ކުރީގެ ރައީސް އަބްދުﷲ ޔާމީނަށް ހުކުމްކުރި ކްރިމިނަލް ކޯޓުގެ ކުރީގެ އިސްގާޒީ އަހްމަދު ޝަކީލުގެ ކޮއްކޮ ޝުކުރުﷲ ޝަކީލުއަށް ހެރިޓޭޖް މިނިސްޓްރީގެ ސްޓޭޓް މިނިސްޓަރުކަން ދީފި އެވެ.
އެމްއެމްޕީއަރުސީން ވިއްކާލި ވ. އާރަށުގެ މައްސަލައިގެ މުއާމަލާތުގައި ރިޝްވަތާއި މަނީ ލޯންޑަކުރި ދައުވާ، ކުރީގެ ރައީސް އަބްދުﷲ ޔާމީންގެ މައްޗަށް ސާބިތުވެގެން ހުކުމް އިއްވީ ޝަކީލު އެވެ.
ޝަކީލު އެ މަނިކުފާނު 11 އަހަރަށް ޖަލަށް ލައި، ފަސް މިލިއަން ޑޮލަރުން ޖޫރިމަނާ ކުރަން އިއްވި ހުކުމަކީ ނިމިގެން ދިޔަ ރިޔާސީ އިންތިހާބުގައި ވާދަ ކުރެއްވުމުގެ ފުރުސަތު ޔާމީނަށް ގެއްލިގެން ދިޔަ ސަބަބެވެ.
ޕީޕީއެމް/ޕީއެންސީ ލީޑާޝިޕުން ނިމިދިޔަ ރިޔާސީ އިންތިހާބުގެ ކުރިން ބުނީ އެ ފިކުރުގެ ވެރިކަމެއްގައި ޝަކީލުއަށް ފަނޑިޔާރުގޭގައި ނުހުރެވޭނެ ކަމަށެވެ. އޭގެއިތުރުން ޝަކީލުއަށް ވަރަށް ބޮޑަށް އޭރު ޕީޕީއެމް/ޕީއެންސީ އިން ފާޑުކިޔެވެ.
ކްރިމިނަލް ކޯޓުގެ އިސްގާޒީގެ މަގާމު ފުރުއްވުމަށްފަހު އެންމެފަހުން އޭނާ ހުންނެވީ ހައި ކޯޓުގެ ފަނޑިޔާރުކަމުގެ މަގާމުގަ އެވެ. އެއަށްފަހު 2023 ވަނަ އަހަރުގެ ތެރޭގައި ސިއްހީ ސަބަބުތަކާ ގުޅިގެން އޭނާ ވަނީ ފަނޑިޔާރުކަމުން ރިޓަޔާ ކުރައްވާފަ އެވެ.
