އަދަދު ނޫހުން ތައްޔާރުކުރި "އައިޝާ" ޑޮކިއުމެންޓްރީ ދައުރުކުރުމާއި، އެ ޑޮކިއުމެންޓްރީ އާއި އެ ޑޮކިއުމެންޓްރީއާ ގުޅޭ އެއްވެސް ވާހަކައެއް ދެއްކުން މަނާކޮށް ކްރިމިނަލް ކޯޓުން ނެރުނު އަނގަ ބަންދު ކުރާ އަމުރު (ގެގް އޯޑަރު) މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އަށް އިސްތިއުނާފު ނުކުރެވޭނެ ކަމަށް ކަނޑައެޅި ހައިކޯޓުގެ ރަޖިސްޓްރާގެ ނިންމުން އެ ކޯޓުގެ ފަނޑިޔާރުން މިއަދު ބާތިލުކޮށްފި އެވެ.
އެމްޖޭއޭއިން ކްރިމިނަލް ކޯޓުގެ އަމުރު އިސްތިއުނާފުކުރީ އެ އަމުރަކީ ސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަމަށް ހުރަސްއެޅޭ ގޮތަށް ނެރެފައިވާ އަމުރެއް ކަމަށް އެ ޖަމިއްޔާއިން ގަބޫލުކުރާތީ އެވެ. ނަމަވެސް ހައިކޯޓުގެ ރަޖިސްޓްރާ ވަނީ އެމްޖޭއޭއަކީ މި އަމުރު ނިސްބަތްވާ މައްސަލައިގައި ހިމެނޭ ފަރާތެއް ނޫން ކަމަށް ބުނެ މައްސަލަ ބަލައިނުގަންނަން ނިންމާފަ އެވެ.
ރަޖިސްޓްރާގެ ނިންމުން ބާތިލުކުރަމުން ހައިކޯޓުގެ ފަނޑިޔާރުން ވަނީ ކްރިމިނަލް ކޯޓުގެ އަމުރަކީ ހަމައެކަނި އެ މައްސަލައިގައި ހިމެނޭ މީހުންގެ މައްޗަށް އެކަނި ރައްދުވާ އަމުރެއް ނޫން ކަން އެނގޭ ކަމަށް ފާހަގަކޮށްފަ އެވެ.
އެ ގޮތުން މި މައްސަލަ ބެލި ފަނޑިޔާރުންގެ ބެންޗުގެ ރިޔާސަތުގައި އިންނެވި، ހައި ކޯޓުގެ އިސް ފަނޑިޔާރު އަބްދުالله ޖަމީލު މޫސާގެ ރައުޔުގައި ވިދާޅުވީ، ކްރިމިނަލް ކޯޓުގެ އަމުރުގެ ދަށުން މަނާކޮށްފައިވާ ކަންކަން އެއްވެސް ފަރާތަކުން ނުކުރުމަށް ނެރެފައިވާ އަމުރަކަށް ވާތީ، އެ އަމުރު އެންމެންގެ މައްޗަށް ރައްދުވާ ކަމަށެވެ.
"އެ އަމުރުގައި ތަބީއީ ޝަހްސުތަކާއި ގާނޫނީ ޝަހުސުތައް ފަރަގުކޮށްފައެއް ވެސް ނުވޭ. އެ ސަބަބަށް ޓަކައި، މޯލްޑިވްސް ޖާނަލިސްޓް އެސޯސިއޭޝަނަކީ ވެސް އެ އަމަރު ރައްދުވާ ފަރާތްތަކުގެ ތެރޭގައި ހިމެނޭ ފަރާތެއް ކަމަށް މި ހިނދަށް ބެލެވޭ" އޭނާ ވިދާޅުވި އެވެ.
އިސްފަނޑިޔާރު ޖަމީލުގެ ރައުޔުގައި ފާހަގަކުރެއްވި ކަންކަމަށް ތާއީދުކުރައްވަމުން، ފަނޑިޔާރު އިބްރާހިމް މާހިރު ވެސް ވިދާޅުވީ އެ އަމުރުގެ މައްސަލައިގައި އެމްޖޭއޭއަކީ މަސްލަހަތު ނެތް ފަރާތެއް ކަމުގައި ބެލެެވެން ނެތް ކަމަށެވެ. އަދި، އެމްޖޭއޭއަކީ އެ އަމުރު ނިސްބަތްވާ މައްސަލައިގައި ހިމެނޭ ފަރާތަކަށް ނުވުމުގެ މައްޗަށް އެކަނި ބިނާކޮށް ރަޖިސްޓްރާ ނިންމީ ރަނގަޅު އަސާސެއްގެ މައްޗަށް ނުބެލެވޭ ކަަމަށް ވެސް އޭނާ ވިދާޅުވި އެވެ.
މި ދެ ފަނޑިޔާރުންގެ އަގުލަބިއްޔަތު ލިބިގެން ރަޖިސްޓްރާގެ ނިންމުން ބާތިލުކުރި ނަމަވެސް ބެންޗުގައި ދެން އިންނެވި ފަނޑިޔާރު ދީބާނާޒް ފަހުމީގެ ރައުޔަކީ ރަޖިސްޓްރާގެ ނިންމުން ރަނގަޅު ކަމަށެވެ. އޭނާގެ ރައުޔުގައި ވިދާޅުވީ ޕްރޮސެކިއުޓާ ޖެނެރަލް ހުށަހަޅާ ދައުވާއެއް ރައްދުވާ މީހުންގެ ތެރޭގައި ނުހިމެނޭ މީހަކު (ޚަޞްމަކު) ޖިނާއީ ދައުވާގައި މަސްލަހަތު އޮތް ފަރާތެއް ކަމަށް ބުނެ ދައުވާގެ ޚަޞްމަކަށް ވުމަކީ، "ޖިނާއީ އިޖުރާއަތުގެ ގާނޫނު ދައްކާ މަގަށް ނުވުމުގެ އިތުރުން، އެއީ ޖިނާއީ އަދުލުގެ ނިޒާމުތަކާ ބީރައްޓެހި މަފްހޫމެއް" ކަމަށެވެ.
އައިޝާ ޑޮކިއުމެންޓްރީގެ މައްސަލައިގައި ނެރުނު ގެގް އޯޑަރު އެމްޖޭއޭއަށް އިސްތިއުނާފުކުރަން ހުރަހެއް ނެތް ކަމަށް ހައިކޯޓުން ނިންމިއިރު، އެ ކޯޓުން ވަނީ އަދަދު ނޫހުގެ ސީއީއޯ ހުސެއިން ފިޔާޒު މޫސާގެ ފަރާތުން އިސްތުނާފުކުރި މައްސަލަ ބަލައިގެންފަ އެވެ.
ފިޔާޒަކީ އެ ޑޮކިއުމެންޓްރީގެ މައްސަލައިގައި ޖިނާއީ ދައުވާ އުފުލާފައިވާ އެކަކެވެ.
