ރައީސް މުހައްމަދު މުއިއްޒަށް ޖިންސީ ތުހުމަތުތަކެއް ކުރި ރައީސް އޮފީހުގެ ކުރީގެ މުވައްޒަފެއްގެ ބަސް ގެނެސްދިން ޑޮކިއުމެންޓަރީ "އައިޝާ" ދައުރު ނުކުރުމަށް ކްރިމިނަލް ކޯޓުން ނެރުނު އަމުރާ ހިލާފުވާން ތައްޔާރަށް ހުންނެވި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު އެކްސް ގައި ކުރެއްވި ޕޯސްޓެއްގައި ވިދާޅުވީ ކްރިމިނަލް ކޯޓުން ނެރެފައިވާ އަމުރާ ފާޅުގައި ގިނަ ބަޔަކު ހިލާފުވުމަކީ ނޫސްވެރިކަމުގެ މިނިވަންކަމުގައި ކުރެވޭނެ އިހުތިޖާޖެއް ކަމަށް ދެކޭތީ ކޯޓު އަމުރާ ހިލާފުވާން އެމަނިކުފާނު ތައްޔާރަށް ހުންނެވި ކަމަށެވެ.
"މި ކޯޓު އަމުރާ ފާޅުގައި ގިނަ ބަޔަކު ހިލާފުވުމަކީ، ނޫސްވެރިކަމުގެ މިނިވަންކަމުގެ ހައްގުގައި ކުރެވޭނެ އިހުތިޖާޖެއް. އަޅުގަނޑު މިހުރީ ކޯޓު އަމުރާ ހިލާފުވާން ތައްޔާރަށް،" ނަޝީދު ވިދާޅުވި އެވެ.
މި ކޯޓު އަމުރު ކްރިިމިނަލް ކޯޓުން ނެރުނީ އަދަދު ނޫސް މެދުވެރިކޮށް ރައީސް އޮފީހުގެ މުވައްޒަފު މުއިއްޒުއާއެކު ބޭއްވި ގުޅުން ހާމަކުރުމާ ގުޅިގެން އެ ނޫހަށް ދައުވާކުރުމަށްފަހުކަން ނަޝީދު ފާހަގަކުރެއްވި އެވެ.
"ރައީސް އޮފީހުގެ މުވައްޒަފަކު ވަނީ ރައީސް ޑރ. މުއިއްޒުއާ އެކު، ރައީސް އޮފީހުގައި ބަދުއަހުލާގީ އަމަލު ހިންގި ކަމަށް ބުނެފައި. ރައީސް އޮފީހުގެ މުވައްޒަފު އެހެން ބުނީ އަދަދު ނޫސް މެދުވެރިކޮށް ކަމުން އެ ނޫހަށް ވަނީ ދައުވާ އުފުލާފައި. ކޯޓުން ވަނީ އެކަމާ ގުޅޭ އެއްވެސް ވާހަކައެއް ނުދެއްކޭނެ ކަމަށް ބުނެ އަމުރެއް ނެރެފައި،" ނަޝީދު ވިދާޅުވި އެވެ.
ކޯޓުން ނެރުނު އަމުރުގައި ވަނީ އެ ހާދިސާއާ ގުޅޭ އެއްވެސް ވާހަކައެއް އެއްވެސް ފަރާތަކުން ނުދެއްކުމަށާއި، އެފަދަ މައުލޫމާތެއް އެއްވެސް ވަސީލަތެއް މެދުވެރިކޮށް ފެތުރުން މަނާކޮށްފަ އެވެ.
"އައިޝާ" ގެ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް އުފުލާފައިވާ ދައުވާތައް އަނބުރާ ގެންދިޔުމަށްވެސް ނަޝީދު ވަނީ ގޮވާލައްވާފަ އެވެ.
ފިޔާޒް އާއި ހަސަންގެ މައްޗަށް ކުރަނީ ގަޒްފު ކުރުމުގެ ކުށުގެ ދައުވާ އެވެ. ދައުވާ އުފުލި ސަބަބެއް ކަމަށް ބުނެފައި ވަނީ އަދަދުގެ އެޑިޓަރުންގެ ގޮތުގައި ފިޔާޒް އާއި ހަސަން ތިބެ، މުއިއްޒަށް ތުހުމަތުތަކެއް ރައްދުވާ ގޮތަށް ޑޮކިއުމެންޓަރީއެއް ޕަބްލިޝްކޮށްފައިވުމެވެ. އެ މައްސަލައިގެ ޝަރީއަތް ކުރިއަށްގެންދަން ކޯޓުން ނިންމާފައި ވަނީ ސިއްރުކޮށްގެންނެވެ.
އެ ދައުވާތައް އަނބުރާ ގެންދިޔުމަށް ގޮވާލައި ނަޝީދު ކުރެއްވި ޓްވީޓެއްގައި ވަނީ ރާއްޖޭގައި ނޫސްވެރިިކަމުގެ ހާލަތު އޮތް މިންވަރާ މެދު ކަންބޮޑުވުން ފާޅުކުރައްވާފަ އެވެ.
“ނޫސްވެރިންގެ މައްޗަށް ޖިނާއީ ދައުވާ އުފުލައި، މަސްދަރު ހާމަކުރަން މަޖުބޫރުކޮށް، ނޫހުގެ އޮފީސް ރެއިޑުކޮށް، މުދަލާއި ސާމާނު ހިފެހެއްޓުމާއި، ނުރުހޭ ސުވާލެއް ކުރީމައި ޕްރެސް ކޮންފަރެންސްތަކުން ނޫސްވެރިން ނެރުމަކީ ބަލައިގަނެވޭނެ ކަމެއް ނޫން،” މީގެކުރިން ނޫސްވެރިކަން ކުރެއްވި ނަޝީދު އެކްސްގައި ލިޔުއްވި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ ޑޮކިއުމެންޓަރީގެ މައްސަލަ ބަލަން ފެށިތާ 14 ވަނައަށް ވީ ދުވަހެވެ. އެ މައްސަލަ ބަލަން އެންގީ ތުހުމަތުތަކާ ގުޅޭ ގޮތުން އަދަދު އިން ސުވާލު ކުރުމުން ޕްރެސް ކޮންފަރެންސެއްގެ ތެރެއިން މުއިއްޒެވެ.
އޭގެ ފަހުން ފުލުހުން ވަނީ އަދަދުގެ އޮފީހަށް ރެއިޑުކޮށް 20 އިލެކްޓްރޯނިކް ޑިވައިސްއެއް ގެންގޮސްފަ އެވެ. އޭގެ ތެރޭގައި ލެޕްޓޮޕްތަކާއި ހާޑް ޑިސްކު ހިމެނެ އެވެ.
އަދަދު ނޫހުގެ އޮފީހަށް ރެއިޑު ކުރީ، އެ މައްސަލަ ތަހުގީގު ކުރުމަށް މުއިއްޒު އެންގެވިތާ 12 ގަޑިއިރެއްހާއިރު ފަހުންނެވެ. އަދަދު ނޫހުގެ މައްސަލަ ތަހުގީގު ކުރަން މުއިއްޒު އެންގެވީ ވަގުތުން ގެނެސްދިން ނޫސްވެރިންގެ ބައްދަލުވުމެއްގެ ތެރެއިން މުއިއްޒަށް އަމާޒުވެފައިވާ ސީރިއަސް ތުހުމަތުތަކާ ބެހޭ ގޮތުން މި ނޫހުގެ ނޫސްވެރިޔާ މުހައްމަދު ޝަހުޒާން ސުވާލު ކުރުމުންނެވެ.
މުއިއްޒަށް ޖިންސީ ކުށުގެ ތުހުމަތުތަކެއް އަމާޒުވެފައިވާތީ އެކަމާ ގުޅޭ ގޮތުން މިއަދު ސުވާލު ކުރުމުން އޭނާ ވަނީ ނޫސްވެރިންގެ ބައްދަލުވުމުން ނެރެލާފަ އެ
