އަދަދު ނޫހުން އުފެއްދި "އައިޝާ" ޑޮކިއުމެންޓްރީގެ ވާހަކަ ދެއްކުން ހުއްޓުވުމަށް ކްރިމިނަލް ކޯޓުން ނެރުނު އަމުރާ ހިލާފުވެ ކޯޓުގެ ހުރުމަތް ކެނޑި މައްސަލައިގައި، ޖަލުގައި ބަންދުކުރި މި ނޫހުގެ ނޫސްވެރިޔާ ލީވާން އަލީ ނާސިރާއި މުހައްމަދު ޝަހުޒާންގެ މައްސަލައިގެ އިސްތިއުނާފު އަޑުއެހުމަށް ކުޑަތަންވެފައި ވަނިކޮށް ހައިކޯޓުން މިއަދުގެ އަޑުއެހުން ކެންސަލްކޮށްފި އެވެ.
ކްރިމިނަލް ކޯޓުން ނެރުނު އަނގަ ބަންދުކުރުމުގެ އަމުރު (ގެގް އޯޑާ) އާ ލީވާން ހިލާފުވީ ކަމަށް ކްރިމިނަލް ކޯޓުން ކަނޑައެޅީ އެ އަމުރު ނެރުނު ކަމަށް ރިޕޯޓުކުރި ހަބަރާ ގުޅިގެންނެވެ. ޝަހުޒާން ޖަލަށްލީ ރައީސް އޮފީހުގައި ރައީސް މުހައްމަދު މުއިއްޒުއާ ކުރި ސުވާލެއް، އެ އަމުރާ ހިލާފު ކަމަށް ކަނޑައަޅާފަ އެވެ.
މި ދެ ނޫސްވެރިންގެ ވަކީލުންގެ ޓީމުގައި ހިމެނޭ ކުރީގެ ޕީޖީ ހުސައިން ޝަމީމް ވިދާޅުވީ އަޑުއެހުން ކެންސަލްވީ އިދާރީ ސަބަބަކާ ގުޅިގެން ކަމަށް ހައި ކޯޓުން ބުނެފައިވާ ކަމަށާއި ޝެޑިއުލްކުރާނެ ދުވަހެއް ފަހުން އަންގާނެ ކަމަށެވެ.
ޝަހުޒަން އާއި ލީވާންގެ ފަރާތުން ހައި ކޯޓުގައި އިސްތިއުނާފުކުރި އެ މައްސަލައިގެ އަޑުއެހުން ތާވަލުކުރީ މިއަދު ހެނދުނު ހެނދުނު 10:15 އަށެވެ. ސިއްރުން ބާއްވާ ގޮތަށް އޮތް އެ އަޑުއެހުން ކެންސަލްވިކަން ކޯޓުން އެންގީ އަޑުއެހުމުގައި ބައިވެރިވާން ނޫސްވެރިންނާއި ވަކީލުން ގޮސް ތިއްބަ އެވެ.
ގެގް އޯޑަރުގެ މައްސަލައިގައި ދެ ނޫސްވެރިން ޖަލަށް ލާން ބޭއްވި އަޑުއެހުންތައް ވެސް ކްރިމިނަލް ކޯޓުގައި ބޭއްވީ ސިއްރުކޮށްގެންނެވެ. އަވަސް އަރުވާލައިގެން އެ ދުވަހުންދުވަހަށް ހުކުމް ކުރަން ބޭނުންވެގެން އެ ކޯޓުން ބޭއްވި ދެ އަޑުއެހުމަކަށް ފަހު، ޝަހުޒާން 15 ދުވަހަށް އަދި ލީވާން 10 ދުވަހަށް ޖަލަށް ލާން އެ ކޯޓުން ހުކުމްކުރި އެވެ. މި ހުކުމް ތަންފީޒުކުރުމަށް ފަހު ދެ ނޫސްވެރިން ވަނީ މިނިވަންވެފަ އެވެ.
