ޓެކްސް ނެގުމުގެ ކަންކަން ބަލަހައްޓާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ އެންމެ އިސް މަގާމު ކަމަށްވާ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ފާތިމަތު އަމީޒާ އައްޔަނުކޮށްފި އެވެ.
އޭނާ އެ މަގާމަށް އައްޔަނުކުރަން މަޖިލީހުން ރުހުން ދިނީ މިދިޔަ ބުދަ ދުވަހު އެވެ. އެ ދުވަހު އެ މަގާމަށް އަމީޒާ އައްޔަނުކުރަން ފެންނަ ކަމަށް މަޖިލީހުން ފާސްކުރީ ވޯޓުގައި ބައިވެރިވި 64 މެންބަރުންގެ އިއްތިފާގުންނެވެ.
އަމީޒާއަކީ މީރާގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމުގައި ހުންނެވި ބޭފުޅާ އެވެ. ޓެކްސް ކޮމިޝަނަރުގެ މަގާމަށް އައްޔަނުކުރަން ފެނޭތޯ ބެލުމަށް އޭނާގެ ނަން މަޖިލީހަށް ފޮނުއްވީ ރައީސުލްޖުމްހޫރިއްޔާ މުހައްމަދު މުއިއްޒު އެވެ.
އޭނާ ވަނީ މީރާގައި 16 އަހަރަށްވުރެ ގިނަ ދުވަހު ހިދުމަތް ކުރައްވާފަ އެވެ. އަމީޒާ ވަނީ އިންޓަނޭޝަނަލް އިސްލާމިކް ޔުނިވާސިޓީ މެލޭޝިއާއިން މާސްޓާ އޮފް ސައިންސް އިން އެކައުންޓިން އަދި އޮކްސްފޯޑް ބްރޫކްސް ޔުނިވާސިޓީއިން ބެޗެލާސް ޑިގްރީ އިން އެޕްލައިޑް އެކައުންޓިން ހާސިލުކުރައްވާފަ އެވެ.
އަމީޒާގެ ނަމާއެކު، އިންސްޓިޓިއުޓް އޮފް ޗާޓާޑް އެކައުންޓްސް އޮފް މޯލްޑިވްސްގެ ރައީސްކަން ކުރައްވަމުން ގެންދަވާ މުހައްމަދު ހަލީމް އަބްދުﷲ، ސާދާގެ، ހއ. ތަކަންދޫ ގެ ނަން ވެސް މަޖިލީހަށް ފޮނުއްވި އެވެ.
ޓެކްސް ކޮމިޝަނަރުގެ މަގާމު ހުސްވީ އެ މަގާމުގައި ކުރިން ހުންނެވި، ހަސަން ޒަރީރު އެ މަގާމުން އިސްތިއުފާ ދެއްވުމަށްފަހު، ފިނޭންސް މިނިސްޓަރުކަމާ ހަވާލުވެވަޑައިގަތުމުންނެވެ.
