ޗައްތީސްގަރު، އިންޑިއާ (މެއި 14) - ވިރާތު ކޯލީގެ ސައްތައާ އެކު، އިންޑިއަން ޕްރިމިއާ ލީގު (އައިޕީއެލް)ގައި ރޭ ކުޅުނު މެޗުން، އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) އިން ހަ ވިކެޓުން ކަލްކަތާ ނައިޓްރައިޑާސް (ކޭކޭއާރް) ބަލިކޮށްފި އެވެ.
ރޭގެ މޮޅާ އެކު، ބެންގަލޫރު ވަނީ އައިޕީއެލްގެ ތާވަލުގެ އެއް ވަނަ އަށް ޖެހިލައިފަ އެވެ. އެއް ވަަނައިގައި އޮތް ބެންގަލޫރު އާއި ދެ ވަނައިގައި އޮތް ޕަންޖާބް ކިންސް އަށް ވަނީ 12 މެޗުން 16 ޕޮއިންޓް ލިބިފަ އެވެ. ބެންގަލޫރަށް ކުރި ލިބެނީ، ނެޓްރަންރޭޓުންނެވެ.
ވިރާތު، ރޭގެ މެޗަށް ނުކުތުމުގެ ކުރިން، އެންމެ ފަހުން، ބެންގަލޫރުން ކުޅުނު ދެ މެޗު ވެސް ނިންމާލަން ޖެހުނީ ލަނޑެއް ވެސް ނުހެދި އެެވެ. އެއީ، ލަކްނައު ސުޕަ ޖަޔަންޓްސް އާއި މުމްބައި އިންޑިއަންސް (އެމްއައި)އާ ދެކޮޅަށް ކުޅުނު ދެ މެޗުގަ އެވެ. އެކަމަކު، ރޭގެ މެޗުގައި، ބެންގަލޫރުން ފަހުން ކުޅެން އަރައި، ނަތީޖާ އަނބުރާލުމުގައި އެންމެ އިސް ރޯލެއް ކުޅުނީ ނުބައިނުވެ، 60 ބޯޅައިން 105 ލަނޑު ހެދި ވިރާތު އެވެ.
މިއީ، އައިޕީއެލްގައި ވިރާތުގެ ނުވަ ވަނަ ސެންޗަރީ އެވެ. އަދި، ރޭގެ މެޗުގައި އޭނާ ވަނީ އައިޕީއެލްގައި އެންމެ މަދުން މެޗު ކުޅެގެން އެންމެ އަވަހަށް 14000 ލަނޑު ހަމަކުރި ކުޅުންތެރިޔާގެ މަގާމު ހޯދައިފަ އެވެ. ވިރާތު އެކަން ހާސިލްކުރީ އައިޕީއެލްގެ 19 ސީޒަނުގައި 409 މެޗު ކުޅެގެންނެވެ. އެ ރެކޯޑް ކުރިން އޮތް ކްރިސް ގޭލް އަށް އެކަން ކުރެވުނީ 423 މެޗުންނެެވެ.
ޓޮސް ދިމާވުމުން، ބެންގަލޫރުން ހޮވަން ނިންމިއިރު، ކަލްކަތާ އިން ކުޅެން އަރައި، 20 އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 192 ލަނޑު ހެދި އެވެ. ކަލްކަތާ ޓީމަށް އެންމެ ރަނގަޅު ކުޅުމެއް ދެއްކީ، އަންގްކްރިޝް ރަގުވަންޝީ އެވެ. އޭނާ ވަނީ 46 ބޯޅައިން 71 ލަނޑު ހަދައިފަ އެވެ. މި އިނިންސްގައި، ކަލްކަތާގެ ރިންކޫ ސިންގް ވަނީ ނުބައިނުވެ، 29 ބޯޅައިން 49 ލަނޑު ހަދައިފަ އެވެ.
ޖަވާބުގައި ކުޅެން އަރައި، ބެންގަލޫރުން ފެށީ ވަރުގަދަ ކޮށެވެ. އެ ގޮތުން، ފުރަތަމަ ކުޅެން އެރި ބެޓިސް ޕާޓްނަޝިޕްގައި، ޖޭކަބް ބެތަލް ވެސް ވަނީ ވިރާތުއާ އެކު ރަނގަޅު ކުޅުމެއް ދައްކައިފަ އެވެ. ބެތަލް ނުބައިވީ، 12 ބޯޅައިން 15 ލަނޑަށެވެ. މި އިނިންގްސްގައި، ކަލްކަތާ އިން އެންމެ ރަނގަޅު ކުޅުމެއް ދެއްކީ ހަތަރު އޯވަރަށް ތިން ވިކެޓް ނެގި ކާތިކް ތިޔާގީ އެވެ.
