ވިޔަފާރި ކުންފުނިތަކާއި މުއައްސަސާތަކުގެ މެދުގައި ދުޅަހެޔޮ ދިރިއުޅުމާއި ޓީމް ރޫހު އާލާކުރުމުގެ މަގުސަދުގައި ވީރަން މޯލްޑިވްސް އިން އިންތިޒާމުކޮށްގެން ބާއްވާ ހާއްސަ ކޯޕަރޭޓް ރަން "ބީއެމްއެލް ވީރަން - ކޯޕަރޭޓްސް" ދުވުމުގައި ފިރިހެން 11 ޓީމާއި އަންހެން 7 ޓީމް ބައިވެރިވެއްޖެ އެވެ.
މި ދުވުމަށް ހުޅުވާލި މަދު ދުވަސްކޮޅާ ބަލާފައި ލިބުނު ތަރުހީބު ރަނގަޅު ކަމަށް ވީރަންއިން ބުންޏެވެ.
ކްރޮސްރޯޑްސް މޯލްޑިވްސްގައި މާދަމާ ބާއްވާ މި ދުވުމަކީ ކޮންމެ ޓީމެއްގައި ފަސް ދުވުންތެރިން ހިމެނޭ، އަދި ކޮންމެ ދުވުންތެރިއަކު އެއް ކިލޯމީޓަރު ދުވަންޖެހޭ (ޖުމްލަ 5 ކިލޯމީޓަރުގެ) ރިލޭ ރޭހެކެވެ.
ފިރިހެން ކެޓަގަރީގައި ބައިވެރިވި ޓީމު:
- ބޭންކް އޮފް މޯލްޑިވްސް
- މޯލްޑިވްސް އިސްލާމިކް ބޭންކް
- ރީޖަނަލް އެއާޕޯޓްސް
- އޭޑީކޭ ސައިނަޖީ
- ޓްރެކް އެންޑް ފީލްޑް އެސޯސިއޭޝަން
- އެލީޓް ރަނާސް
- ރަނިންމޯޑް އެތުލެޓިކްސް
- ކްރޮސްރޯޑްސް (4 ޓީމް)
އަންހެން ކެޓަގަރީގައި ބައިވެރިވި ޓީމު:
- މޯލްޑިވްސް އިސްލާމިކް ބޭންކް
- އޭޑީކޭ ސައިނަޖީ
- ރަނިންމޯޑް އެތުލެޓިކްސް
- ރީޖަނަލް އެއާޕޯޓްސް
- ކްރޮސްރޯޑްސް (3 ޓީމް)
ރާއްޖޭގައި ހިންގާ ކުންފުނިތަކާއި މުއައްސަސާތަކުގެ އިތުރުން ޖަމިއްޔާ ޖަމާއަތްތަކަށް ހާއްސަކޮށްގެން ބާއްވާ މި ރޭހުގައި ބައިވެރިވާ ކޮންމެ ޓީމެއްގައިވެސް ތިބެންޖެހޭނީ އެ ކުންފުންޏެއްގެ ފުލްޓައިމް މުވައްޒަފުންނެވެ.
އަންހެން އަދި ފިރިހެން ދެ ކެޓަގަރީންވެސް އެންމެ މޮޅު ތިން ޓީމަށް ފައިސާގެ އިނާމާއި ތަށި ދިނުމަށް ވަނީ ހަމަޖެހިފަ އެވެ.
ދުވުމުގެ އެއްވަނަ ޓީމަށް 20،000ރ. ދިނުމަށް ހަމަޖެހިފައިވާއިރު، ދެވަނަ ޓީމަށް 15،000ރ. އަދި ތިންވަނަ ޓީމަށް 10،000ރ. ދިނުމަށް ވަނީ ހަމަޖެހިފަ އެވެ. މީގެ އިތުރުން ރޭސް ފުރިހަމަކުރާ ކޮންމެ ދުވުންތެރިޔަކަށް ފިނިޝާ މެޑަލްއެއް ދިނުމަށް ވެސް ވަނީ ހަމަޖެހިފަ އެވެ.
މި ހަރަކާތް ކުރިއަށް ދާނީ ބޭންކް އޮފް މޯލްޑިވްސް (ބީއެމްއެލް) އާއެކު ވެވުނު ދެ އަހަރު ދުވަހުގެ ޕާޓްނަޝިޕް އެއްބަސްވުމެއްގެ ދަށުންނެވެ. މި ރޭހަކީ ކުޅިވަރުގެ ވާދަވެރިކަމާއެކު ކޯޕަރޭޓް އިޖުތިމާއީ ގުޅުން ބަދަހިކޮށް، މަސައްކަތުގެ މާހައުލުގައި ދުޅަހެޔޮކަން އިތުރުކުރުމަށް ލިބިގެންދާނެ ރަނގަޅު ފުރުސަތެކެވެ.
