މާލެ ވަށައިގެން އޮންނަ ބޮޑުތަކުރުފާނު މަގު ހަތަރު ލޭނަށް ފުޅާކުރަން ހިންގާ މަޝްރޫއުގެ ދަށުން އެމްޕީއެލް ހުންނަ ސަރަހައްދުން ފެށިގެން ސުނާމީ ބިނާއާ ހަމައަށް އެ މަގު ތަރައްގީކުރުމުގެ މަސައްކަތް އަންނަ ނޮވެމްބަރު މަހުގެ ނިޔަަލަށް ނިންމާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ބޮޑުތަކުރުފާނު މަގު ތަރައްގީކުރުމުގެ ދެން އޮތް ފިޔަވަހީގެ މަސައްކަތް ހަތަރު މަސް ދުވަހުގެ ތެރޭގައި ނިންމާލާނެ ކަމަށް މުއިއްޒު އެކްސްގައި ވިދާޅުވީ މިހާރު ތަރައްގީކޮށް ނިމިފައިވާ ބައި އިތުރަށް ތަރައްގީކުރާނެ ގޮތުގެ ކޮންސެޕްޓު ހިމެނޭ ވީޑިއޯ އާއި ފޮޓޯތަކެއް ވެސް ހިއްސާކުރައްވަމުންނެވެ.
އެ މަންޒަރުތަކުން ދައްކުވައިދެނީ އެ ދިމާލުން ލޯންޗުތައް ކައިރިކުރާ ސަރަހައްދުތަކުގައި ލަކުޑި ފާލަންތަކެކެވެ. މުއިއްޒު ވިދާޅުވީ މި ފާލަންތައް ތަރައްގީކުރުމުގެ މަސައްކަތް ވެސް ނޮވެމްބަރުގެ ނިޔަލަށް ނިމޭނެ ކަމަށެވެ.
ސަރުކާރުން ބުނާ ގޮތުގައި ބޮޑުތަކުރުފާނު މަގު ތަރައްގީކުރުމުގެ މަޝްރޫއަކީ ޒަމާނީ ފެންވަރުގައި މަގު ތަރައްގީކުރުމުގެ އިތުރުން، މާލޭގެ ޓްރެފިކަށް ލުޔެއް ހޯދަން ވެސް ފަހިކޮށްދޭނެ މަޝްރޫއެކެވެ.
ބޮޑުތަކުރުފާނު މަގު ފުޅާކޮށް ތަރައްގީކުރުމުގެ މަޝްރޫއުގެ ދަށުން، މި މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ވަނީ ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް އޮން ސަރަހައްދުގެ މަސައްކަތް އެއްކޮށް ނިންމާފަ އެވެ. އެ ކުންފުނިން މި ސަރަހައްދު ތަރައްގީކޮށްދިނީ 144.5 މިލިއަން ރުފިޔާގެ އަގަކަށެވެ.
ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ޓައިމްލައިން
- ހެންވޭރު ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް ބޮޑުތަކުރުފާނު މަގު ތަރައްގީކުރަން އެމްޓީސީސީއާ ހަވާލުކުރުން - އޭޕްރިލް 9، 2025
- މަޝްރޫއުގެ ފުރަތަމަ ފިޔަވަހީގެ ސެގްމަންޓު 1، އެއީ އެމްއެމްއޭ ކުރިމަތީ އޮންނަ ސަރަހައްދުގެ މަގު ފުޅާކޮށް، ތަރައްގީކުރުމުގެ އަމަލީ މަސައްކަތް ފެށުން - އޮގަސްޓު 21، 2025
- ސެގްމަންޓު 1، ތަރައްގީކުރުމުގެ މަސައްކަތް ނިންމާ މަގު އާންމުންނަށް ހުޅުވާލުން - ޑިސެމްބަރު 9، 2025
- މަޝްރޫއުގެ ދެވަނަ ފިޔަވަހީގެ ސެގްމަންޓު 2، އެއީ މަސް މާރުކޭޓުން ފެށިގެން ނޯތު ހާބަރާ ހަމައަށް އޮންނަ ސަރަހައްދުގެ، މަގު ފުޅާކޮށް، ތަރައްގީކުރުމުގެ އަމަލީ މަސައްކަތް ފެށުން - ޑިސެމްބަރު 9، 2025
- ދެވަނަ ފިޔަވަހީގެ ސެގްމަންޓު 2، ތަރައްގީކުރުމުގެ މަސައްކަތް ނިންމާ މަގު އާންމުންނަށް ހުޅުވާލުން - ފެބްރުއަރީ 15، 2026
- މަޝްރޫއުގެ ފުރަތަމަ ފިޔަވަހީގެ ސެގްމަންޓު 2 އިން 5 އަށް، އެއީ ހެންވޭރު ފެރީ ޓާމިނަލުން ފެށިގެން ޖުމްހޫރީ މައިދާނާ ދޭތެރޭ އޮންނަ ސަރަހައްދުގެ މަގު ފުޅާކޮށް، ތަރައްގީކުރުމުގެ އަމަލީ މަސައްކަތް ފެށުން - މާޗު 24، 2026
- ފުރަތަމަ ފިޔަވަހީގެ ސެގްމަންޓު 2 އިން 5 އަށް މަގު ހެދުމުގެ މަސައްކަތް ނިންމާ އާންމުންނަށް ހުޅުވާލުން - ޖުލައި 25، 2026
އެމްޓީސީސީން މި މަސައްކަތް ކުރީ އެކި ސެގްމަންޓުތަކަށް ބަހާލައިގެންނެވެ. އެންމެ ފުރަތަމަ އެ ކުންފުނިން ތަރައްގީކުރީ އެމްއެމްއޭ ކުރިމައްޗަށް އޮންނަ މަގުގެ ސަރަހައްދެވެ. ދެން ތަރައްގީކުރީ މަސް މާރުކޭޓާއި ނޯތު ހާބަރާ ދެމެދު އޮންނަ ސަރަހައްދެވެ. އެންމެ ފަހުން ނިންމާލީ ހެންވޭރު ފެރީ ޓާމިނަލުން ފެށިގެން ޖުމްހޫރީ މައިދާނާ ހަމަައަށް އޮންނަ ސަރަހައްދެވެ.
އެމްޓީސީސީއަށް މި ހުރިހާ މަސައްކަތެއް ނިންމާލެވުނީ ސޮއިކުރިތާ 15 މަސް ފަހުން، އަދި އަމަލީ މަސައްކަތް ފެށިތާ 11 މަސް ދުވަސް ފަހުންނެވެ.
