އެއްވެ އުޅުމަކީ ގާނޫނުއަސާސީން ރައްޔިތުންނަށް ލިބިފައިވާ ހައްގަކަށްވާއިރު، އެކަމަށް ޖާގަ ދޭން ޖެހޭނެ ކަމަށް އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.
ސަންގު ޓީވީއަށް ދިން އިންޓަވިއުއެއްގައި ނަޝީދު ވިދާޅުވީ އެއްވެ އުޅުމުގެ ގާނޫނުގައި ގާނޫނުއަސާސީއާ ހިލާފު ކަންކަން ހުރި ނަމަވެސް، އެ ގާނޫނުގެ ދަށުން އެއްވެ އުޅުން މަނާ ނުކުރެވޭ ކަމަށެވެ.
"އެއްވެ އުޅުމުގެ ގާނޫނެއް އެބަ އޮތް. އެ ގާނޫނު އަޅުގަނޑު ދެކޭ ގޮތުގައި މައިގަނޑު ގޮތެއްގައި ގާނޫނުއަސާސީއާ ހިލާފު ކިތަންމެ ކަންކަމެއް އެ ގާނޫނުގައި އެބަހުރި. އެހެންނަމަވެސް އެ ގާނޫނު ވެސް އެބަ ޖާގަ ދޭ އެއްވާން. އެއްވުން މަނައެއް ނުކުރެވޭ،" ނަޝީދު ވިދާޅުވި އެވެ.
އެމްޑީޕީގެ މުޒާހަރާތަކަކީ ސުލްހަވެރި މުޒާހަރާތަކެއްކަން ފާހަގަކުރައްވާ ނަޝީދު ވިދާޅުވީ އެއީ ހަމަނުޖެހުން އުފައްދަން ކުރާ މުޒާހަރާތަކެއް ގޮތުގައި ދެކުމުގެ ބަދަލުގައި މުޒާހަރާއަށް ޖާގަދީ، ޓްރެފިކް ޑައިވާޓްކުރުމުގައި ފުލުހުންގެ އެހީތެރިކަން ބޭނުންވާ ކަމަށެވެ.
އޭގެއިތުރުން މުޒާހަރާގެ ބައިވެރިންވެސް ބޭއަދަބީ ގޮތްގޮތަށް ވާހަކަ ނުދައްކާ ވީހާވެސް ސުލްހަވެރިކޮށް މުޒާހަރާ ކުރިއަށް ގެންގޮސް ނިންމާލުމަށް ނަޝީދު ބާރުއެޅުއްވި އެވެ.
"ސަރުކާރަށްވެސް އަދި އެހެން ބޭފުޅުންނަށްވެސް އެނގިވަޑައިގަންނަވަންޖެހޭ އަޅުގަނޑުމެންގެ މުޒާހަރާތަކަކީ ސުލްހަވެރި މުޒާހަރާތަކެއްކަން. އެހެންވީމަ އެއީކީއެއް ރައިޓަސް އެސެމްބްލީއެއްގެ ގޮތުގައި އެއްގޮތަކަށްވެސް ދެކިވަޑައިނުގަތުން އެއީ އަޅުގަނޑު ފުލުހުންގެ ކިބައިން ވަރަށް ބޮޑަށް އެދޭނެ ކަމެއް،" ނަޝީދު ވިދާޅުވި އެވެ.
"އެބޭފުޅުން އަޅުގަނޑުމެންނަށް ކޮށްދެއްވަންވީ ކަމަކީ މި ހިނގާލުން ރީތިކޮށް އިންތިޒާމުކޮށްދިނުމުގައި އެހީތެރިވެދިނުން. ޓްރެފިލް ޑައިވާޓްކޮށްދިނުމުގައާއި އަދި އެހެން މީސްމީހުންވެސް މުޒާހަރާއާ އެހެން ގޮތްގޮތަށް ބޭއަދަބީ ގޮތްގޮތަށްވެސް އަދި ހަމަނުޖެހުން އުފެދޭ ކަހަލަގޮތަކަށްވެސް އެމީސްމީހުންވެސް އެހެންވެސް މިހެންވެސް ނުބެވުން."
ނަޝީދު ވިދާޅުވީ އެމްޑީޕީން މީގެކުރިން ކުރާ މުޒާހަރާތަކާ ގުޅިގެން ބައެއް މީހުންގެ ހިތްހަމަނުޖެހުން ހުރި ނަމަވެސް، މިހާރު އެކަން ބަދަލުވެ އެމްޑީޕީން މަގުމައްޗަށް ނުކުތުމުން ރައްޔިތުން ތިބެނީ ހިނިތުންވެފައި ކަމަށެވެ.
"އަޅުގަނޑު މިހާރު ދަންނަވާލަންޖެހޭ މީގެ ކުރީގައި އަޅުގަނޑުމެން މުޒާހަރާކުރިޔަސް ޕިކަޕެއް ދުއްވިޔަސް އެހެންކަމެއް ވިޔަސް ބައެއް ފަހަރަށް ފެންނާނެ ހިތްހަމަނުޖެހޭ މީހުން. މޫނުމަތިންވެސް އެނގޭނެ އަދި ބައެއް ބާވަތުގެ ބަދުބަސްވެސް ރައްދުކުރާނެ. މިހާރު އެއްގޮތަކަށްވެސް ނުފެނޭ. ހުރިހާ ރައްޔިތުން ތިބެނީ އަޅުގަނޑުމެން މަގުމައްޗަށް ނުކުތީމާ ހިނިތުންވެފައި،" ނަޝީދު ވިދާޅުވި އެވެ.
މުހައްމަދު މުއިއްޒުގެ ސަރުކާރުން ގަވާއިދަކަށް ގާނޫނަކަށް ބެލުމެއް ނެތި ކުރަމުންދާ ކަންކަމާ ދެކޮޅަށް އެމްޑީޕީން މިރޭ މުޅި ރާއްޖޭގައި މުޒާހަރާ ކުރުމަށް ވަނީ ނިންމާފަ އެވެ. "ވަޒީފާ ބުރާސްފަތި" ނަމުގައި އެ ޕާޓީން މާލޭގައި ބާއްވާ މުޒާހަރާ ފެށުމަށް ހަމަޖެހިފައިވަނީ ރޭގަނޑު 21:00 ޖަހާއިރު ރަސްފަންނު ސަރަހައްދުންނެވެ.
އެ މުޒާހަރާއަށް އެމްޑީޕީން ދަނީ ދުރާލައި ތައްޔާރުވަމުންނެެވެ. އެ މުޒާހަރާ ކުރަނީ މައިގަނޑުގޮތެއްގައި އެސްއޯއީތަކުންނާއި ސަރުކާރުގެ އެކި އިދާރާތަކުން ނުހައްގުން މުވައްޒަފުން ވަކިކުރަމުންދާތީ އެވެ. އެ މުވައްޒަފުން ވަކިކުރަމުންދަނީ ސަރުކާރަށް ތާއީދު ނުކުރާތީ އެވ.
