ސަރުކާރު ހިންގާ ޕީއެންސީއަށް ތާއީދުނުކޮށްގެން މި އަހަރު އެކަނިވެސް ސަރުކާރުގެ ކުންފުނިތަކުން 12 މުވައްޒަފަކު ކަނޑާލައި، ހަތް މުވައްޒަފަކު ސަސްޕެންޑުކޮށްފައިވާކަން އެނގިއްޖެ އެވެ.
އަދަދު އަށް އެނގިފައިވާ ގޮތުގައި ކަނޑާލި 12 މުވައްޒަފުންގެ ތެރެއިން ހަތް މުވައްޒަފުން ކަނޑާލީ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީއަށް ލިބުނު ނަތީޖާތަކާ ގުޅިގެންނެވެ. އަދި ހަތަރު މުވައްޒަފަކު ވަކިކުރީ ހިތަދޫ އުތުރު ދާއިރާގެ ބައި-އިލެކްޝަނުން ޕީއެންސީ ބަލިވުމުންނެވެ.
މުވައްޒަފުން ވަޒީފާއިން ވަކިކުރި ސަރުކާރު ކުންފުނިތައް:
- ފެނަކަ - ހަތަރު މުވައްޒަފުން
- ހިތަދޫ ޕޯޓްސް ލިމިޓެޑް - ތިން މުވައްޒަފުން
- އެމްޓީސީސީ - ތިން މުވައްޒަފުން
- ވެމްކޯ - ދެ މުވައްޒަފުން
ލޯކަލް ކައުންސިލް އިންތިހާބުގައި ޕީއެންސީއަށް ލިބުނު ނަތީޖާއާ ގުޅިގެން ގއ. ވިލިނގިލި މިފްކޯ ސައިޓުގައި މަސައްކަތްކުރާ ހަތް މުވައްޒަފަކު ވަނީ ސަސްޕެންޑުކޮށްފައިކަން މި ނޫހަށް ވަނީ ކަށަވަރުކުރެވިފަ އެވެ.
މީގެއިތުރުން ހިތަދޫ އުތުރު ދާއިރާގެ ބައި-އިލެކްޝަން ކާމިޔާބުކުރެއްވި އަބްދުﷲ ސޯދިގު (ސޯބެ) އަށް ތާއީދުކުރެއްވުމުން މޯލްޑިވްސް ޓްރާންސްޕޮޓޭޝަން ސޭފްޓީ ބޯޑުގެ ޑިރެކްޓަރުގެ މަގާމުގައި ހުންނެވި އަހުމަދު ޒުހައިރު އަދާކުރައްވަމުންދިޔަ މަގާމު ސަރުކާރުން އުވާލި އެވެ.
މުއިއްޒުގެ މަގުބޫލުކަން ދަށްވާން ފެށުމުން ވަޒީފާގެ ބިރު ބޮޑުވަނީ
ރައީސް މުއިއްޒުގެ މަގުބޫލުކަން ކުޑަވެ އިދިކޮޅު ހަރަކާތްތައް ވަރުގަދަވާން ފެށުމުން، ވަޒީފާގެ ބިރުވެރިކަން ނައްތާލުމަށް ވެވަޑައިގެންނެވި ވައުދުތަކާ ހިލާފަށް މުވައްޒަފުން ވަކިކުރުމާއި ސަސްޕެންޑުކުރުން ވަނީ އިތުރުފަ. ސިޔާސީ ފިކުރު ތަފާތުވުމުގެ ސަބަބުން އެއްވެސް މީހަކަށް ދެރަގޮތެއް ނުހައްދަވާނެ ކަމަށް ވިދާޅުވި ނަމަވެސް، މިހާރު ފެންނަނީ ބިރުވެރިކަން.
އެ މައްސަލައާ ގުޅިގެން ޒުހައިރުގެ ދަރިފުޅުނު އަޒާން ޒުހައިރު، އައްޑޫ އިންޓަނޭޝަނަލް އެއާޕޯޓުގެ ބޯޑުން އަދި ޗެއާޕާސަންގެ މަގާމުން ވަނީ އިސްތިއުފާ ދެއްވާފަ އެވެ. އޭނާ ވިދާޅުވީ މަގާމުން އިސްތިއުފާދެއްވީ ސިޔާސީ ކަމެއްގައި ސަރުކާރުން އޭނާގެ ބައްޕަގެ ވަޒީފާ ގެއްލުވާލުމުން ކަމަށެވެ.
ހިތަދޫ އުތުރު ދާއިރާގެ މެންބަރު ސޯބެ ވިދާޅުވީ އޭނާގެ ކެމްޕެއިނުގައި އުޅުނު 10 ވަރަކަށް މީހުން މިހައިތަނަށް ވަޒީފާއިން ވަކިކޮށްފައިވާ ކަމަށެވެ. އޭނާ ވިދާޅުވީ ހަރަދު ކުޑަކުރުމުގެ ނަމުގައި އެ މީހުން ވަޒީފާއިން ވަކިކުރި ނަމަވެސް، އެއްވެސް މަސައްކަތެއް ނުކުރުވައި ގޭގައި ބައިތިއްބާފައި ތިބި މީހުން ހަމަ އެ ކުންފުނިތަކުގެ ވަޒީފާގައި އެބަ ތިބި ކަމަށެވެ.
މި ސަރުކާރު ވެރިކަމަށް އައި ފަހުން މިހައިތަނަށް ސަރުކާރުގެ ކުންފުނިތަކުގައި މަސައްކަތްކުރަމުންދިޔަ 50 އަށްވުރެ ގިނަ މުވައްޒަފުންނަށް ފިޔަވަޅު އަޅާފައިވެ އެވެ. އޭގެއިތުރުން ބައެއް މުވައްޒަފުން އެ މުވައްޒަފުން މަސައްކަތްކުރާ ރަށުން އެހެން ރަށްތަކަށް ބަދަލުކޮށްފައިވެ އެވެ.
މުހައްމަދު މުއިއްޒު ވެރިކަމާ ހަވާލުވެވަޑައިގަތީ ސަރުކާރުގެ ކުންފުނިތަކުގެ މުވައްޒަފުން ސިޔާސީ ބޭނުމަށް ވަކިނުކުރާނެކަމުގެ ވައުދާ އެކުގަ އެވެ. ނަމަވެސް ވެރިކަމާ ހަވާލުވެވަޑައިގެންނެވި ފުރަތަމަ އަހަރުވެސް ގިނަ އަދަދެއްގެ މުވައްޒަފުން ވަޒީފާއިން ވަކިކުރި އެވެ.
ވަޒީފާތަކުން ވަކިކުރި މުވައްޒަފުންގެ ހައްގުގައި އިދިކޮޅު އެމްޑީޕީން އަންނަނީ މަސައްކަތް ކުރަމުންނެވެ. އެގޮތުން އެ މުވައްޒަފުންނަށް ފޯރުކޮށްދޭންޖެހޭ ގާނޫނީ އެހީތެރިކަން ފޯރުކޮށްދީ، މުވައްޒަފުންގެ ހައްގުގައި އެ ޕާޓީން ދަނީ އަޑު އުފުލަމުންނެވެ.
އެމްޑީޕީގެ ޗެއާޕާސަން އިންތިހާބުގައި ކުރީގެ ރައީސް މުހައްމަދު ނަޝީދުގެ ކެމްޕެއިން ހަރަކާތްތަކުގައި ބައިވެރިވި މުވައްޒަފުންނަށް ވެސް ފިޔަވަޅު އަޅާފައިވެ އެވެ. އެކަމާ ގުޅިގެން ނަޝީދު ވަނީ ސަރުކާރުން ކުރަމުންދާ އެ މަސައްކަތް ހުއްޓާނުލައިފިނަމަ އެސްއޯއީތައް "ހިސޯރު" ކުރާނެކަމުގެ އިންްޒާރު ދެއްވާފަ އެވެ.
ސަރުކާރު ކުންފުނިތަކުގައި މަސައްކަތްކުރާ މުވައްޒަފުންނަށް ބިރު ދައްކައި އެ މުވައްޒަފުންނަށް އަޅަމުންދާ ފިޔަވަޅުތަކާ ދެކޮޅަށް އެމްޑީޕީން މާދަމާ ރޭ 20:30 ގައި "ވަޒީފާ ބުރާސްފަތި" ނަމުގައި މުޒާހަރާއެއް ބޭއްވުމަށް ވަނީ ނިންމާފަ އެވެ.
