ބީބީސީން އާންމުކުރި އާ ރިޕޯޓަކާއި ޑޮކިއުމެންޓްރީއެއްގައި މަޝްހޫރު އެކްޓަރު އަދި ލަވަކިޔުންތެރިޔާ ޖެރެޑް ލެޓޯގެ މައްޗަށް ޖިންސީ ގޯނާގެ ސީރިއަސް ތުހުމަތުތަކެއް ދިހަ އަންހެނަކު ކޮށްފިއެވެ.
މީގެ ތެރޭގައި ހިމެނޭ ބައެއް އަންހެނުން ބުނެފައިވާ ގޮތުގައި އެ ހާދިސާތައް ހިނގިއިރު އެމީހުންނަކީ ކުޑަކުދިންނެވެ. ނަމަވެސް ލެޓޯ ވަނީ މި ހުރިހާ ތުހުމަތުތަކެއް ދޮގުކޮށްފަ އެވެ.
ބީބީސީއާ ވާހަކަ ދެއްކި އަންހެނުންގެ ތެރެއިން ހަތަރު މީހަކު ވަނީ ލެޓޯގެ ފަރާތުން ޖިނާއީ ކުށުގެ އަމަލުތައް ފެނިފައިވާ ކަމަށް ބުނެފަ އެވެ. އޭގެ ތެރެއިން އެއް އަންހެނަކު ބުނި ގޮތުގައި އޭނާގެ އުމުރުން 17 އަހަރުގައި މޮޓެލްއެއްގެ ފާހާނާ ތެރޭގައި ލެޓޯ ވަނީ އޭނާއަށް ޖިންސީ ހަމަލާއެއް ދީފަ އެވެ. އަދި އެހެން އަންހެނަކު ބުނި ގޮތުގައި އޭނާގެ އުމުރުން 17 އަހަރުގައި ކެލިފޯނިއާގައި ލެޓޯއާއެކު ޖިންސީ ގުޅުން ހިންގާފައިވެ އެވެ. އެއީ އެ ދުވަސްވަރު އެ ސްޓޭޓްގެ ގާނޫނު ބުނާ ގޮތުން ރޭޕްގެ އަމަލެކެވެ.
މީގެ އިތުރުން، އުމުރުން 16 އަހަރުގައި ލެޓޯ އޭނާއަށް ތަކުރާރުކޮށް ޖިންސީ ވާހަކަތައް ހިމެނޭ ފޯނު ކޯލުތައް ކުރި ކަމަށާއި، އޭނާ "ގްރޫމް" ކުރަން މަސައްކަތް ކުރި ކަމަށް އެހެން އަންހެނަކު ތުހުމަތު ކުރިއެވެ. އަދި ފަހުން އެ ގުޅުމާ ބެހޭގޮތުން ވާހަކަ ނުދެއްކުމަށް އެއްބަސްވުމެއްގައި ސޮއިކުރަން ލެޓޯ އެދުނު ނަމަވެސް، އެކަމަށް އޭނާ އިންކާރު ކުރި ކަމަށް ބުނެފައިވެ އެވެ. މި ރިޕޯޓުގައިވާ ތުހުމަތުތަކާ ގުޅިގެން މިހާތަނަށް ލެޓޯގެ މައްޗަށް އެއްވެސް ޖިނާއީ ދައުވާއެއް އުފުލާފައެއް ނުވެ އެވެ.
ބީބީސީގެ ރިޕޯޓުގައިވާ ގޮތުން، އިތުރު ހަތަރު އަންހެނަކު ވެސް ވަނީ އެމީހުންގެ ޒުވާން އުމުރުގައި ލެޓޯގެ ފަރާތުން އާދަޔާ ހިލާފު ޖިންސީ ފޯނު ކޯލުތަކެއް ލިބުނު ކަމަށް ބުނެފަ އެވެ. މި ހާދިސާތައް ހިނގާފައިވަނީ 2002 އާއި 2016 އާ ދެމެދުގައެވެ. އެ ދުވަސްވަރު ލެޓޯގެ އުމުރަކީ 30 އާއި 40 ގެ އަހަރުތަކެވެ. މިހާރު އޭނާގެ އުމުރަކީ 54 އަހަރެވެ.
މި ތުހުމަތުތަކާ ގުޅިގެން އީމެއިލް މެދުވެރިކޮށް ދިން ކުރު ބަޔާނެއްގައި ލެޓޯ ބުނެފައިވަނީ އޭނާގެ މުޅި ހަޔާތުގައި ވެސް އެއްވެސް މީހަކަށް ޖިންސީ ގޯނާއެއް ކޮށްފައި ނުވާނެ ކަމަށެވެ. އަދި އެ ތުހުމަތުތަކަކީ ކަނޑައެޅިގެން ދޮގު ވާހަކަތަކެއް ކަމަށް އޭނާ ބުންޏެވެ.
ބީބީސީން ނެރުނު ޑޮކިއުމެންޓްރީގައި ތުހުމަތު ކުރި ގިނަ އަންހެނުންގެ މޫނު ވަނީ ފޮރުވާފަ އެވެ. ނަމަވެސް އެމީހުންގެ ވާހަކަތަކަކީ ތެދުކަން ކަށަވަރު ކުރުމަށްޓަކައި އެމީހުންގެ އާއިލާގެ މެންބަރުންނާއި ރައްޓެހިންނާ ވާހަކަ ދައްކައި، ފޮޓޯތަކާއި މެސެޖުތައް ބަލާފައިވާ ކަމަށް ބީބީސީން ބުނެއެވެ.
ލެޓޯގެ ބޭންޑް "ތާޓީ ސެކަންޑްސް ޓު މާސް" ގައި މަސައްކަތް ކުރި ދެ މީހަކު ވެސް ވަނީ ކޮންސަރޓް ޓުއާ ތަކުގައާއި މިއުޒިކް ރެކޯޑް ކުރާ ވަގުތުތަކުގައި ލެޓޯ އާންމުކޮށް ކުޑަކުދިން އޭނާގެ ކޮޓަރިއަށް ގެންދާ ކަމަށް ހެކިބަސް ދީފައެވެ.
ޖެރެޑް ލެޓޯއަކީ "މައި ސޯ-ކޯލްޑް ލައިފް" އާއި "ޑަލަސް ބަޔާސް ކްލަބް" ފަދަ ފިލްމުތަކުން މަޝްހޫރުކަން ހޯދާފައިވާ އެކްޓަރެކެވެ. އޭނާ ވަނީ 2014 ވަނަ އަހަރު އެންމެ މޮޅު ސަޕޯޓިން އެކްޓަރުގެ އޮސްކާ އެވޯޑް ވެސް ކާމިޔާބުކޮށްފައެވެ. މީގެ ކުރިން ވެސް އެކި ފަހަރުމަތިން އޭނާގެ މައްޗަށް ޖިންސީ ގޯނާގެ ތުހުމަތުތައް ކުރެވިފައިވާއިރު، އެ ހުރިހާ ކަމަކަށް ވެސް އޭނާ ވަނީ އިންކާރުކޮށްފަ އެވެ.
