މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ހުސްވެފައިވާތީ، އެ މަގާމަށް ކުރިމަތިލުމުގެ ފުރުސަތު ރައީސުލްޖުމްހޫރިއްޔާގެ އޮފީހުން ހުޅުވާލައިފި އެވެ.
ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ހުސްވީ އެ މަގާމުގައި ކުރިން ހުންނެވި ފާތިމަތު އަމީޒާ ކޮމިޝަނާ އޮފް ޓެކްސޭޝަންގެ މަގާމަށް އައްޔަން ކުރެއްވުމާ ގުޅިގެންނެވެ.
ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ކުރިމަތި ލުމުގެ މުއްދަތު ހަމަވަނީ އަންނަ އޮގަސްޓު މަހުގެ 5 ވާ ބުދަ ދުވަހުގެ މެންދުރު 12:00 ގެ ނިޔަލަށެވެ.
ޓެކްސް ނެގުމާބެހޭ އިދާރީ ގާނޫނުގެ 9 ވަނަ މާއްދާގައިވާ ގޮތުން މި މަގާމަށް އައްޔަންކުރާ މީހެއްގެ ކިބައިގައި އިގުތިސާދީ، މާލީ، ވިޔަފާރި ނުވަތަ ޓެކްސްއާ ގުޅުންހުރި ދާއިރާއަކުން މާސްޓާސް ޑިގްރީ އޮތުން ނުވަތަ މާލިއްޔަތާބެހޭ ދާއިރާއެއްގައި މަދުވެގެން 10 އަހަރުގެ ތަޖުރިބާ ހުރުން ޝަރުޠުކުރެ އެވެ.
މީގެއިތުރުން، އެހެން ވަޒީފާއެއް އަދާކުރާ މީހަކު ކަމުގައި ނުވުމާއި، ކުންފުންޏެއްގެ އިސްވެރިއެއް ނުވަތަ ބޯޑު މެންބަރަކަށް ނުވުމާއި، އިންތިޚާބީ މަގާމެއްގައި ހުރި މީހަކަށް ނުވުމުގެ އިތުރުން، ޖިނާއީ ބޮޑެތި ކުށްތަކާއި މަސްތުވާތަކެތީގެ މައްސަލައެއް ސާބިތުވެފައިނުވާ އަދި ސިޔާސީ ޕާޓީއެއްގެ މެންބަރެއް ކަމުގައި ނުވުން ހިމެނެ އެވެ.
މި މަޤާމަށް ކުރިމަތިލާން އެދޭ ފަރާތްތަކުން މަޤާމަށް އެދޭ ފޯމާއި، އިގުރާރާއި، އިއުލާން ކުރި ތާރީހަށްވުރެ ފަހުން ދޫކޮށްފައިވާ ކުށާއި ދަރަނީގެ ރިކޯޑު ފޯމާއި، ސިޔާސީ ޕާޓީއެއްގައި ރަޖިސްޓަރީ ވެފައިވޭތޯ ބެލުމަށް އިލެކްޝަންސް ކޮމިޝަނުން ސާފުކުރަންޖެހޭ ފޯމުގެ އިތުރުން ސީވީ އާއި ވަޒީފާގެ ތަޖުރިބާ އަންގައިދޭ ލިޔުންތައް ހުށަހަޅަންޖެހެ އެވެ.
