ރައްޔިތުންގެ މަޖިލީހުގެ ހިތަދޫ އުތުރު ދާއިރާއަށް އިންތިހާބުވެވަޑައިގެންނެވި އަބްދުﷲ ސޯދިގު މިއަދު މަގާމުގެ ހުވާ ކުރައްވައިފި އެވެ.
އެހެންކަމުން މިއަދު ބާއްވާ މަޖިލީހުގެ ޖަލްސާގައި ސޯބެ ބައިވެރިވެވަޑައިގަންނަވާނެ އެވެ. އޭނާއާއެކު މަޖިލީހުގެ ގޮނޑިތައް މި އޭޕްރީލް މަހަށްފަހު އަލުން ފުރިހަމަވީ އެވެ.
ހިތަދޫ އިތުރު ދާއިރާގެ މަޖިލިސް ގޮނޑިއަށް މެންބަރަކު އައްޔަނުކުރަން ބޭއްވި ބައި-އިލެކްޝަން ސޯބެ ކާމިޔާބު ކުރެއްވީ 51 ޕަސެންޓު ވޯޓު ހޯއްދަވައިގެންނެވެ. އެއީ 1375 ވޯޓެވެ. ސޯބެއާ ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އަހުމަދު ސައީދު (ސޮޑާ) އަށް ލިބިވަޑައިގަތީ 48 ޕަސެންޓު ވޯޓެވެ. އެއީ ޖުމްލަ 1313 ވޯޓެވެ.
ސޯބެ ވަނީ މީގެ ކުރިން އައްޑޫ ސިޓީގެ މޭޔަރުގެ މަގާމު ވިދިވިދިގެން ތިން ދައުރު އަދާ ކުރައްވައިފަ އެވެ. މިއީ އޭނާ ރައްޔިތުންގެ މަޖިލީހަށް ވާދަ ކުރެއްވި އަދި އިންތިހާބުވެވަޑައިގެންނެވި ފުރަތަމަ ފަހަރެވެ.
އިންތިހާބުން ހޯދި މޮޅަށްފަހު އަދަދު އާ ވާހަކަ ދައްކަވަމުން ސޯބެ ވިދާޅުވެފައި ވަނީ މަޖިލީހުގެ ތެރެއިން ސަރުކާރު ޒިންމާދާރު ކުރުވުމުގެ މަސައްކަތް އޭނާ ކުރައްވާނެ ކަމަށެވެ.
"މަޖިލިސް ތެރެއިން އިރާދަކުރެއްވިއްޔާ ސަރުކާރު ޖަވާބުދާރީ ކުރުވުމަށް އަދި އިރާދަކުރެއްވިއްޔާމުން ހަމަ އައްޑޫގައި ހުރި މައްސަލަތަކާއި ރާއްޖޭގައި ހުރި މައްސަލަތަކާ ގުޅޭގޮތުން ސަރުކާރު ޖަވާބުދާރީކުރުވަން މަސައްކަތްކުރާނަން،" ސޯބެ ވިދާޅުވި އެވެ.
ހިތަދޫ އުތުރު ދާއިރާގެ މަޖިލިސް ގޮނޑި ހުސްވީ އެ ގޮނޑި ފުރުއްވަމުން ގެންދެވި މުހައްމަދު ސިނާންގެ މައްޗަށް ސާބިތުވެފައިވާ ދަރަންޏެއް ހުކުމާ އެއްގޮތަށް ދައްކާފައި ނުވާތީ، މެންބަރުކަމުގެ ޝަރުތު އުނިވެފައިވާ ކަމަށް ސުޕްރީމް ކޯޓުން 12 އޭޕްރިލް 2026 ގައި ކުރި ހުކުމާ ގުޅިގެންނެވެ.
