އެޓަލަންޓާ، ޔުނައިޓެޑް ސްޓޭޓްސް (ޖުލައި 1) - އިނގިރޭސި ފުޓްބޯޅަ ޓީމު ތިބީ އެ ޓީމުގެ ކޯޗު ތޯމަސް ޓުޗެލްއާ އެކު ކަމަށާއި އެކުގައި ހަނގުރާމަ އަކަށް ނުކުންނަން ވެސް ތައްޔާރު ކަމަށް އިންގްލެންޑްގެ ގޯލްކީޕަރު، ޖޯޑަން ޕިކްފޯޑް ބުނެފި އެވެ.
އިންގްލެންޑުން ވޯލްޑް ކަޕްގައި ކުޅުނު ތިން މެޗުގެ ތެރެއިން ދެ މެޗުން ވަނީ މޮޅުވެފަ އެވެ. ފުރަތަމަ މެޗުން 4-2 އިން ކްރޮއޭޝިއާ އަތުން އިންގްލެންޑް މޮޅުވި ނަމަވެސް ދެ ވަަނަ މެޗުން ގާނާއާ ވަނީ 0-0 އިން އެއްވަރުވެފަ އެވެ. އެކަމަކު، ތިން ވަނަ މެޗުން ވަނީ ޕެނަމާ އަތުން މޮޅުވެފަ އެވެ. އިންގްލެންޑުން ނޮކައުޓް ފުރަތަމަ މެޗުގައި މިރޭ ކުޅޭނީ ޑިމޮކްރަޓިކް ރިޕަބްލިކް އޮފް ކޮންގޯއާ ދެކޮޅަށެވެ.
އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އިންގްލެންޑްގެ ކީޕަރު ޕިކްފޯޑް ވަނީ އިންގްލެންޑް ސްކޮޑުގައި އޮތް އެއްބައިވަންތަ ކަމުގެ ވާހަކަ ދައްކައިފަ އެވެ.
"މިއީ ކޯޗު (ޓުޗެލް) ދިން އެއްބާރުލުމާ އެކު އަހަރެމެންގެ މެދުގައި އޮތް އެއްބައިވަންތަކަން. އޭނަ އަހަރެމެންނާ އެކު އެ ބާއްވާ ބައްދަލުވުންތަކާ އެކު ވަރަށް ބޮޑު ރޫހެއް އޮންނަނީ. އަހަރެމެން މި ތިބީ އެކުގައި ހަނގުރާމަ އަކަށް ދާން ވެސް ތައްޔާރަށް. އެ ވަރުގެ ޔަގީންކަމަކާއި އަމިއްލަ ނަފްސަށް އޮންނަ އިތުބާރެއް އޭނަ (ކޯޗު) ޓީމަށް ދެނީ،" ޕިކްފޯޑް ބުންޏެވެ.
މި ވަގުތު ވޯލްޑް ކަޕްގައި އޮތް އިންގްލެންޑް ސްކޮޑަކީ ކާމިޔާބު ހޯދަން މަސައްކަތް ކުރާނެ އަދި އެކަން ކުރެވޭނެ ޓީމެއް ކަމަށާއި ޓުޗެލް ޓީމުގެ ރޭވުންތައް ކިޔައިދޭން ބާއްވާ ބައްދަލުވުންތަކުގައި ވަރަށް ގިނަ ކަންކަން ސާފުވާ ކަމަށް ޕިކްފޯޑް ވަނީ ބުނެފަ އެވެ. އަދި، ޓީމުގެ ވަކިވަކި ކުޅުންތެރިން ކައިރިން ބޭނުންވާ ކަންކަން ވެސް ވަރަށް ރަނގަޅަށް ބުނެދޭ ކަމަށް ޕިކްފޯޑް ވަނީ ފާހަގަކޮށްފަ އެވެ.
"މި ތިބީ އެއް އަޒުމެއްގައި، އަހަރެމެންގެ ކެރިއަރުގައި ހާސިލްކުރެވޭނެ އެންމެ ބޮޑު ކަމަކަށް އުންމީދުކޮށްގެން،" ވޯލްޑް ކަޕްގެ ޗެމްޕިއަންކަމަށް އުންމީދުކުރޭތޯ އެހުމުން ޕިކްފޯޑް ބުންޏެވެ.
ކޮންގޯއާ ދެކޮޅަށް މިރޭ ކުޅޭ ނޮކައުޓް ބުރުގެ މެޗުގައި ނަތީޖާ ނެރެން ޕެނަލްޓީ ޖަހަން ޖެހިއްޖެނަމަ، އިންގްލެންޑް އޮތީ ވަރަށް ތައްޔާރަށް ކަމަށް އެ ޓީމުގެ މިޑްފީލްޑަރު، ޑެކްލަން ރައިސް ވަނީ ބުނެފަ އެވެ. އެއީ، ކީޕަރު ޕިކްފޯޑަށް އިތުބާރު އޮތް ގޮތަށް ޕެނަލްޓީ ފޮނުވާލަން. ވެސް ތިބީ ވަރަށް ޔަގީން ކުޅުންތެރިން ކަމަށް ރައިސް ވަނީ ފާހަގަކޮށްފަ އެވެ.
އިންގްލެންޑާއި ކޮންގޯ ބައްދަލުކުރާ މެޗު ފަށާނީ މިރޭ 9 ޖަހާއިރު އެވެ.
