ނެޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ) އިން އިނގިރޭސިވިލާތުން ރާއްޖެއަށް ކަނޑައަޅުއްވާފައިވާ ހުންނަވާ ސަފީރު ނިކް ލޯއާ ބައްދަލުކޮށް ގުޅުން ބަދަހިކުރުމަށް މަޝްވަރާކޮށްފި އެވެ.
މި ބައްދަލުވުމުގައި އެ ސެންޓަރުގެ ފަރާތުން އިސްކޮށް ބައިވެރިވެވަޑައިގެންނެވީ ޑިރެކްޓާ ޖެނެރަލް، މޭޖާ ޖެނަރަލް ރިޓަޔަޑް ވައިސް ވަހީދު އެވެ.
ދެ ފަރާތުން އިސްކަންދޭ މުހިންމު ކަންކަމާއި، ގުޅުން ބަދަހިކުރެވިދާނެ ދާއިރާތަކާ މެދު މި ބައްދަލުވުމުގައި މަޝްވަރާކޮށްފައިވެ އެވެ. އިތުރު މައުލޫމާތެއް މި ބައްދަލުވުމާ ގުޅޭގޮތުން ހާމަކޮށްފައެއް ނުވެ އެވެ.
ކައުންޓާ ޓެރަރިޒަމްގެ ދާއިރާއިން ރާއްޖެ އާއި އިނގިރޭސިވިލާތާ ދެމެދު ގާތް ގުޅުންތަކެއް އޮވެ އެވެ. އިނގިރޭސިވިލާތުގެ ސަރުކާރުން ހިންގާ "އިންޓަނޭޝަނަލް ޕްރޮޓެކްޓް އެންޑް ޕްރިޕެއާ" ޕްރޮގްރާމެއް މިދިޔަ އަހަރު ވެސް ދިވެހި ފުލުހުންނަށް ހިންގި އެވެ.
ޓެރަރިސްޓު ހަމަލާއެއް ރާއްޖެއަށް ދީފި ނަމަ ހުޝިޔާރުވެ ތިބުމަށާއި ފާރަވެރިކަމާއެކު އެފަދަ ހަމަލާއަކަށް ރެސްޕޮންޑު ކުރުމުގެ ހުނަރުތައް އެ ޕްރޮގްރާމުގައި ދަސްކޮށްދިން ކަމަށް ފުލުހުން ހާމަކޮށްފައިވެ އެވެ.
އެ ގައުމުގެ ނޭޝަނަލް ކައުންޓާ ޓެރަރިޒަމް ޔުނިޓުގެ އިސް މެމްބަރަކު ވެސް މިދިޔަ މަހުގެ ތެރޭގައި ރާއްޖެ ފުލުސް ކޮމިޝަނަރާ ބައްދަލުކުރެއްވި އެވެ.
