ޓެކްސް ކޮމިޝަނަރުގެ މަގާމަށް އައްޔަނުކުރަން ރައީސުލްޖުމްހޫރިއްޔާ މުހައްމަދު މުއިއްޒުއަށް ފެނިވަޑައިގަންނަވާ ދެ މީހެއްގެ ނަން މަޖިލީހަށް މިއަދު ފޮނުއްވައިފި އެވެ.
ޓެކްސް ކޮމިޝަނަރުގެ މަގާމަށް އައްޔަނުކުރަން ފެނިވަޑައިގަންނަވާ ކަމަށް ވިދާޅުވެ މުއިއްޒު މަޖިލީހަށް ފޮނުއްވީ މުހައްމަދު ހަލީމް އަބްދުﷲ، ސާދާގެ، ހއ. ތަކަންދޫ ގެ ނަމާއި ފާތިމަތު އަމީޒާ، ކޯޒީ ރައުންޑް، ގދ. ގައްދޫ ގެ ނަމެވެ.
މުހައްމަދު ހަލީމް އަބްދުﷲ އަކީ އިންސްޓިޓިއުޓް އޮފް ޗާޓާޑް އެކައުންޓްސް އޮފް މޯލްޑިވްސްގެ ރައީސްކަން ކުރައްވަމުން ގެންދަވާ ބޭފުޅެކެވެ. ފާތިމަތު އަމީޒާ އަކީ މީރާގެ ޑެޕިއުޓީ ކޮމިޝަނާ އޮފް ޖެނެރަލް އޮފް ޓެކްސޭޝަންގެ މަގާމު ފުރުއްވަމުން ގެންދަވާ ބޭފުޅާ އެވެ.
ޓެކްސް ކޮމިޝަނަރުގެ މަގާމު ހުސްވީ އެ މަގާމުގައި ކުރިން ހުންނެވ، ހަސަން ޒަރީރު އެ މަގާމުން އިސްތިއުފާ ދެއްވުމަށްފަހު، ފިނޭންސް މިނިސްޓަރުކަމާ ހަވާލުވެވަޑައިގަތުމުންނެވެ.
ޓެކްސް ކޮމިޝަނަރުގެ މަގާމަށް ބޭފުޅަކު އައްޔަނުކުރަން ފާސްކުރާނީ ހަލީމް އާއި އަމީޒާގެ ނަން މަޖިލީހުގެ އިގުތިސާދީ ކޮމިޓީން ދިރާސާ ކުރުމަށްފަހު އެވެ.
