މަރުވެފައިވާ 700 އަށްވުރެ ގިނަ މީހުންގެ އެކައުންޓަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން 10 މިލިއަން ރުފިޔާ ޖަމާކޮށްފައިވާ ކަމަށް އެ އެޖެންސީން ބުނެފި އެވެ.
އެންސްޕާގެ ސީއީއޯ އާމިނަތު ޝިރުނާ ޕީއެސްއެމް ނިއުސްއަށް ވިދާޅުވީ އެ އެޖެންސީގެ މޮނިޓަރިން ސެކްޝަން 2020 ވަނަ އަހަރު އުވާލުމާ ގުޅިގެން ވޭތުވެދިޔަ ދުވަސްތަކުގައި މަރުވެފައިވާ މީހުންގެ 10 މިލިއަނަށްވުރެ ގިނަ ރުފިޔާ ޖަމާކުރެވިފައިވާ ކަމަށެވެ.
"ގާތްގަނޑަކަށް 10 މިލިއަނަށް ވުރެ ގިނަ ރުފިޔާ ނިޔާވެފައިވާ މީހުންގެ އެކައުންޓްތަކަށް ޖަމާވެފައިވާކަންވަނީ ހާމަވެފައި. މިއީ ކިހާ ބޮޑު ގެއްލުމެއްތޯ؟ މިހާރު އަޅުގަނޑު މިދަނީ އަލުން އެސެކްޝަންގެ މަސައްކަތް އިޔާދަކޮށް ސިސްޓަމް އިތުރަށް ހަރުދަނާކުރުމުގެ މަސައްކަތް މިދަނީ ކުރަމުން." ޝިރުނާ ވިދާޅުވި އެވެ.
އެންސްޕާގެ މޮނިޓަރިން ސެކްޝަން އުވާލުމާ ގުޅިގެން މަރުވެފައިވާ މީހުންގެ އިތުރުން ހައްގު ނޫން މީހުންނަށްވެސް ފައިސާ ޖަމާވި ކަމަށް ޝިރުނާ ވިދާޅުވި އެވެ. އޭނާ ވިދާޅުވީ ފެންމަތިވި މައްސަލަތަކާ ގުޅިގެން މޮނިޓަރިން ސެކްޝަން އަލުން އެކުލަވާލައި މައްސަލަތައް ހައްލުކުރުމުގެ މަސައްކަތް ކުރަމުންދާ ކަމަށެވެ.
އެންސްޕާއަކީ ގައުމީ އިޖުތިމާއީ ސިއްހީ އިންޝުއަރަންސް ސްކީމް ހިންގާ ބެލެހެއްޓުމާއި އިޖުތިމާއީ ރައްކާތެރިކަމުގެ ގާނޫނުގެ ދަށުން ކަނޑައަޅާފައިވާ ޕްރޮގްރާމްތައް ރާވައި ހިންގުމަށް 2008 ވަނަ އަހަރު އުފެއްދި އިދާރާއެކެވެ.
އެންސްޕާއިން ހިންގާ ޕްރޮގްރާމްތަކުގެ ތެރޭގައި ނުކުޅެދުންތެރިކަން ހުންނަ ފަރާތްތަކަށް މާލީ އެހީ ދިނުމުގެ ޕްރޮގްރާމާއި، ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީގެ ޕްރޮގްރާމާއި، ފަގީރު ހާލަތުގައި ދިރިއުޅޭ މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނާއި އެ ކުދިން ބަލަހައްޓާ ފަރާތަށް ދެވޭ އެހީ ޕްރޮގްރާމް، ފަގީރު ހާލަތުގައި ދިރިއުޅޭ ފަރާތްތަކުން ކާބޯތަކެތި ގަތުމަށް ދެވޭ މާލީ އެހީ ދިނުމުގެ ކަންކަން ހިމެނެ އެވެ.
އެންސްޕާއިން "މެޑިކަލް ވެލްފެއާ" ގެ ނަމުގައި ކުރިން ބޭސްފަރުއަށް އެހީ ދިނުމުގެ ކަންކަން ކުރިއަށް ގެންދިޔަ އެވެ. ނަމަވެސް އެ ހިދުމަތް އާސަންދައިގެ ދަށުން ދޭ ގޮތަށް މިދިޔަ މެއި މަހު ވަނީ ބަދަލުކޮށްފަ އެވެ.
