މުމްބައި (މެއި 10) - ފަހު ބޯޅައިން ރަސިކް ދަރު ހެދި ދެ ލަނޑާ އެކު، ދެ ވިކެޓުން މުމްބައި އިންޑިއަންސް (އެމްއައި) ބަލިކޮށް، އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) އިން އިންޑިއަން ޕްރިމިއާ ލީގު (އައިޕީއެލް)ގެ އެއް ވަނަ އަށް ޖެހިލައިފި އެވެ.
މި މެޗަށް ނުކުތްއިރު، އައިޕީއެލްގައި އެންމެ ފަހުން ކުޅުނު ދެ މެޗުން ބެންގަލޫރު އޮތީ ބަލިވެފަ އެވެ. އެހެންވެ، މި މެޗުން މޮޅުވުމުގެ ޕްރެޝަރު އެ ޓީމަށް އޮތެވެ. އަދި، ފަހު ބޯޅައާ ހަމައަށް ދިޔައިރު، ވެސް މެޗުގެ ކޮންޓްރޯލް މުމްބައި އަތުގައި އޮތް ނަމަވެސް، ރަސިކް ފަހު ވަގުތު ވަނީ ބެންގަލޫރު މޮޅުކޮށްދީފަ އެވެ.
އެކަމަކު، މި މެޗުގައި ބެންގަލޫރު މޮޅުކޮށްދިނުމުގައި އެންމެ ބޮޑު ތަފާތަކީ، އެ ޓީމުގެ ބުވްނޭޝްވަރު ކުމާރު (ބުވީ) އެވެ.
ފުރަތަމަ އިނިންގްސްގަައި، ބެންގަލޫރުން ހޮވިއިރު، ހަތަރު އޯވަރުން ބުވްނޭޝްވަރު ވަނީ ހަތަރު ވިކެޓް ނަގައިފަ އެވެ. އަދި، 10 ވަނަ ބެޓްސަމަނަކަށް ކުޅެން އަރައި، ޕްރެޝަރު ވަގުތުގައި އޭނާ ވަނީ ދެ ބޯޅައިން ހަތް ލަނޑު ހަދައިފަ އެވެ.
ވަންކެޑޭ ސްޓޭޑިއަމްގައި މިރޭ ކުޅުނު މެޗުގައި ފުރަތަމަ ކުޅެން އަަރައި، މުމްބައި އިންޑިއަންސް އިން ވަނީ 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން 166 ލަނޑު ހަދައިފަ އެވެ. އެންމެ ރަނގަޅު ކުޅުމެއް ދެއްކީ، 42 ބޯޅައިން 57 ލަނޑު ހެދި ތިލަކް ވަރުމާ އާއި 23 ބޯޅައިން 47 ލަނޑު ހެދި ނަމަން ދީރު އެވެ.
ޖަވާބުގައި ކުޅެން އަރައި، ބެންގަލޫރަށް މައްސަލަ ދިމާވި އެއް ސަބަބަކީ ޖެހިޖެހިގެން ދެ ވަނަ މެޗުގައި ލަނޑެއް ނުހެދި ބެންގަލޫރުގެ ތަރި، ވިރާތު ކޯލީ ނުބައިވުމެވެ. މި މެޗުގައި ބެންގަލޫރަށް އެންމެ ތަފާތު ހިތްވަރެއް ދެއްކީ، ކުރްނާލް ޕާންޑްޔާ އެވެ. އަނިޔާގެ ސަބަބުން ފަހު ވަގުތު ހިތްވަރު ގަދަ ކުޅުމެއް ދެއްކި ކުރްނާލް ވަނީ، 46 ބޯޅައިން. 73 ލަނޑު ހަދައިފަ އެވެ. މި އިނިންގްސްގައި މުމްބައިގެ ކޮބެއިން ބޮޝް ވަނީ ހަތަރު އޯވަރަށް ހަތަރު ވިކެޓް ނަގައިފަ އެވެ.
އެންމެ ފަހު އޯވަރުގައި، އުކި މުމްބައިގެ ބޯލަރު، ރާޖު ބަވާ އަތުން ގިނަ ގޯސްތަކެއް ހެދުނުއިރު، އޭގެ ފައިދާނަގައި، ބެންގަލޫރުން މެޗުން މޮޅުވެ، އެއް ވަނަ އަށް ވަނީ ޖެހިލައިފަ އެވެ.
ލީގުގެ އެއް ވަަނައިގައި އޮތް ބެންގަލޫރާއި ދެ ވަނައިގައި އޮތް ސަންރައިޒާސް ހައިދަރުއާބާދު އަދި ތިން ވަނައިގައި އޮތް ގުޖުރާތު ޓައިޓަންސް އަށް 11 މެޗުން 14 ޕޮއިންޓް ލިބިފައިވާއިރު، ޕްލޭއޮފް ލިބޭ ފަހު ޖާގަ ކަމަށްވާ ހަތަރެއްގައި އޮތް ޕަންޖާބް ކިންގްސް އަށް ވަނީ 10 މެޗުން 13 ޕޮއިންޓް ލިބިފަ އެވެ.
ޕަންޖާބުން މާދަމާ ދިއްލީ ކެޕިޓަލްސް ބަލިކޮށްފިނަމަ އެއް ވަނަ އަށް ޖެހިލެވޭނެ އެވެ.
