ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ނައިބު ރައީސުންގެ މަގާމަށް ހަތަރު ބޭފުޅަކު ވާދަކުރައްވާނެކަން މިއަދު އިއުލާންކުރައްވައިފި އެވެ.
އެންމެ ފުރަތަމަ އެ މަގާމަށް ވާދަކުރާކަން އިއުލާން ކުރެއްވީ ބާރަށު ދާއިރާގެ މެންބަރު އިބްރާހިމް ޝުޖާއު އެވެ. ޕީއެންސީގައި މިހާރު ތިއްބެވި ހަތް ނައިބު ރައީސުންގެ ތެރޭގައި އޭނާ ހިމެނިވަޑައިގަންނަވަ އެވެ. އޭނާ އެ މަގާމަށް ވާދަކުރައްވަނީ ރައީސް މުހައްމަދު މުއިއްޒުގެ ތާއިދާއި ރުހުމާއެކު ކަމަށް ރާއްޖޭގެ ޓީވީ ޗެނަލަކަށް ދެއްވި އިންޓަވިއުއެއްގައި ވަނީ ވިދާޅުވެފަ އެވެ.
އެއަށްފަހު އެ މަގާމަށް ވާދަކުރައްވާނެކަން އިއުލާން ކުރެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. އޭނާއަކީ މިހާރު ވެސް ޕީއެންސީގެ ނައިބު ރައީސުންގެ ތެރޭގައި ހިމެނޭ ބޭފުޅެކެވެ. ސައީދު ވެސް ވިދާޅުވި ގޮތުގައި އޭނާ ވާދަކުރައްވަނީ މުއިއްޒުގެ ތާއިދާއި އިތުބާރާއެކު އެވެ.
އެއަށްފަހު ވާދަކުރައްވާނެކަން އިއުލާން ކުރެއްވީ ނިލަންދޫ ދާއިރާގެ މެންބަރު ފާތިމަތު ސައުދާ އެވެ. އޭނާއަކީ މުއިއްޒުގެ އެއްބަނޑު ކޮއްކޮ އެވެ. މީގެކުރިން ސިޔާސީ ޕާޓީއެއްގައި އިސް މަގާމެއް ސައުދާ އަދާކުރައްވާފައެއް ނުވެ އެވެ.
ޔޫތު އެންޑް ސްޕޯޓްސް މިނިސްޓަރު އަބްދުالله ރާފިއު ވެސް ވަނީ އެ މަގާމަށް ވާދަކުރައްވާނެކަން އިއުލާން ކުރައްވާފަ އެވެ. އެންމެ ފަހުން ބޭއްވި ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީގެ ކެމްޕޭން މެނޭޖަރަކަށް ހުންނެވީ ރާފިއު އެވެ. އޭނާއަކީ ވެސް ސިޔާސީ ޕާޓީއެއްގައި އިސް މަގާމެއް މީގެކުރިން އަދާކުރައްވާފައި ބޭފުޅެއް ނޫނެވެ.
މިވަގުތު ޕީއެންސީގެ ނައިބު ރައީސުންގެ ގޮތުގައި ތިއްބެވި ބޭފުޅުންގެ ތެރޭގައި ފިޝަރީޒް މިނިސްޓަރު އަހުމަދު ޝިޔާމް، ކުރީގެ ޑިފެންސް މިނިސްޓަރު ޣައްސާން މައުމޫން، ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) އަދި އެލްޖީއޭގެ ސީއީއޯ މުހައްމަދު ނިމާލް އަދި މިހާތަނަށް ކެންޑިޑެސީ އިއުލާން ކުރައްވާފައެއް ނުވެ އެވެ.
ރައީސުލްޖުމްހޫރިއްޔާގެ ނައިބުގެ މަގާމުގައި ހުންނެވި ހުސައިން މުހައްމަދު ލަތީފަކީ ވެސް ޕީއެންސީގެ ނައިބު ރައީސުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
ޕީއެންސީގެ ކޮންގްރެސް ބޭއްވުމަށް ތާވަލުކޮށްފައި ވަނީ އަންނަ ސެޕްޓެމްބަރު މަހުގެ މެދުތެރޭގަ އެވެ. އެ ޕާޓީގެ އިސް މަގާމުތަކަށް މެންބަރުން އެ ކޮންގްރެސްގައި އިންތިހާބު ކުރާނެ އެވެ.
