ނޫސްވެރިންގެ ހައްގުގައި މިރޭ ކުރަމުންދާ މުޒާހަރާގެ ތެރެއިން ސީރިއަސް ތުހުމަތުތަކެއް އަމާޒުވެފައިވާ ރައީސް މުހައްމަދު މުއިއްޒުގެ އިސްތިއުފާއަށް ގޮވަން ފަށައިފި އެވެ.
މުޒާހަރާގެ ބައިވެރިން މި ވަގުތު އާޓިފިޝަލް ބީޗަށް ޖަމާވެފައި އޮތް އިރު، އެ ސަރަހައްދުގައި ހުންނަ ޕީޕަލްސް ނޭޝަނަލް ކޮންގްރެސް (ޕީއެންސީ) ހަރުގޭގައި ޖަލްސާއެއް ކުރިއަށް އެބަދެ އެވެ.
އެ ތަނުގައި ހުންނެވި މުއިއްޒަށް އަޑު އިއްވުމުގެ ގޮތުން މުޒާހަރާގެ ބައިވެރިން ދަނީ އިސްތިއުފާއަށް ގޮވަމުންނެވެ. އޭގެ އިތުރުން "އެލް ސޯފާ" ކޮބައިތޯ އާއި "ދަންވަރު ގުޅީ ކީއްވެތޯ" ފަދަ ސުވާލުތައް ވެސް ގޮވަމުން ދެ އެވެ.
އޭގެ އިތުރުން ޖަލުގައި ތިބި ނޫސްވެރިންނާއި މުޒާހަރާގެ ބައިވެރިން ދޫކޮށްލުމަށް ވެސް ދަނީ އަޑުއުފުލަމުންނެވެ. މި ވަގުތު ނުހައްގުން ޖަލުގައި ބަންދުކޮށްފައި ވަނީ އަދަދުގެ މުހައްމަދު ޝަހުޒާނާއި ލީވާން އަލީ ނަސީރެވެ.
ރޭގެ މުޒާހަރާއިން ހައްޔަރު ކުރި ޝައްމޫން ޖަލީލް (ލޫކަސް) އާއި އަލީ ޖުމާން (ޑެތު) އަދި އަބްދުﷲ ޝަރީފްގެ މުއްދަތު ވަނީ އިތުރުކޮށްފަ އެވެ. އަދި މިރޭ މުޒާހަރާ ފެށުމުގެ ކުރިން ކުރީގެ ނޫސްވެރިޔާ ހުސެން ހަސަން އާއި އިތުރު މީހަކު ހައްޔަރު ކުރި އެވެ.
