ބޭންކް އެކައުންޓްތައް ކުއްޔަށް ދިނުމާއި އުޖޫރައެއްގެ ބަދަލުގައި އެކައުންޓްގެ ކޮންޓްރޯލް އެހެން ފަރާތްތަކަށް ދިނުމަކީ ޖިނާއީ ބޮޑު ކުށަކަށް ވާތީ އެކަމަށް ސަމާލުވުމަށް ދިވެހި ފުލުހުންގެ ހިދުމަތުން މިއަދު އިލްތިމާސްކުރައްވައިފި އެވެ. ފުލުހުން މިކަމަށް އިލްތިމާސްކުރެއްވީ މަކަރާއި ހީލަތުން ފައިސާ ހޯދާ ފަރާތްތަކުން އާންމުންގެ ބޭންކް އެކައުންޓްތައް ބޭނުންކޮށްގެން ކުށްކޮށްގެން ހޯދާ ފައިސާ ދައުރުކުރާ މައްސަލަތައް އިތުރުވަމުންދާތީ އެވެ.
ފުލުހުން ހާމަކުރެއްވި ގޮތުގައި ޓިކްޓޮކް އަދި ޓެލެގްރާމް ފަދަ ސޯޝަލް މީޑިއާ މަންސަތަކުގައި "ދުވަހު މުސާރަ" ދޭނެ ކަމަށް ބުނެ ބޭންކް އެކައުންޓްތައް ހޯދުމަށް ކުރާ އިޝްތިހާރުތައް މިހާރު ވަނީ ވަރަށް ބޮޑަށް އިތުރުވެފަ އެވެ. މިއީ މަކަރާއި ހީލަތުން ފައިސާ ހޯދާ ފަރާތްތަކުން ގެންގުޅޭ އާ އުކުޅެއް ކަމަށާއި، އަމިއްލަ އެކައުންޓް އެހެން މީހަކަށް ބޭނުންކުރަން ދިނުމަކީ ކުށްކޮށްގެން ހޯދާ ފައިސާ ދައުރުކުރުމުގައި ބައިވެރިވުން ނުވަތަ "މަނީ މިއުލް" އެއްގެ ގޮތުގައި އަމަލުކުރުން ކަމަށް ފުލުހުން ވިދާޅު ވެ އެވެ.
މިފަދަ މުއާމަލާތްތަކުގައި ބައިވެރިވާ ފަރާތްތަކަށް އޮތް ގާނޫނީ ނުރައްކަލަށް އަލިއަޅުވާލައްވަމުން ފުލުހުން ވިދާޅުވީ، ބޭންކް އެކައުންޓެއް މެދުވެރިކޮށް ހިންގާ ކޮންމެ މުއާމަލާތަކަށް ގާނޫނީ ގޮތުން ޒިންމާވާންޖެހޭނީ އެ އެކައުންޓެއްގެ ވެރިފަރާތް ކަމަށެވެ. އެހެންކަމުން އެއީ ކާކުކަން ނޭނގޭ މީހަކު ކުރި ކަމެއް ކަމަށް ބުނެ ގާނޫނީ ޒިންމާއިން ބަރީއައެއް ނުވެވޭނެ އެވެ. މިފަދަ ކަންކަމުގައި ބައިވެރިވާ ފަރާތްތަކަށް މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން ބޮޑެތި އަދަބުތައް ލިބުމުގެ ފުރުސަތު އޮތްކަން ފުލުހުން ފާހަގަ ކުރައްވަ އެވެ.
މީގެ އިތުރުން މިފަދަ މައްސަލަތަކުގައި ޝާމިލުވާ ފަރާތްތަކުގެ ބޭންކް އެކައުންޓްތައް ފްރީޒްކުރުމާއި، މުސްތަގުބަލުގައި ބޭންކިންގ ހިދުމަތްތައް ލިބުމަށް ހުރަސް އެޅި މާލީ ނިޒާމުން ބޭރުކުރުން ފަދަ ބޮޑެތި ގެއްލުންތަކާ ކުރިމަތިލާންޖެހިދާނެ ކަމުގެ އިންޒާރުވެސް ފުލުހުން ވަނީ ދެއްވާފަ އެވެ. އެހެންކަމުން އެއްވެސް ފަރާތަކާ ބޭންކް އެކައުންޓްގެ ޔޫޒަރނޭމް، ޕާސްވޯޑް، ޕިން ނުވަތަ އޯޓީޕީ ހިއްސާނުކުރުމަށް ފުލުހުން ވަނީ ހަރުކަށިކޮށް އިރުޝާދު ދެއްވާފަ އެވެ.
ޝައްކުކުރެވޭ ފަދަ އެއްވެސް ކަމެއް ފާހަގަކުރެވިއްޖެނަމަ ލަސްނުކޮށް ފުލުހުންގެ އިމަޖެންސީ ނަންބަރު 911 އަށް ނުވަތަ އެންޓި-ސްކޭމް ސެންޓަރުގެ ނަންބަރު 125 (އެކްސްޓެންޝަން 2020) އަށް ގުޅައި ރިޕޯޓްކުރުމަށް ފުލުހުން ވަނީ އެދިވަޑައިގެންފައެވެ.
