މި އަހަރުގެ އެއްވެސް ހަފުތާއެއްގެ ފިސްކަލް ރިޕޯޓުތައް ޝާއިއުނުކޮށް ތިބުމަށް ފަހު، އަހަރުގެ ފުރަތަމަ ދެ މަސް ވޭތުވީ ފަހުން ފުރަތަމަ އަށް ހަފުތާގެ މާލީ ހިސާބުތައް ހިމެނޭ ވީކްލީ ފިސްކަލް ޑިވެލޮޕްމަންޓް ރިޕޯޓު ފިނޭންސް މިނިސްޓްރީން މިރޭ އާންމުކޮށްފި އެވެ.
ފިނޭންސުން އާންމުކުރި ރިޕޯޓުން ދައްކާ ގޮތުގައި ސަރުކާރަށް 7.7 ބިލިއަން ރުފިޔާގެ އާމްދަނީއެއް ލިބުނު އިރު، ލޯނު ހަރަދާއި އިންވެސްޓުމަންޓުތައް ހިމެނޭހެން 6.9 ބިލިއަން ރުފިޔާ ވަނީ ހަރަދުކޮށްފަ އެވެ.
ސަރުކާރުން އަހަރު މިހާތަނަށް އެންމެ ބޮޑު ހަރަދެއް ކުރީ ސަރުކާރުގެ ހިންގުމުގެ ހަރަދުތަކަށް (2.8 ބިލިއަން ރުފިޔާ) އެވެ. ދެން އެންމެ ބޮޑު ހަރަދެއް ކުރީ މުސާރަތައް ދިނުމަށް (2.6 ބިލިއަން ރުފިޔާ) އެވެ. ރިކަރަންޓު ހަރަދުގެ ގޮތުގައި ޖުމްލަ 5.4 ބިލިއަން ރުފިޔާ ވަނީ ހަރަދުކޮށްފަ އެވެ.
އާމްދަނީގެ ގޮތުގައި އަހަރުގެ މިހާތަނަށް ލިބުނު ފައިސާގެ އަދަދު މިދިޔަ އަހަރުގެ އެ މުއްދަތަށް ވުރެ 1.7 ބިލިއަން ރުފިޔާ އިތުރެވެ. މި އިތުރުވުމުގެ ފަހަތުގައިވާ މައިގަނޑު ސަބަބަކީ ޓެކްސް އާމްދަނީއަށް އައިސްފައިވާ ދޮޅު ބިލިއަން ރުފިޔާގެ އިތުރުވުމެވެ. ޓެކްސްތަކުން 6.4 ބިލިއަން ރުފިޔާ ލިބުނުއިރު، ޓެކްސް ނޫން އާމްދަނީގެ ގޮތުގައި ލިބުނީ 1.2 ބިލިއަން ރުފިޔާ އެވެ.
ޓެކްސް އާމްދަނީ އިތުރުވީ މައިގަނޑު ސަބަބަކީ ރެކޯޑު މުގުރަމުން އައި ޓޫރިޒަމާ އެކީ ޓޫރިޒަމާ ގުޅުން ހުރި ޓެކްސްތަކުން ލިބުނު އާމްދަނީ އިތުރުވުމެވެ.
ޓެކްސް ނޫން އާމްދަނީގެ ގޮތުގައި ލިބުނު ފައިސާގެ ތެރެއިން ބޮޑު އާމްދަނީއެއް ލިބުނީ ރިސޯޓު ތަރައްގީކުރަން ކުއްޔަށް ދޫކުރި ރަށްތަކުގެ އެކުއިޒިޝަން ކޮސްޓުގެ ގޮތުގައި ލިބުނު 312 މިލިއަން ރުފިޔާ އާއި އެއާޕޯޓު ޑިވެލޮޕްމަންޓް ފީއިންނެވެ.
އާމްދަނީއަށް ވުރެ ހަރަދު މަދުވުމާއެކީ، ފުރަތަމަ އަށް ހަފުތާ ނިންމާލީ އޯވަރޯލް ބެލެންސް، އެއީ ފައިނޭންސިން އަދި އިންޓްރެސްޓު ހަރަދު ނުހިމަނައި، 1.8 ބިލިއަން ރުފިޔާ ސާޕްލަސްގަ އެވެ.
މި އަހަރަށް ފާސްކުރީ 64 ބިލިއަން ރުފިޔާގެ ބަޖެޓެކެވެ. މީގެ ތެރޭގައި ލޯނުތައް ދައްކަން ބަޖެޓުކޮށްފައިވާ 12.9 ބިލިއަން ރުފިޔާ ވެސް ހިމެނެ އެވެ. މި އަހަރުގެ ބަޖެޓުން، ސަރުކާރުގެ ހިންގުމާއި މުސާރަތަކާއި އުޖޫރަތައް ދިނުމުގެ ހަރަދުތައް ނަގާފައި އެއް ކަމަކަށް އެންމެ ބޮޑު ހަރަދެއް ކުރަނީ ލޯނުތައް ދައްކާށެވެ.
ލޯނުގެ ގޮތުގައި އަނބުރާ ދައްކަން ޖެހޭ ފައިސާގެ ތެރޭގައި އަންނަ މަހު ދައްކަން ޖެހޭ ސުކޫކުގެ 500 މިލިއަން ޑޮލަރު ވެސް ހިމެނެ އެވެ.
