިމެނެ އެވެ. އަދި އޭގެ ފަހުން ހޮޑުލުމާއި، ބޭރަށް ހިންގުމާއި، ހަށިގަނޑުގެ އެތެރެއާއި ބޭރުން ލޭ އައުމުގެ އިތުރުން ގުނަވަންތައް މަސައްކަތް ކުރުން ހުއްޓުން ފަދަ ނުރައްކާތެރި ހާލަތްތައް މެދުވެރިވެ އެވެ.
