ދެކުނު ކޮރެއާގެ މޫސުމާ ބެހޭ ރެކޯޑްތައް ބަލަހައްޓަން ފެށިތާ ގަރުނަކަށް ވުރެ ގިނަ ދުވަސް ވެފައިވާއިރު، މިހާތަނަށް އެ ގައުމުން އެންމެ ހޫނުގަދަވި ދުވަހުގެ ގޮތުގައި އޮގަސްޓް 2 ވަނަ ދުވަސް ރެކޯޑްކޮށްފި އެވެ.
ހޫނުގެ އަސަރު ބޮޑަށް ކޮށްފައިވާ ސަރަހައްދުތަކުގައި ބޭރުތެރޭގައި އުޅުން "ވަގުތުން" ހުއްޓާލުމަށް ކަމާބެހޭ އިދާރާތަކުން ވަނީ އާންމުންނަށް އަންގާފަ އެވެ.
ދެކުނު ކޮރެއާގެ މީޓިއޮރޮލޮޖިކަލް އެޑްމިނިސްޓްރޭޝަން (ކޭއެމްއޭ) އިން އެ އިދާރާގެ ވެބްސައިޓުގައި ހާމަކޮށްފައިވާ ގޮތުގައި، އެ ގައުމުގެ އިރުދެކުނު ސިޓީއެއް ކަމަށްވާ ޔަންގްސަންގެ ހޫނުމިން އެ ދުވަހުގެ މެންދުރުފަހު 1:26 ގައި ވަނީ 42.5 ޑިގްރީ ސެލްސިއަސްއަށް އުފުލިފަ އެވެ.
ޔަންގްސަން ސިޓީއަކީ މިހާރު ކުރިމަތިވެފައިވާ ހޫނު ރާޅުގެ މައި މަރުކަޒަށް ވެފައިވާއިރު، އޮގަސްޓް 2 ވަނަ ދުވަހަކީ އެ ސިޓީގެ ހޫނުމިން ވިދިވިދިގެން 40 ޑިގްރީ ސެލްސިއަސްއަށް ވުރެ މަތީގައި ހުރި ފަސްވަނަ ދުވަހެވެ. މީގެ އިތުރުން ދޭގޫ އަދި ބޫސާން ފަދަ ގިނަ ސިޓީތަކުގެ ހޫނުމިން ވެސް މިހާރު ހުރީ 30 ގެ މަތީ ނަންބަރުތަކުގަ އެވެ.
ކޭއެމްއޭގެ ތަފާސްހިސާބުތަކުން ދައްކާ ގޮތުގައި، 1970 ގެ އަހަރުތަކުގައި އަހަރަކު އެވްރެޖްކޮށް އަށް ދުވަހު ހޫނު ރާޅު ކުރިމަތިވި ނަމަވެސް، ފާއިތުވި ފަސް އަހަރުގެ ތެރޭގައި އެ އަދަދު ވަނީ 19 ދުވަހަށް ވުރެ މައްޗަށް އަރާފަ އެވެ.
ދެކުނު ކޮރެއާގައި "ހޫނު ރާޅުގެ ދުވަހެއް" ކަމަށް ބަލަނީ އެންމެ މަތީ ހޫނުމިން މަދުވެގެން 33 ޑިގްރީ ސެލްސިއަސްއަށް އަރާ ދުވަސްތަކަށެވެ. އަދި "ޓްރޮޕިކަލް ނައިޓް" ނުވަތަ ހޫނު ރޭގަނޑެއްގެ ގޮތުގައި ބަލަނީ ރޭގަނޑުގެ އެންމެ ދަށް ހޫނުމިން 25 ޑިގްރީ ސެލްސިއަސްއަށް ވުރެ ދަށް ނުވެ ހުންނަ ރޭރެއަށެވެ.
