މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތައް އުފުލެމުންދާތީ، ގޭގައި ތިބެގެން މަސައްކަތް ކުރުމުގެ އުސޫލު އަލުން އިއާދަކުރުމަށާއި، ރަން ގަންނަ މިންވަރު މަދުކުރުމުގެ އިތުރުން ގައުމުން ބޭރަށް ކުރާ ދަތުރުތައް މަދުކުރުމަށް އިންޑިއާގެ ބޮޑުވަޒީރު ނަރެންދުރަ މޯދީ އެ ގައުމުގެ ރައްޔިތުންނަށް އިލްތިމާސް ކުރައްވައިފި އެވެ.
ކޮވިޑް-19 ގެ ބަލިމަޑުކަމުގެ ދުވަސްވަރު އަމަލުކުރި ފަދަ އިގްތިސާދީ ހަރުކަށި ފިޔަވަޅުތަކަށް އިޝާރާތް ކުރައްވައި މޯދީ ވިދާޅުވީ، މި ފިޔަވަޅުތަކުގެ ސަބަބުން އިންޑިއާގައި ތެޔޮ ބޭނުންކުރާ މިންވަރު މަދުވެ، ބޭރު ފައިސާ ރައްކާކުރުމަށް އެހީތެރިވެދޭނެ ކަމަށެވެ.
އިންޑިއާއަކީ އެ ގައުމަށް ބޭނުންވާ ތެލުގެ 90 އިންސައްތަ އިމްޕޯޓް ކުރާ ގައުމަކަށް ވާއިރު، އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައާ ގުޅިގެން ތެލުގެ ޚަރަދު ވަނީ އެތައް ބިލިއަން ޑޮލަރަކުން އިތުރުވެފަ އެވެ.
އާދީއްތަ ދުވަހު އިންޑިއާގެ ދެކުނުގެ ސިޓީއެއް ކަމަށްވާ ހައިދަރުއާބާދުގައި ބޭއްވި އާންމު ހަފުލާއެއްގައި މޯދީ ކުރެއްވި މި އިލްތިމާސަކީ، މިހާތަނަށް އިއުލާން ކުރެއްވި އެންމެ ވަރުގަދަ ފިޔަވަޅު ކަމަށް ބެލެވެ އެވެ.
"ގައުމީ ލޯތްބަކީ ހަމައެކަނި ބޯޑަރުގައި ފުރާނަ ގުރުބާން ކުރަން ތައްޔާރަށް ހުރުމެއް ނޫން. މިފަދަ ދަނޑިވަޅެއްގައި، ޒިންމާދާރުކަމާއެކު ދިރިއުޅުމާއި، ދުވަހުން ދުވަހަށް ކުރާ ކަންކަމުގައި ގައުމަށްޓަކައި އަދާކުރަންޖެހޭ ވާޖިބުތައް ފުރިހަމަކުރުމަކީ ވެސް ގައުމީ ލޯބި،" މޯދީ ވިދާޅުވި އެވެ.
މީގެ އިތުރުން މޯދީ ވިދާޅުވީ، މިހާރު އޮތް ހާލަތަށް ބަލާއިރު ބޭރު ފައިސާ ރައްކާކުރުމަށް ވަރަށް ބޮޑު އިސްކަމެއް ދޭންޖެހޭ ކަމަށެވެ.
މެޓްރޯ ފަދަ އާންމު ދަތުރުފަތުރުގެ ނިޒާމު ބޭނުންކުރުމަށް ރައްޔިތުންނަށް ބާރުއަޅުއްވަމުން، ތެޔޮ އިގްތިސާދު ކުރުމަށްޓަކައި އެކަކު އަނެކަކާ ގުޅިގެން އުޅަނދުތައް ހިއްސާކުރުމަށް މޯދީ ލަފާދެއްވި އެވެ. އަދި ދަނޑުވެރިން ބޭނުންކުރާ ގަސްކާނާގެ މިންވަރު ދެބައިކުޅަ އެއްބަޔަށް މަދުކުރުމަށް ވެސް އެމަނިކުފާނު އެދިވަޑައިގަތެވެ.
ސަރުކާރުގެ ތެޔޮ ކުންފުނިތަކަށް ބޮޑު ޕްރެޝަރެއް ކުރިމަތިވެފައިވީ ނަމަވެސް، އިންޑިއާއިން މިހާތަނަށް ޕެޓްރޯލާއި ޑީސަލްގެ އަގު ބޮޑުނުކޮށް ވަނީ ހިފަހައްޓާފަ އެވެ. އެހެން ނަމަވެސް، ދިގުލައިގެން ގޮސްފައިވާ ހަނގުރާމަ އާއި ތެޔޮ ލިބުމަށް ކުރިމަތިވެފައިވާ ހުރަސްތަކުގެ ސަބަބުން މުޅި އިގްތިސާދަށް މިހާރު ވަނީ އޭގެ ނޭދެވޭ އަސަރު ކުރަން ފަށާފަ އެވެ.
އެންމެ ބޮޑު އަސަރެއް ކޮށްފައިވަނީ އިންޑިއާގެ ފައިސާ ކަމަށްވާ ރުޕީސް އަށެވެ. ފާއިތުވި ހަފުތާތަކުގައި ރުޕީސްގެ އަގު ރެކޯޑް މިންވަރަކަށް ދަށަށް ގޮސްފައިވާއިރު، މީގެ ސަބަބުން މުދާ އިމްޕޯޓް ކުރުމުގެ ޚަރަދު ބޮޑުވެ، ތަކެތީގެ އަގު އުފުލުމަށް ވަނީ މަގުފަހިވެފަ އެވެ.
